Faka'ikai'i 'e he KFFF 'a e fakamatala loi na'e fakafoki 'enau Tohi Tangi Featured
Sione Teisina Fuko Sea KFFF mo William Clive Edwards Memipa mo Fale'i KFFF
21 Fepueli, 2019. Kuo faka'ikai'i fefeka 'e he Komiti Fakafonua ki hono Fakafepaki'i 'o e Faihala (KFFF) 'a e fakamatala kuo tuku mai 'e he Tokoni Pule 'o e Letio Tonga Setita Tui'onetoa 'i he mitia faka-sosiale 'o pehe ai kuo fakafoki mei he Tu'i 'a e tohi tangi 'a e kakai na'e tataki 'e he KFFF.
Ko e fakamatala foki 'a Tui'onetoa 'oku pehe na'e fakafoki 'a e tohi tangi 'a e KFFF mei he Tu'i ke 'ave ki he Fale Alea mo e Fakamaau'anga.
Na'e faka'ikai'i mamafa 'eni 'e he Sea 'o e KFFF Sione Teisina Fuko 'a e fakamatala ko'eni 'o pehe 'oku loi pea 'ikai mo'oni pea ko hono takihala'i 'eni 'o e kakai 'e he kau poupou 'o e Pule'anga 'a ia 'oku nau feinga ke fakamele'i 'a e ngaue mafakatukituki mo faka-Konisitutone na'e fakahoko 'e he KFFF mo e kakai tokolahi 'i he funga 'o 'enau totonu faka-Konisitutone.
"'Oku malie foki he na'e 'osi pulusi mai 'e he Tokoni Pule 'o e Letio Tonga Setita Tui'onetoa 'a e fakamatala ko'eni 'i he mitia faka-sosiale pea na'e 'osi fakahoko mai 'e he tokolahi kiate au kimu'a pea ne toki telefoni mai ke 'eke kiate au 'a ia koe founga 'eni 'oku ou fehu'ia lahi 'a e tu'unga faka-polofesinale 'o e kakai pehe ni 'oku 'omi ke ngaue 'i he Letio mo e Televisone 'a e Pule'anga" ko e fakamatala ia 'a Fuko.
'I he hoko atu a Fuko na'a ne pehe ai 'oku 'ikai mo'oni 'a e fakamatala ko'eni pea 'oku 'ikai ke anga pehe 'a e founga ngaue ia 'e Tu'i mo 'Ene Fakataha Tokoni ka 'oku fakaofo 'a e 'omai 'e he kakai 'oku nau poupou ki he Pule'anga mo e PTOA 'enau fiema'u mo honau loto 'i he founga 'oku 'ikai lelei ke hoko atu 'aki hono lohiaki'i 'o e fonua.
Na'e pehe 'e Fuko kuo 'osi fakahu 'a e tohi tangi ki he Tu'i pea kuo lava honau fatongia mo e kakai ka 'oku 'i he mafai 'o e Tama Tu'i 'a e me'a kotoa pea kuo lava 'a e fatongia 'o e KFFF mo e kakai na'a nau poupou kiai pea na'e fakahoko 'i he founga melino mo fakalao.
Kuo tufaki foki 'a e ongoongo mo e fakamatala ko'eni 'o taki 'e Tui'onetoa 'i he mitia faka-sosiale pea kuo faka'ikai'i mamafa mai 'eni 'e he Sea 'o e KFFF 'oku 'ikai mo'oni 'a e fakamatala ko'eni.
3 comments
-
Ko e ha óku kei tuku ai a Setita Tuíónetoa í he A3Z, naé hu taéfou mai he hala pea ko éne kamata pe ko e ú maumau ki he kakai óe fonua mo e loi. Ko e kakai eni ka fakatotoloí é ílo óku íai honau hako loi pea 'oku tonu ke fakamavaheí he ko e faáhinga eni ó e kilia óku íkai lava ke faitoó.
-
'O ka fepaki ha ongo 'uhinga, fakakaukau pe me'a 'e 2 pea 'oku mo'oni 'a e taha ka e loi 'a e taha ka e 'ikai malava ke mo'oni pe loi fakatouloua. 'Oku pehe 'a e taukave 'a e tokolahi he mitia tokua 'oku 2 'ape 'a e fa'ahi ko e fa'ahi "faka'io" mo e fa'ahi "faka'ikai" ka e ngalo ange 'oku fa'ahi 3 ko e "fakamo'oni." 'Oku 'asi lelei 'eni he toutou mo'ua he fakamaau'anga 'a e palemia ('Akilisi Pohiva) mo e pule'anga mo hono kau muimui kukui mo e kau fale'i he'enau anga'aki 'a e kaka mo e loi 'a ia 'oku ma'u mo mahino lelei ai 'enau loi mei he mo'oni. 'Oku nau anga'aki 'a e loi 'o hange ko 'enau fakafepaki 'o tala ko e loi 'a e mo'oni kuo 'osi fakahu ki he 'Ofisi 'o e Palasi 'a e ngaahi tohitangi 'a e Komiti KFF fakataha mo e kau nopele mo e kau fakafofonga mo e kau minista malolo. Na'e kau 'a e fale'i fakapolitikale 'a e palemia 'a Lopeti Senituli hono fakafepaki'i fefeka ko e loea tokua hono fua veteki faka-Konisitune faka-Tu'i 'a e falealea 'o Tonga pea toki fakahinohino mo fakamahino lelei 'e he 'Ateni Seniale 'ene ta'e'uhinga mo ta'emakatu'unga fakalao ka e toki mahino mai ta ko a ko 'ene feinga talangaue he funga 'ene heketakai mo e fakalai ki he palemia! 'Oku kau ai 'a e taukave fakavale mo ngalivale 'a e palemia ko e 'uhinga 'ene ikuna he ta'u 'eni 'e 25 mo to e hokohoko atu 'ene tuku fakatafa'aki tokua ki tu'a 'a e lao (kau ai 'a e temokalati ko hono mafutefua) ka e ngaue ta'efakalao (ta'efakatemokalati) 'a ia ko e halatu'usi ia ki he tikitato 'oku fakalele'aki 'ene taki kovi mo e pule kovi hono fakalele 'a e pule'anga 'oku tupu ai 'a e fulutamakia 'a e fonua mo e kakai 'o tukkkukehe pe ia mo e pule'anga mo hono kau muimui mo e kau fale'i he'enau tili taufetongi he koloa 'a e fonua mo e kakava 'o e kakai!! 'E to nai ki fe 'a e kakava 'o e kakai 'o Tonga na'e tuku 'e Tupou I ki Langi ke malu'i mei ai ke tuputupu'a??
-
Na'a mau fanongo ki he ongoongo 'a e 87.5 aneuhu 'o fakahoko ma ai 'a e tali 'a e pule'anga ki he tohi tangi. Na'a mau pehe ko e tali ko eni ki he tu'i ta ko ee ko e tali ia ki he kau faiongoongo na'e fakahoko 'e 'Akilisi (PM) mo 'ene tama kai koaa. 'Oku mau fakatumutumu he tali ma'ulalo mo'oni, GPS mo'oni 'a e tali hala 'ataa ha'ane lave ki he tukuaki'i 'oku fai. Tali 'a Lopeti mahino si'ono ngata'anga ko e to'o po pe ia mo kaikai koa. Kuo paheke eni 'a e fili 'o e komisiona polisi ke toe fili pe 'e he tu'i. Kuo ha motu 'e ngakau ? Kuo ha 'a e vili ta'e'unua ia ke to'o mafai ?