Fakakauleka e polokalama fakamanamana 'a Tu'i Uata mo Piveni Piukala: KFFF ^Featured

Fakatatau ki ha fakamatala mei he Sea 'o e KFFF Sione Teisina Fuko 'oku mole ke mama'o ha tokanga ki he polokalama ko'eni he 'oku mahino mai pe 'a e levolo mo e tu'unga mahino 'oku 'i ai 'a e Minisita pehe kia Piukala 'a ia 'oku 'ikai ke fu'u mahino kiate kinaua 'a e Lao mo e Konisitutone pea koe taumu'a 'o e  polokalama ko e fakamanamana mo e feinga ke ta'ofi 'a e kakai mei he'enau fili ki he'enau tau'ataina faka-Konisitutone 'oku foaki 'e he Kupu 8 'o e Konisitutone 'o e fonua.

"'Oku 'i ai 'a e ngaahi kaveinga mahu'inga ia 'oku tokanga kiai e KFFF ka 'oku 'ikai koe mole homau taimi ke tali ki he fa'ahinga polokalama fakakauleka 'a ia 'oku ne hulu'i mai pe 'a kinautolu 'oku falala kiai 'a e Palemia kenau fakalele 'a e Pule'anga mo e tukunga 'oku nau 'i ai 'a ia 'oku ne fakatupunga 'a e tohi tangi 'oku mau fakahoko", koe lau ia 'a Fuko.

'I he hoko atu 'a Fuko na'a ne pehe ai koe ngaahi polokalama 'a e KFFF 'oku nofo pe he issue mo e 'uhinga pea mo e fakamo'oni fakalao ka 'oku 'ikai ke tukuaki'i tavale mo 'ai'ainoa'ia pea 'oku 'i ai pe 'a e taimi 'oku feto'oaki ai 'emau lave ki he fika mo e hingoa ka koe kakano 'o 'emau ngaahi polokalama koe ngaahi me'a kuo fakamo'oni'i.

Na'e toe pehe foki 'e Fuko koe ongo tangata 'oku na fakahoko mai 'a e polokalama 'a Uata mo Piukala 'o fakafofonga'i mai a e Pule'anga koe ongo tangata ia 'oku kaunga lahi taha ki he ngaahi maumau 'oku longoa'a ai e fonua he ngaahi 'aho ni 'o hange ko hono tuli 'o e CEO 'a e Potungaue Ako koe 'ikai kene fakangofua 'a e Konituleki 'a Piukala, koe hopo 'a e Minisita Tu'i Uata 'oku lolotonga fakahoko 'i he Fakamaau'anga 'i hono vaha'a mo e Poate Taulanga, mo e mo'ua laukilu 'o e Kautaha Uata ki he Poate Taulanga mo e ngaahi tukuaki'i mamafa mo lahi kehe pe.

'I hano faka'eke'eke 'o William Clive Edwards na'a ne pehe ai koe 'uhinga ia 'o e 'ikai ke fie penolo 'a e KFFF mo e Palemia mo hono kau poupou he koe tu'unga pe 'ena 'o 'enau faka'uhinga mo e tu'unga faka-molale 'oku ho'ata mai 'i he polokalama 'a Uata mo Piukala 'a ia 'oku mole 'a e faka'apa'apa pea 'oku 'oku fu'u fakatamaikivale ia ke fakahoko ha polokalama mo kinautolu he 'oku nau fiema'u 'e he KFFF mo faka'amu ki he talanoa 'uhinga mo poini 'i he levolo palofesinale ka 'oku 'ikai koe fakamanamana mo e lau'ikovi'i.

"Ko e fakamanamana koe faka'ilonga ia 'o e maha 'a e kato 'okapau na'e 'i ai ha me'a ai pea iku ki hono faka'ai'ai 'a e kakai 'oku 'ikai kenau si'i maa'usia 'i he mahino mo e taukei kenau maumaulao pea nau iku ai ki he faingata'a", ko Edwards mai ia.

Na'e hoko atu 'a Edwards 'one pehe kuo maama 'a e kakai 'i he ngaahi 'aho ni pea 'oku tui 'a e tokolahi 'o kinautolu ki hono fakafepaki'i 'o e faihala 'o tatau ai pe pe koe fe 'a e fa'ahi 'oku nau tu'u kiai.

Na'e toe pehe 'e Edwards 'oku mahu'inga'ia 'a e KFFF 'i hono fakahoko atu 'a 'enau ngaahi polokalama 'i he 'uhinga mo e founga 'oku malohi mo fefeka ka 'oku taumu'a pe ki he melino mo e lelei fakalukufua ki he fonua.

"'Oku 'ikai kemau fie kau atu ki ha Pule'anga fakataimi kapau 'e fakahoko 'e he Tama Tu'i 'a 'emau fokotu'u 'i he tohi tangi pea koau mo Fuko 'e 'ikai tema toe kau ki ha fili Fale Alea ka 'oku mau tui 'oku totonu ke mau fai ha me'a he kuo lahi e faihala 'i he fonua pea koe founga maama 'oku mau fakahoko 'o fakatatau ki he Konisitutone mo e Lao pea mo e sio loloa ki he kaha'u", koe faka'osi mai ia 'a Edwards.

Na'e mahino pe foki mei he polokalama 'a Uata mo Piukala 'a e 'ikai malava 'a Vilisoni Tu'iniua ka koe poupou fefeka 'o e PTOA 'o muimui'i 'a e ngaahi 'isiu na'e talanoa ai 'a e ongo tangata pea iku 'o heva atu ia mei he laini.

'Oku lolotonga lele foki 'a hono tufaki 'o e tohi tangi pea fakatatau ki he fakamatala 'a Soane Fifita koe sekelitali 'o e KFFF 'oku ne pehe ai 'oku malie 'a e tohi tangi ia he 'oku tokanga pe 'a e kakai ki he faihala pea 'oku nau fiema'u ke fakangata. 

Kuo a'u foki ki he toko 7000 kuo nau 'osi fakamo'oni ki he tohi tangi ko'eni ka 'oku kei tanaki pe 'a e ngaahi fakamo'oni mei he tapa kehekehe 'o Tonga ni mo muli foki.