Kole Fakamolemole Palemia kia Stephen Edwards Featured
Palemia 'Akilisi Pohiva mo Stephen Edwards
2 Fepueli, 2019. Ko e me’a faka’ohovale ia ‘a e malava ke kole fakamolemole ‘a e Palemia ‘i he Letio ‘a ia ‘oku fakaofo ‘eni pea ‘oku mahino mai ‘oku ‘i ai ‘a e hoha’a ‘i he Palemia ki he taa’u ‘o e Politikale ‘i he fonua pehe ki he’ene hoha’a ki he nga’unu ‘a e tokolahi ‘o e kakai ‘o e fonua ke fakahoko ha ngaue ki he founga ‘oku tataki ‘aki hotau Pule’anga.
Ko e kole fakamolemole ‘eni ‘a e Palemia hili ha polokalama ‘a e Komiti Fakafonua ki hono Fakafepaki’i ‘o e Faihala (KFFF) na’e fakahoko ‘i he ngaahi letio ‘i Tonga ni ‘i he po’uli hifo ‘o e ‘aho Tu’apulelulu ‘o e uike ni pea na’e kau mai foki ‘a Stephen Edwards ‘i he polokalama ko’eni.
Na’e fakamahino ‘e Stephen Edwards ‘i he polokalama ko’eni na’e ‘ikai ke totongi ange kiate ia pe koha memipa ‘oha poate na’e kau ai ha pa’anga ‘e $60,000-00 koe dividend pe koe me’a’ofa ‘o hange koe tukuaki’i na’e fakahoko kiate ia ‘e he Palemia ‘i he taha ‘o ‘ene ngaahi polokalama mo ‘ene tangata fale’i Lopeti Senituli ‘i he Letio ‘i he konga kimu’a ‘o e uike.
Na’e tukuaki’i foki ‘e he Palemia na’e totongi ‘a e pa’anga ko’eni kia Edwards koe me’a’ofa pea na’e toe tukuaki’i foki ‘e he Palemia mo e ta’okete ‘o Stephen ko Clive Edwards pehe ki hono foha ko David Edwards.
Na’e kole fakamolemole ‘a e Palemia ‘i he ‘ene polokalama ‘i he efiafi ‘aneafi kia Stephen Edwards mo ‘ene fakaha na’e ‘ikai ke uhinga pehe ‘ene lea pea na’e fehalaaki pe ‘ene ma’u he na’e ‘ikai ke totongi ha pa’anga pehe kia Edwards.
‘I hano faka’eke’eke ‘o Stephen Edwards na’a ne pehe ai ‘oku ne fakame’apango’ia hono fakakau atu ia ‘i he tukuaki’i loi kuo fakahoko ‘e he Palemia he ko’ene taketi’i ‘a hono ta’okete Clive Edwards makatu’unga ‘i he’ene fakahoko hono fatongia fakalao ke fakafepaki’i ‘a e faihala ‘i he fonua.
“’Oku ou uesia pehe ki he famili Edwards ‘o kau ai ‘a e foha ‘o e Clive ko David mo kimautolu kotoa ka ko kimautolu ‘oku mau omi mo tupu hake he famili ngaue pe ‘a ia na’e talu pe mei he kuohili ‘emau ngaue’i ‘a e fonua ‘o a’u mai ki he ‘aho ni”, ko Stephen Edwards mai ia.
Na’e toe pehe foki ‘e Stephen Edwards ‘oku kei ‘ata pe ‘a e matapa ki hano ‘eke fakalao hono ongoongo pea ke fakatonutonu ‘a e fa’ahinga tapalasia ko’eni kuo fakahoko ki he kakai ‘o e fonua ‘o kau ai ia mo hono famili pea ‘oku ‘ikai koha me’a lelei ‘eni ia ke fou mai mei ha taki ‘oha fonua.
6 comments
-
Koe loii Moe fiema'u mafaii Koe fk'ilonga ia e mo'ui 'oku'ikai 'iai ha me'i 'ofa 'e taha pea kuo kakano e TA'E 'OFAA talu pe meihe 'ene ngaue fkpolitikalee 'o a'u Mai eni kihe 'aho ni
-
Fai mo toe faka'ilo atu foki e motu'a PM he ku sai'ia pe ia he toutou mo'ua he ngutu loi mo e ngutu lau hahahaaaaa
-
In God We Trust, Honestly is the best policy. ‘Ofa ki Tonga, ke moui ‘ae Tonga ‘ihe Tonga, pea ikai mate ‘ae’ Tonga ‘ihe Tonga.
-
Ko e me’a fa’iteliha pe ia ‘a Clive mo Steve pe ‘e faka’ilo pe ‘ikai! Manatau’i ko e ngaue fakalao ‘oku mole ai e taimi! Ka oku ikai ‘uhinga ia ke tu’u hake pe ha taha ‘o tukuaki’i mo lau’i kovi’i ha taha ‘aki ‘a e loii! Pea ka ‘ikai faka’ilo ‘oku kei loi pe ‘a e loi ia! Kapau ko ha fai ena ‘e ha palemia ‘i ha fonua sivilaise kuo fuoloa ‘ene fakafisi pe ko hono ‘akahi ki tu’a!
-
Koe ha oku ikai ke fkilo ai e Clive a Akilisi kihe fkongoongo kovii ho nau family name.
-
Na kuo kamata ke sio e PM ia ki hono tokoto'anga i Hetesi kuo malava ai ke kole fakamolemole. Ka ikai pe koe taha eni oe ngaahi pitoi loufusi Oku fakakakano aki e puaka tunu i he lolotonga hono tunu o moho pe pea li ki tu'a iooop