Pule'anga 'o e loi - Faka'ikai'i Aleapau mo e Kautaha Satelaite Kacific ^Featured

20 Sune, 2019

'Etita,

Kataki kae tu'u atu mu'a 'a e ki'i fakahoha'a ni 'i ho'o kolomu pea 'oku ou fie fakaha pe heni 'oku mole ke mama'o koha tukuhifo 'eni pe koha taufehi'a ka ko'eku 'oatu pe 'eni 'a e me'a mo'oni 'oku hoko 'i he fonua ni pea 'oku fakailifia 'o hange ha tofu pe ha Pule'anga 'oha kau haua.

Ko hono mo'oni 'i he anga 'eku vakai ki he ngaahi me'a 'oku hoko 'i hotau 'atakai tautautefito ki he tafa'aki fakapolitikale, koe Pule'anga ko 'eni 'o e 'aho ni 'oku tataki 'e 'Akilisi Pohiva 'oku hoko 'a e loi ia ko honau kakano.

'Oku fakamatala ta tu'o lahi 'a e me'a kehe 'o a'u ki he'enau malanga totoho mai mo toto'e 'i he Fale Alea 'o fakamatala 'a e 'ofa 'i he kakai mo e masiva kae hili koia 'oku nau fai 'e kinautolu 'a e me'a kehe 'oku fakalilifu, siokita mo ta'e'ofa.

'Oku 'ikai toe lava ia ke tau lau fakalautelau  'a e ngaahi fakatataa 'o 'enau ngaahi loi mo hono takiahala'i 'a e kakai ka  teu 'oatu pe 'a e fakatataa ko'eni 'a ia na'e hoko tonu ia 'i he 'aho ni pea 'oku mei 'osi e fulufulu hoku 'ulu he fakatumutumu he fakamanavahe tevolo 'a e loi.

Na'e 'asi mai 'a e Minisita Leipa Tu'i Uata 'i he ngaahi uike kuo maliu atu  'o fakaha mai ki he fonua kuo 'osi fakamo'oni 'a e aleapau 'a e Pule'anga Tonga mo e kautaha Satelaite ko e Kacific Broadband Satellites ki he ta'u 'e 15 kenau tokoni ki hano fakaa'u 'a e 'initaneti ki he motu 'e 89 'i Tonga ni 'oku 'ikai a'u kiai pea 'oku kau lelei tokua 'eni ke talifaki 'a e satelaite na'a toe motu 'a e keipolo 'oku fakatoka mei Fisi.

Ko e aleapau ko'eni na'e fakamo'oni 'i Fisi pea 'asi mai 'i he mitia 'a e ta 'o Tu'i Uata 'a ia na'a ne fakafofonga'i 'a e Pule'anga Tonga mo e CEO 'a e Kacific Broadband Satellites ko Christian Patouraux pea na'e toe tuku mai pe foki 'a e ongoongo ko'eni 'i he Website 'a e Kacific he koe kautaha lahi pea 'oku fakamamani lahi.

Na'e toe pulusi mai pe foki 'e he ngaahi kautaha mitia 'a e tu'utu'uni 'a e kapineti ke fai 'a hono fokotu'u 'o e kautaha satelaite 'a e Pule'anga 'o ui koe Tonga Satellite Limited pea na'a nau taukave'i mai 'oku fakalao 'a e ngaue ko'eni 'i he lahi hono fehu'ia 'i he mitia faka-sosiale.

Na'e fakaikiiki ai foki 'i he ngaahi mitia makatu'unga 'i he fakamatala mei he Potungaue Leipa 'a ia 'oku Minisita ai 'a e Tu'i Uata kuo 'osi lesisita 'a e kautaha satelaite 'a e Pule'anga koe Tonga Satellite Limited pea 'oku talekita fakataimi ai 'a e kau Minisita 'i he Kapineti.

'I he 'aho ni kuo fakaha 'e he Minisita Polisi ia lolotonga 'a e feme'a'aki 'a e Fale Alea na'e te'eki ke fakamo'oni 'a e Pule'anga ia 'i ha aleapau mo e kautaha Kacific Broadband Satellites.

'Oku toe faka'ohovale 'a e fakalongolongo pe 'a Tu'i Uata 'o 'ikai ke lea mai pe aa 'o fakaha ki he Fale he 'oku fakaongo atu 'a e kakai 'o e fonua pea 'oku 'ikai kenau 'ilo pe koe fe 'a e mo'oni mo e loi..

'Etita koe a'u 'eni 'a e loi ki he tu'unga kuo tokavaivai pea 'oku 'ikai pe toe lava 'e he Pule'anga ia 'o fakafaikehekehe'i 'a e loi mo e mo'oni.

Ko 'etau toki situ'a mai 'eni mei hono tala 'oku 'ikai to'o e mafai 'o e Tu'i kae hili koia 'oku 'asi lelei pe 'i he ngaahi lao fakaangaanga 'e 6 ke liliu 'a e Konisitutone 'a hono fetukutuku 'a e mafai mei he Tu'i 'i he Fakataha Tokoni ki he Kapineti.

'E 'ikai ketau fa'a laua 'a e loi he 'oku loi pe mei he pongipongi ki he po'uli 'o taki pe ai 'a e Palemia he 'oku ne 'ilo pe 'a e loi 'a Tu'i Uata mo hono foha 'i he fono kae fakalongolongo pe.

'Oku 'ikai mahino pe koe taumu'a 'a e Pule'anga ke fakahee'i e fakaukau 'a e kakai 'o e fonua pe kuo aleapau 'a e kapinetii ia kenau loi pe he me'a kotoa.

Kuo a'u 'Etita 'a Tonga ni ki he tu'unga kapau e 'ikai fai ha me'a he vave taha ke fakangata 'eni 'e faifai pea iku hoko 'a e loi 'o mo'oni 'i hotau ki'i fonua ni.

Faka'apa'apa Atu,

Pouono

Neiafu