'Ikai mo'oni e tukuaki'i na'a ku fakangofua koniteina mokohunu 'a Lord Nuku - Lord Tu'ilakepa Featured
Lord Tu'ilakepa 'Eiki Minisita Ngoue & Toutai
22 Sanuali, 2020. Kuo faka'ikai'i mamafa mei he 'Eiki Minisita Ngoue & Toutai Lord Tu'ilakepa 'a e talanoa mo e tukuaki'i ta'e'ofa kuo fai kiate ia 'i he mitia faka-sosiale 'o pehe tokua na'a ne fakangofua 'a e koniteina mokohunu 'a e Minisita Polisi Lord Nuku pea mo e matapule Siaina ko Fung tokua ke uta atu ki tu'apule'anga.
'I hano 'eke kia Lord Tu'ilakpea fekau'aki mo e tukuaki'i ko'eni 'oku fakahoko kiate ia na'a ne fakaha fakahangatonu 'a 'ene fakame'apango'ia 'i he kakai 'oku nau fakahoko 'a e fa'ahinga talanoa pehe ni ke tupu ai ha moveuveu 'i he fonua.
'I he fakamatala 'a Lord Tu'ilakpeka na'e ne pehe ai ko e mahina 'aki pe 'eni hono 3 'ene hoko ki he lakanga Minisita Ngoue mo Toutai pea na'a ne hu atu 'oku kei tu'u pe 'a e tu'utu'uni ke fakangata hano toe toutai'i 'a e mokohunu he fonua pea 'oku kei ngaue pe 'a e tu'utu'u ni koia 'o a'u ki he 'aho ni.
Na'e fai hono vakai'i 'e he'ene Potungaue pe 'e malava ke toe fakahoko hano toutai'i 'o e mokohunu pea na'e 'au tonu 'o vakai ki he ngaue ko'eni pea na'e mahino 'oku totonu ke kei ta'ofi pe he ngaahi ta'u ka hoko mai hano toutai'i 'o e mokohunu 'i Tonga ni kae 'oua kuo foki 'o lahi pea 'oku fiema'u ke fakaakeake.
Ka 'oku faka'ohovale kiate ia 'a e fa'ahinga ongoongo ta'e'ofa ko'eni he 'oku mahino 'a hono taketi'i pe 'a e Hou'eiki Nopele ke fakatupunga ha taufehi'a kiai 'a e kakai 'o hange 'oku anga maheni 'aki 'e he PTOA.
Na'e fakanounou mai ai pe 'e he Minisita ko e ongoongo ko'eni 'oku 'ikai mo'oni pea loi pea 'oku fai 'a e ngaue kiai fakataha mo e Minisita Polisi Lord Nuku ke fai hano vakai'i 'a e ni'ihi 'oku nau fai 'a e fa'ahinga talanoa fakatupu moveuveu ko'eni ki he fonua hange koia 'oku tuku mai 'i he mitia faka-sosiale.
Na'e faka'osi 'aki 'e he MInisita 'ene fakahua mai 'o pehe "ko e fai fua e loi ke a'u ki fe?".
3 comments
-
Plz take them to court for defamation
-
'Oku fu'u fakailifia e fa'u talanoa ia 'a e PTOA, osi atu e fa'u e fu'u talanoa ki he fu'u maka e ongo nopele mo 'ena laumiliona, ka 'oku mou mate kala PTOA pea mou afe 'o fai ha'a mou hiva fakalotu kemou hanganoa, tuku aa e fakakona mo 'etau namuku'ia.
-
Malo e fktonutonu. The fake story is spreading like Auzzie fire on FB. Fortunately, the people think and questioning it. Now we know the truth.