Fiema’u ha ngāue ki hono lohiaki’i hotau kakai ‘i he mītia faka-sosiale ^Featured

‘Oku faka’amu ‘a e Kolomu Filihi ke fai mu’a ‘e he ma’u mafai ha ngāue ki hono takihala’i ‘o si'otau kakai ‘i he mītia faka-sosiale.

Ko e ngāue ko’eni ‘oku totonu ke fengāue’aki ai ‘a e Pule’anga mo e ngaahi fonua ‘oku fakapaea ai hotau kakai ‘i muli ‘o hange ko Nu’usila, ‘Aositelēlia mo ‘Amelika ‘i he ‘uhinga ‘oku fiema’u ke malu’i hotau kakai mo 'enau totonu tautautefito kiate kinautolu ‘oku tu’u lavea ngofua ki hono lohiaki’i mo pa’usi’i ‘i he taumu’a ke ma’u ai ha lelei moha tu’umalie ‘a ha ni’ihi.

‘Oku mahino ‘i he anga hono filihi ‘e he Kolomu ni ia ‘a e tau’atāina ‘a e tokotaha kotoa ke lea ‘o fakahā ‘ene fakakaukau mo e tau’atāina ‘a e mītia faka-sosale koha peletifoomu ke fai ai ‘a e feohi mo e fevahevahe’aki ka ‘oku ‘ikai ko hano ngāue’aki ke ma’u ai ha lelei fakafo'ituitui ‘i ha founga ‘oku loi mo ta’etotonu.

‘Oku mahino foki pea ‘oku ‘ikai hano toe fehu’ia ‘oku kehekehe ‘a e fakakaukau ‘a e tokolahi pea ‘oku ‘i ai ‘a e kakai ‘oku taukei mo ako lelei pea ‘i ai mo e ni’ihi ‘oku ‘ikai kenau si'i ma’u ‘a e tu’unga koia pea koe ni’ihi ia ‘oku fai ki ai ‘a e tokanga ‘a e Kolomu ko’eni.

'Oku kau ki heni mo e niihi kuo 'osi fakakuihi pe 'enau fakakaukau (indoctrinate) makatu'unga 'i he'enau kau kiha kulupu pe koha kautaha 'o tatau he faka-politikale mo 'ikai faka-politikale, faka-pule'anga mo ta'efaka-pule'anga.

‘Oku mahu’inga ke fai ha tokanga ki heni he kuo sio mata ‘a e Kolomu ni ‘i he kakai kuo lohiaki’I ‘e he ngaahi sikemi (scams) tokua ‘e ma’u ai ‘enau pa’anga pea iku ki he’enau mole pea faka’ofa ‘enau feinga ke toe fakaakeake.

‘Oku hoha’a lahi foki ‘a e Kolomu ni ki he felauaki ‘oku hoko ‘i he mītia faka-sōsiale fekau'aki mo e fefine Tonga ‘i ‘Amelika ‘oku ne uki e kakai ke tanaki pa’anga ke fakafolau mai ‘etau kau sipoti ‘oku nau fihia ‘i Siaina tupunga mei he vailasi koia ‘oku ‘iloa ko e coronavirus.

‘Oku pehe tokua ‘e he fefine ni kuo ‘osi fetu’utaki ki he UN, Va’a Fakakautau ‘a ‘Amelika, Immigration 'a 'amelika, Kau ‘Amipasitoa ‘a Tonga ‘i ‘Amelika mo Pilitania pehe ki he’etau fanau sipoti ‘i Siaina pe ‘oku alea ki he vakapuna ke folau ‘o 'omai kinautolu pea 'oku fiema'u ke tokoni 'a e kakai ki he'enau totongi.

‘Oku mahino foki ia ki he tokolahi ‘a ia ‘oku nau mahino’i ‘a e ngaahi founga ko’eni ‘e malava ke fakahoko’aki ha fetu’utaki ‘i he vā ‘o e fonua mo e fonua pehe ki he fetu’utaki faka-tipilometika koe Potungāue Ki Muli ‘oku nau fakahoko e ngāue ko’eni ‘a ia ‘oku fakafofonga’i ‘e he’etau ngaahi misiona ‘i muli hange ko 'etau kau 'Amipasitoa mo Haikomisiona pehe ki he Konisela.

Ka ki mu’a ai kuopau kenau ‘uluaki ma’u ha ngofua mei he Pule’anga ‘o e ‘aho ‘i ha tu’utu’uni ‘a e Palēmia mo e Kapineti pe ko hano fakamafai mei he levolo koia.

‘I he vā fakavaha’a-pule’anga ‘oku ‘ikai ke ngofua ke tu’u atu pe ha sino taautaha ‘o tatau pe ko Mele mo Sione ‘o alea moha kautaha fakavaha’a pule’anga hange ko e UN pe koha Potungāue 'i ha fonua muli ‘o fakafofonga'i ha kakai 'oha fonua pea ‘ikai fou 'i he senolo ko’eni pea 'oku pelepelengesi 'a e fa'ahinga fetu'utaki 'i he levolo ko'eni he 'oku 'i ai hono lao mo hono tu'utu'uni pea 'oku muimui kiai 'a e ngaahi fonua.

Ko e founga angamaheni koe fetu’utaki pe mei he taki ki he taki pe koe Potungāue ki he Potungāue ‘o fakafou ‘i he Potungāue Ki Muli ‘a e ngaahi fonua ‘oku fefetu’utaki’aki pea ko e lao ia ‘o e ngāue faka-tipilometika (Diplomacy).

‘Oku fifili ‘a e Kolomu ni ki hono takihala’i mo lohiaki’i pehe'i si'otau kakai pea kuo toe ‘ohofi mo hionau ongo ‘o e kakai ‘oku takihala’i ‘o fakafou ‘i he tangi mo e to’e pea uki mo e tanaki pa’anga ‘a ia ‘oku fai 'i he founga kākā mo e pau’u lotu.

Ko hono tapalasia ko’eni ‘a e si’i kakai ‘oku tu'u lavea ngofua mo ‘ikai ke ma'u ha taukei fe'unga mo mahino ki he fa’ahinga tu’unga ngāue pehe ni ‘oku malava ke ui ‘e he Kolomu ni koe kaiha’a mo e hū fakap'ouli ho’atā malie pea ‘oku totonu ke fakangata kei taimi he koe kuonga maama 'eni.

‘Oku matu'aki faka'amu 'a e Kolomu ni 'i he funga 'o e fie tokoni mo'oni mo e 'ofa kihotau kakai ke fai ha fengāue’aki mo e ngaahi fonua ‘oku fakapaea ai hotau kainga ‘i muli ke fakangata ‘a hono pa’usi’i hotau kakai pea ngalivale ai mo hotau ki’i fonua.