Folau Fakafalemahaki ‘a e Palēmia kae uki fakataha faka-politikale ‘i Nu’usila ^Featured

‘Oku ‘uhinga ‘a hono fehu’ia ‘o e uki fakataha ko’eni ‘a e Palēmia he na’e ‘uhinga ‘ene folau pea totongi mei he pa’anga ‘a e fonua ko e fakahoko hono faito’o ka ta koaa ia ‘oku toe feinga ke uki ‘ene fakataha faka-politikale mo e kakai Tonga ‘i Nu’usila.

‘Oku toe ‘omai foki ‘i he ‘uhinga ko’eni ‘a e fehu’i pe ‘oku puke mo’oni koaa ‘a e Palēmia pe ko’ene ngāue ‘aki ‘a e ‘uhinga faka falemahaki ke vaka atu ai ‘ene toutou folau ki Nu’usila pea totongi ia mo hono foha mo ‘ene kau muimui folau ‘e he Pule’anga mei he tukuhau ‘a e kakai ke fakahoko ‘ene ngaahi ‘asenita faka politikale ‘o kau ai ‘a e feinga ke liliu e Konisitūtone ke to’o e mafai ‘o e Tu’i.

Ko e loea foki ‘oku ngāue ‘aki ‘ehe Palēmia mo e Pule’anga koe tangata loea Nu’usila ko Rodney Harrison pea ‘oku mahino ‘oku toutou fakataha ‘a e Palēmia mo e loea ko’eni ‘i he’ene toutou folau fakafaito’o ki Nu’usila.

‘Oku malie he ‘oku ‘ikai ke ngāue’aki ‘e he Palēmia ia ‘a e ‘Ateni Seliale moe ‘Ofisi Fakahinohino lao ‘a e Pule’anga kae ngāue ‘aki ‘a e loea Nu’usila ko’eni ‘o totongi ai mei he tukuau ‘a e fonua ‘a e laukilu ki hono ngāue’aki ‘a e loea mamafa ko’eni.

‘I he tafa’aki ‘e taha ‘oku ‘ikai ke fakahā mahino mai mei he Pule’anga ‘a e tu’unga totonu ‘oku ‘i ai ‘a e mo’ui ‘a e Palēmia ka ‘oku tuku ta’e mahino mai pe ‘o malava ai ke fehu’ia pe koe puke mo’oni ‘eni pe koe ‘eti faiva mo e pau’ulotu.

Kuo ma’u ‘e he ongoongo ni ‘a e tatau ‘o e tohi ‘a e sekelitali ‘a e Palēmia Po’oi Pohiva ‘o kole ki he taha 'o e kau taki ‘o e komiunitī Tonga kenau tokoni ange ki hono uki ha fakataha mo e Palēmia ki he ‘aho Tokonaki ‘o e uike ni 8 ‘o Sune.

Na’e fakaha foki ‘e he Palemia ‘i hano faka’eke’eki ia ‘e he ngaahi kautaha ongoongo ‘i Tonga ni kuo fale’i ia ‘e he’ene toketa ke ‘oua ‘e toe fakamafasia’i hono ‘atamai.

‘Oku ‘ohake foki ‘a e ngaahi fifili ko’eni he kuo tō tu’a kehekehe ‘a e fakamatala ‘a e Palēmia mo e Pule’anga mo e me’a totonu ‘oku hoko .