Ko hono malu’i mo'oni e Minisitā ke fakafisi mei he Talēkita Uike Heilala ^Featured

‘Oku hoko ‘a e felauaki fekau’aki mo e longoa’a na’e hoko ‘i he ouau faka’osi ‘i hono faka kalauni ‘o e Miss Heilala 2019 kene ‘omai ‘a e fakakaukau mahu’inga ‘a ia ‘oku totonu ke vakai fakalelei kiai ‘a e Minisitā Takimamata Hon. Semisi Lafu Sika kapau ‘e laumalie lelei kiai.

‘I he hono filihi 'ehe Kolomu Filihi 'a e kaveinga ni na’e hoko ‘a e felekeu ‘i he faka’osinga ‘o e katoanga lahi mo ma’ongo’onga ko’eni kene ‘ave ‘a e ‘ata ‘oku ‘ikai hoa ia mo e fonua pea ‘oku ‘ikai ke tukuaki’i ‘e he kolomu ni ha taha ka ko e sio tau’atāina pe.

‘Oku ‘ikai mahu’inga ki he vakai ‘a e kolomu ni pe kohai ‘oku mo’oni ‘i he Miss Heilala Malōlō Kalo Funganitao, Miss Pacific Islands Ms Leoshina Mercy Kariha ‘o Papua New Guine mo e Minisitā Takimamata pehe kiate kinautolu ‘i he Komiti Heilala na’a nau kaungatonu ki he fetōkehekehe’aki ko’eni.

Ko e isiū ia ‘oku mahu’inga heni ‘i he vakai tau’atāina ‘a e kolomu ni ko hono malu’i ‘o e fatongia mo e ngeia ‘o e lakanga Minisitā Takimamata pehe ki he fonua he kuo mafola ‘i mamani pea ko hono mo’oni ‘oku ngalivale ai ‘a Tonga ni koe fonua ‘oku taku ko e ‘Out Motu Anga’ofa.

Neongo ‘a e fetukuaki ‘a e ongo tafa’aki ka ‘oku to’o mai ‘e he ngaahi kautaha ongoongo ‘o kau ai ‘a e ngaahi kautaha ongoongo muli ‘a e Minisitā Takimamata Semisi Lafu Sika ke hoko ko e fakama’unga ia ‘o e ngaahi tālanga ko’eni pea ‘oku toe tukuaki’i mamafa neongo ‘oku te’eki ke aofangatuku 'a e mo'oni.

Ko hono lipooti ‘e he Matangitonga pehe ki he ngaahi kautaha ongoongo na’a nau fanongo tonu ki he lea ‘a e Minisitā Takimamata ke tamate’i ‘a e maika pea tā ha fasi ke ‘oua ‘e ongo a e lea ‘a e Miss Heilala Malōlō 2018 Kalo Funganitao ‘oku ne faka’a’a sili ‘a e tukuaki’i ko’eni ‘o e Minisitā Takimamata.

‘Oku toe ta’ota’o mai kiai mo e tukuaki’i mei he Miss Pacific Islands Ms Leoshina Mercy Kariha ‘o Papua New Guine na’e ‘i ai mo e kape mo e launau kiate ia 'a ia ‘oku toe vāhenga pe 'a e Minisitā Takimamata Semisi Lafu Sika 'i he faiva ko'eni neongo ‘oku faka’ikai’i ‘eni.

‘Oku mahino ki he kolomu ni na’e ‘osi tuku mai ‘a e ongoongo tukuatu ‘a e Minisitā Takimamata ko e Talēkita ia ‘o e Uike Heilala pehe ki he Palesiteni ‘o e TTA Siosaia Moehau ‘o faka’ikai’i ‘a e tukuaki’i ko’eni mo fakamahino ‘a e ‘ikai ke tali ‘e he kau fakalele ‘o e Katoanga 'a e fa’ahinga ‘ulungaanga ma’ulalo pehe ni 'a ia nae hoko 'i he po faka'osi 'o e fe'auhi Miss Heilala ka ‘oku kei takaloto pe ‘a e tukuaki’i ia ko’eni pea ‘oku te’eki ‘osi lele'i 'ehe ngaahi mitia 'o kau ai moe ngaahi fonua muli.

‘I he filihi ‘a e kolomu ni ‘oku ‘oatu ai ‘a e fokotu’u ki he Minisitā Takimamata Semisi Lafu Sika ke fakafisi mei he lakanga Talēkita Uike Heilala ‘i he taumu’a ke fakamavahe’i hono sino mei he fatongia ‘a ia koe fatongia ‘oku malava ke tukuhifo ai ia ‘o ‘ikai ngata pe hono sino ka koe fonua mo e falala ‘a e kakai pehe ki mamani foki.

‘Oku ‘ikai puli ‘i he kolomu ni ia ‘a e manako ‘a Sika ‘i he fatongia ni mo ‘ene ngāue mateaki ‘i hono langa hake ‘o e sekitoa ko’eni ‘i he ta’u lahi ka ‘i he tui ‘a e kolomu ni kapau na’e nofo pe ‘a e Sika ‘i he fatongia faka Minisitā Takimamata ‘a ia ‘oku mafatukituki ai hono ngaahi fatongia ki he fonua tene hoko leva koha sino tau’atāina ke fakahoko atu kiai ‘a e launga mo e ta’efiemalie fekau’aki mo e kātoanga ‘o hange koia na’e hoko.

Kaikehe kuo hopo mai ‘a e Minisitā ia ‘o takimu’a ‘i he fatongia ni ‘a ia na’e mei fakahoko pe ia ‘eha taha mei tu’a ‘o iku kene fua ai ‘e ia ‘a e kanongatamaki ‘o e kātoanga pea ngalikovi ai hono hingoa pea ‘ave ai mo e fonua neongo ‘oku faka’ikai’i fefeka ‘a e ngaahi tukuaki’i ko’eni.