Fakapotopoto ange ke fakafisi ā ‘a e Palēmia he ‘oku ‘ikai mo’ui lelei – KFFF ^Featured

Neongo ‘oku ‘ikai ke tatau ‘a e tui faka-Politikale ‘a e tokolahi ‘i he fonua ka ‘oku ‘ikai ke toe le’ei ‘a e mo’oni ko Samuela ‘Akiisi Pohiva koe taki ia ‘o e Pule’anga mo e fonua pea ko hono sino ‘oku papulika pea koe sevaniti ia ‘a e fonua.

‘I he taimi tatau ‘oku fai ‘a e faka’apaapa lahi kiate ia he ko e ‘ulu ia ‘o e Pule’anga pea ‘oku ne tataki ‘a e fonua ka ‘oku totonu ke ‘ilo ‘a e kakai ki he tu’unga ‘ene mo’ui pea ‘oku taliui hono sino ki he kakai mo e fonua.

Ko e talu ‘a e hoko ‘a e ngaahi fakatamaki fakaemo’ui ki he Palēmia mo e hangē ‘oku feinga holo hono kau muimui ‘o taki ai pe ‘a e Kapineti mo e ‘Ofisi ‘o e Palēmia ke fūfū’i mei he kakai kae tautautefito kiate kinautolu ‘oku nau fakaanga’i ‘a e Palēmia mo e Pule’anga.

Ko e fakaanga ia koe fatongia faka-Temokalati ia ke fakahoko pea ‘oku hoko ‘i he fonua kotoa ‘oku fakalele ‘i he founga faka-Temokalati ka koe poini mahu’inga ia heni ko e taliui ki he kakai he ‘oku vahe ‘a e Palēmia pea fakalele’aki ‘a e Pule’anga ‘a e tukuhau ‘a e kakai ‘o e fonua.

Kuo ma’u ‘e he ongoongo ni ‘a e fakamo’oni ‘ikai toe veiveiua koe Palēmia ‘oku ‘i he tu’unga fakatu’utamaki ‘ene mo’ui pea ‘i he’ene pehe leva ‘oku ‘ikai malava kene fuesia lelei hono fatongia mo hono fakalele ‘o e fonua.

'Oku 'ikai koha palopalema 'eni he 'oku 'ikai ketau pule ki he'etau mo'ui pea 'oku 'ikai loto ha taha ke mahamahaki ka 'oku tu'u telinga 'a e fonua ke 'ilo ki he tu'unga mo'ui honau taki.

‘I he taimi tatau kuo fakahā ‘e he Komiti Fakafonua ki hono Fakafepaki’i ‘a e Faihala (KFFF) kuo taimi totonu pea taau ke fakafisi mai aa ‘a e Palēmia he ‘oku ‘ikai malava ‘a e fatongia ‘o makatu’unga ‘i he ‘ikai mo’ui lelei hono sino.

‘I ha fakamatala mei he KFFF na’a nau pehe ai koe tu’unga mahamahaki ‘oku ‘i ai ‘a e Palēmia 'oku mahino mai ‘a e lahi ange ‘ene mama’o mei he fatongia pea ‘ikai malava kene muimui’i lelei ‘a e ngaahi ngāue ‘a e Pule’anga pea iku ki he fa’ifa’iteliha ‘a e ni’ihi ‘i he Kapineti pea kau kiai mo kinautolu ‘oku takaofi ‘iate ia ‘o kau ai ‘ene fanau mo honau ngaahi kaungame’a ofi.

‘I he fakamatala ‘a William Clive Edwards mei he KFFF na’a ne pehe ‘oku anga maheni ‘aki pe ia ‘i he ngaahi fonua Temokalati ko ‘ene mahamahaki pe ‘a e taki pea ‘oku fakafisi leva kae fetongi mai ‘e he ni’ihi ‘oku mou’i lelei fakaesino, ‘atamai, mo laumalie ke fakahoko lelei ‘a e fatongia.

“‘Oku fu’u ngalivale ia kene kei puke ‘a e fatongia lolotonga ia ‘oku mahino kiate ia ‘oku ‘ikai kene kei malava he ‘oku faingata’a’ia fakasino pea kuopau kene tukuange ‘a e fatongia kae mo’ui ‘a e fonua”, koe fakamatala ia ‘a Edwards.

Na’e toe pehe ‘e Edwards ‘oku ‘i ai ‘a e fatongia heni ‘o e famili kae tautautefito ki he fanau ‘a e Palēmia kenau fale’i lelei ia pea ‘oku fakanatula pe ke fai ‘a e mavae mo e fatongia ‘o taumu’a ki he lelei fakalukufua ‘a e fonua.

Na'e toe fakamahino 'e Edwards 'i he'ene fakafofonga'i mai 'a e KFFF 'oku mole ke mama'o ko hano 'ohofi fakafo'ituitui 'eni 'o e Palēmia lolotonga 'ene 'i he mohenga 'o e mamahi ka koe 'isiū heni 'oku 'ikai kene mo'ui lelei pea 'oku fiema'u ke fakahoko lelei 'a e fatongia faka-taki.

‘Oku mahino mai kuo toe ‘atimiti ‘a e Palēmia ki he Falemahaki Vaiola hili ‘ene foki mai ‘i ha’ane folau fakafalemahaki ki Nu’usila pea ‘oku mahino mai foki ‘oku si’i ma’u ‘a e Palēmia ‘e he fokoutua koe Kanisā (prostate cancer).