Na’e ‘ikai keu tohi ki he Fakamaau’anga ke tamate’i ‘eku ngaahi tikite hopo – Lord Tu’ivakano Featured
Lord Tu'ivakano
17 'Okatopa, 2019. ‘Oku loto ‘a Lord Tu’ivakano ke fakatonutonu ‘a e ngaahi ongoongo takihala ‘oku tuku mai ‘e he ngaahi kautaha mitia mo e mitia fakasosiale ‘o pehe na’a ne tohi ‘o kole ki he Fakamaau’anga ke tamate’i ‘ene tikite hopo ‘e 9 fekau’aki mo e fetuku holo ‘o e pa’anga ‘uli (money laundering) mo e totongi fakafufu (bribery) na’e tukuaki’i ia ki ai.
‘I he fakamatala ‘a Lord Tu’ivakano ‘oku ‘i ai ‘ene fakafofonga lao ko William Clive Edwards ‘a koia ‘oku ne fakahoko hono fakafofonga’i ia ‘i he hopo ko’eni pea na’e ‘ikai pea te’eki ai kene faitohi ‘o hange koe ngaahi tukuaki’i hala 'oku fakahoko kiate ia.
Ko e me’a na’e hoko ‘i he fakamatala ‘a Lord Tu’ivakano ko hono fakahu ‘a e taukapo ‘o fakahoko ‘i he founga fakalao ‘e he’ene loea ‘o fakatatau mo e founga ngaue ‘a e Fakamaau’anga 'i he tu'unga taukapo ‘oku ‘ikai ha makatu’unga ke fakahoko ai ha hopo he ‘oku ‘ikai ha case (no case to answer) pe koha makatu’unga kene fakamo’oni’i na’a ne fakahoko ‘a e ongo hia ko’eni.
Na’e toe fakamahino foki ‘e Lord Tu’ivakano ‘oku totonu ke faka’apa’apa’i ‘e he ni’ihi ko’eni ‘a e Fakamaau’anga mo ‘ene founga ngaue pea 'oku fiema'u ke fakamahino ‘oku ne kei tonuhia pea ‘oku te’eki ke fakahalaia’i ia ‘e he Fakamaau’anga pea ‘oku ‘i ai mo ‘ene tu’unga taukapo 'oku malohi.
