Fakahū atu 'a e Tohi Tangi 'e 3 ki he 'Ofisi Palasi ^Featured

Fakatatau ki he fakamatala 'a e Sea 'o e Komiti Sione Teisina Fuko na'a ne pehe ai ko e ngaahi tohi tangi ko'eni 'a ia 'oku takimu'a ai 'a e tohi tangi mei he kakai 'o e fonua kuo fakamo'oni kiai 'a e kakai kuo laka hake he mano pea koe ongo tohi tangi 'e ua kehe koe poupou pe ki he tohi tangi 'a e kakai pea 'oku taumu'a kotoa pe 'a e ngaahi tohi tangi ni ke fakafepaki'i 'a e faihala 'a ia kuo polo'uto 'i he fonua 'i he fakalea 'a Fuko.

'I he fakamatala 'a Fuko 'oku fokotu'u atu 'ehe tohi tangi ko'eni 'a e kakai ke veteki 'e he Tu'i 'a e Fale Alea 'o ngaue'aki hono mafai faka-Konisitutone pea ke fakatotolo'i 'a e ngaahi faihala 'oku lolotonga hoko 'i he Pule'anga lolotonga pea koe anga ia 'o e fokotu'u ka 'oku 'i he Tu'i pe 'a hono aofangatuku.

Ko e Tohi Tangi 'e 3 na'e fakahu koe Tohi Tangi 'a e Kakai 'a ia na'e fakahu atu 'e Sione Teisina Fuko, Tohi Tangi 'a e Hou'eiki Nopele na'e fakahu atu 'e Lord Nuku pea moe Tohi Tangi 'a kinautolu na'a nau hoko koe kau Fakafofonga Fale Alea mo hoko koe kau Minisita 'i he Kapineti 'i he kuohili na'e fakahu atu ia 'e William Clive Edwards.

'I ha fakamatala 'a William Clive Edwards na'a ne pehe ai na'e fakahoko ai pe mo e kole ha faingamalie ke fakahoko ha fakataufolofola 'a e Komiti Fakafepaki'i 'o e Faihala ki he Tama Tu'i ke fakama'ala'ala 'a e ngaahi fokotu'u 'oku 'oatu 'i he Tohi Tangi ko'eni.

Na'e toe hoko atu Edwards 'o pehe koe KFFF 'oku lolotonga fakahoko e ngaue ke lesisita ke hoko koha kautaha pe kulupu tau'ataina kene fakahoko 'a e fatongia mamafa ko'eni ko hono falafepaki'i 'a e faihala he 'oku 'ikai ha Komisoni Tau'i ia 'o e Faihala (Anti-Corruptions Commission) 'i he fonua neongo kuo 'osi fili 'e he penolo 'a e Komisiona pea fakapaasi mo hono lao ka 'oku 'ikai fakapa'anga ia 'e he Pule'anga.

'I ha fakamatala 'a 'Isileli Pulu ko e Tokoni Sea 'a e KFFF na'a ne pehe ai koe tohi tangi 'eni 'oku fu'u poupoua 'aupito pea 'oku kehe ia mei ha toe tohi tangi pea 'ikai ngata ai ka koe fakamo'oni lahi faufaua na'e malava ke tanaki 'i ha ki'i taimi nounou 'a ia 'oku ne fakamahino mai 'a e matu'aki poupou 'a e kakai ki he kaveinga 'o e Tohi Tangi.

'Oku tui foki 'a Pulu koe tohi tangi lahi taha 'eni ko fakahoko 'i he fonua ni 'o fakatatau ki he'ene taukei 'i he'ene ngaue faka-politikale.

'I ha fakamatala mei he 'Ofisi 'o e Palasi lolotonga hono fakahu atu 'a e ngaahi tohi tangi ni na'e pehe ai 'e Suka 'Otukolo ko e Tokoni Sekelitali ki He'ene 'Afio koe tohi tangi 'eni ia 'oku kehe pea koe lahi taha ia kuo fakahu ange ki he 'Ofisi 'o e Palasi.

Na'e toe fakaha foki 'e 'Otukolo 'e ngaue atu 'a e 'ofisi ke fakakakato 'a e ngaahi fiema'u ke fakahoko fakahangatonu ki he Tu'i 'a e ngaahi tohi tangi ko'eni.