Faingofua ange fakatangi ki he Tu'i 'i he Palēmia - KFFF ^Featured

Ko e kau poupou foki ‘i he tafa’aki fakaanga ‘oku ‘asi mai mei ai ‘a e kakai taukei tokolahi ‘o tatau pe ‘i he mala’e ‘o e ako, pisinisi mo e politikale tukukehe ange ‘a e ngaahi taukei ngāue he koe tokolahi ‘o kinautolu na’a nau a’u ki he ngaahi tu’unga ma’olunga ‘i he ngāue faka-Pule’anga ‘o kau ai ‘a e ni’ihi na’a nau a’u ki he lakanga CEO. 

‘Oku ‘i ai foki mo honau ni’ihi tokolahi na’e a’u ki he lakanga Minisitā ‘i he Kapineti pea ‘ikai fa’a laua ‘a e kakai ‘oku nau ngāue’i mai ‘a e sekitoa taautaha pea ‘oku nau ‘iloa foki ai.

‘Oku malie lahi ‘a e ngaahi ‘uhinga ‘oku nau ‘omai ‘a ia ‘oku ‘i he tu’unga falala’anga ‘o fakatatau ki he’enau a’usia pea ‘oku ‘i ai hono ngaahi fakamo’oni pehe ki hono tu’unga fakalao.

‘Oku mahino mai heni ‘oku mo’ui ‘a e temokalati ‘i he fonua pea neongo ‘a e feinga ke lolomi ka koe natula totonu pe ia ‘o e temokalati.

‘Oku ‘i ai ‘a e poini malie ‘oku tuku mai mei he Komiti Fakafonua ki hono Fakafepaki’i ‘o e Faihala (KFFF) ‘a ia ‘oku nau pehe ‘oku faingofua ange ‘a ‘enau feinga ki he Tu’i ‘i he Pule’anga.

Fakatatau ki he fakamatala kuo ‘omai mei he KFFF na’e fakahoko ‘enau tohi tangi ki he Tama Tu’i pea na’e ‘i loto pe ‘i he uike ‘e taha 'a hono fakahū atu ki he 'Ofisi 'o e Palasi kuo tali mai ‘a ‘enau tohi tangi ‘o fakahā mai ‘i ha tohi faka'ofisiale 'oku fakahoko ‘a e ngāue kiai.

‘I he fakamatala ‘a e Sea ‘o e KFFF Sione Teisina Fuko na’a ne pehe ko e tali fakafiemalie ‘eni ‘a ia ‘oku ho’ata mei ai ‘a e toka’i mo e tu’unga ma’olunga faka-polofesinale pea ‘oku hoko koe fakanonga ki he kakai na’a nau tangi neongo koe me’a kehe ‘a e aofangatuku ia ‘oha tali ki he ngāue koia ka koe toka’i ‘oku ne ‘omai ‘a e ‘ata faka-nonga.

‘I he fakamatala ‘a Fuko na’a nau fakahū ‘a e tohi ki he Palēmia ‘i he uike tatau ‘a ia koe ‘aho tatau pe ia na’a nau fakahū ai ‘enau tohi tangi ki he Tama Tu’i (‘aho 19 Fepueli, 2019) pea koe a’u ki he ‘aho ni ‘oku ‘ikai pe ke ‘omai ha tali ia.

Ko ‘enau tohi foki ‘eni ki he Palēmia fakatatau ki he fakamatala ‘a Fuko ke fakamalōlō’i ‘a Tu’i Uata mei hono lakanga Minisitā makatu’unga ‘i hono faka’ilo ia ki he maumau lao pea ‘oku lolotonga hopo fakataha mo ‘ene ngaahi lea ta’e taau ki he Tama Tu’i pehe ki he’ene ngaahi fakamoveuveu mo e maumaulalo kehe ‘oku tukuaki’i ia kiai.

‘I he lau ‘a Fuko ‘oku fu’u matu’aki ho’ata mai pe ‘a e ta’e toka’i mo e ‘ai’ainoa’ia pea ‘oku mama’o mei he tu’unga fakapolofesinale ‘a ia ‘oku ‘ikai hoa ia moha pule’anga ‘o ha kakai he koe kuonga ‘eni ‘o e Temokalati.

Kaikehe ‘i he lau ‘a Clive Edwards na’a ne pehe ai tatau ai pe koe tohi mei he kau fakaanga ka kuopau pe ke tali ‘a ‘enau tohi ‘oku ‘omai he ko e ‘omai mei he kakai pea ‘oku fiema'u ke fakaha atu pe 'oku fai hono toka'i 'o e kakai.