Kehe loto kakai mo e 'asenita faka- Paati - Mu'omu'a e saliote he hoosi Featured
Tohi Ki he 'Etita
Kehe loto kakai mo e 'asenita faka- Paati - Mu'omu'a e saliote he hoosi
Tangata'eiki,
Ko e malie lahi 'a e 'a'ahi 'a e Palemia ki he ngaahi Vahenga Fili pea 'oku malava ke tau sio atu ai ki he kehekehe 'i he fakakaukau 'a e kakai.
'Oku tala 'e he ni'ihi koe kemipeini 'eni pea fakapolitikale'i ka kiate au koe me'a ia koia 'oku 'a e kakai pe ia ke fakamaau'i pea 'oku kehekehe 'a e ma'u kiai.
Pe koe ha hono mo'oni ka koe me'a 'eni 'oku mahino mai 'i he anga 'etau vakai 'i hono fakamafola mai he ngalu'ea 'a e 'a'ahi 'a e Palemia ki he ngaahi Vahenga Fili 'oku mahino mei ai 'a e kehekehe 'a e fiema'u 'a e kakai mo e 'asenita faka-paati.
'I he a'u mai 'a e 'a'ahi ki he Vahenga Fili Tongatapu 9, na'a ku malie'ia he lea 'a e fefine ai pea na'a ne fakamamafa 'i he masiva 'oku nau fe'ao moia he 'aho kotoa.
'Oku ne hulu'i mai koe fiema'u vivili ia mo e loto 'o e kakai ke solova honau faingata'a 'ia pea ke tokangaekina honau masiva.
'Oku mahino mei heni ko e loto 'o e kakai 'oku mahu'inga ka koe me'a 'oku ha mo mahino mai 'a e mahu'inga ange 'a e fiema'u ia 'a e paati faka-politikale 'i he fiema'u 'a e kakai masiva 'i he ngaahi Vahenga Fili.
Ko e fehu'i 'oku muimui mai heni koe ha 'a e ngaue 'a e fakafofonga 'o e Vahenga Fili ni na'e fai pe 'oku lolotonga fai.?
'I he Vahenga Fili Tongatapu 9, ko e teemi 'eni 'e ua 'o e fakafofonga lolotonga pea koia 'a e fakafofonga 'a e paati PTOA 'a ia 'oku ngalingali 'oku toe ma'u pe mei heni 'a e tali ki he lea 'a e kaunanga na'e fai 'i he fakataha 'i he Vahenga Fili ni.
Ko e tali mahino 'oku fai e sio atu kiai na'e fika 'uluaki ange 'a e fiema'u mafai mo e vivili ke liliu e fa'unga pule 'o e fonua kae li'ekina e kakai masiva mo 'enau fiema'u na'e 'uhinga ai 'a e hu ki loto.
Mahalo na'a 'oku sai ke toe fai pe ha siosio lelei ki ha kakai 'oku nau fakamu'omu'a 'a e kakai mo 'enau fiema'u 'o laka ange ia 'i he fiema'u 'a e tokosi'i pe fakapaati pea 'oku 'ikai ke 'uhinga pe 'eni ki Tongatapu 9 ka ki Tonga kotoa.
'Oku totonu ke fakamu'omu'a ma'u pe 'a e hoosi he saliote ka 'oku 'ikai ko hono toho 'e he saliote 'a e hoosi.
Faka'apa'apa Atu,
Fifili
Tongatapu 9
