‘Oku mea’i nai ‘e he Sea 'o e Fale Alea hono fatongia? ^Featured

‘Oku faka’amu ‘a e kolomu ni ke fakahoko hano filihi pe koha vakai ki he fakamatala ‘a e Sea ‘o e Fale Alea Lord Fakafanua ki he ongoongo ‘a e Letio Nu’usila ‘i he uike ni ‘a ia na’a ne me’a ‘o pehe ko e “Faka’ilo Faka Fale koe talanoa pe”.

‘I he vakai ‘a e kolomu filihi koe taha ‘eni ha tali moha fakamatala fakavalevale mo’oni ‘oku ha’u mei he Sea ‘o e Fale Alea ‘a ia ‘oku ho’ata mei ai ‘a e ‘ikai ha taukei, fakapalataha, mo e ‘ikai kene mea’i hono fatongia totonu.

‘Oku ne feinga ‘a e Sea ke fanofano tokua he ko hono lakanga ‘oku tau’ataina koe Sea ia kae ngalo ange ai koe memipa mo ia ‘o e Fale Alea.

Ko e fatongia ‘o e Sea ke fakapapau’i ‘oku fakahoko ‘e he Fale Alea honau fatongia totonu ki he kakai pea moe fonua pea kene tu'utu'uni 'o fakatatau mo hono mafai pea fakapapau’i ‘oku ‘ikai hoko ‘a e faihala mo e ngaue ta’etotonu ‘aki ‘a e pa’anga mo e koloa ‘a e fonua.

‘Oku kau foki heni mo hono fakapapau’i ‘oku ‘ikai tuku fakatafa’aki ‘a e lao pea fakapapau’i foki ‘oku muimui ‘a e kau memipa kotoa ‘o kau ai mo e Sea ki he’enau fuakava na’e fakahoko ki he Fale Alea mo e fonua tenau tauhi 'a e Konisitutone moe lao ke ma'oni'oni.

‘Oku mahino mai ‘oku ‘ikai ke fakahoko ‘e he Sea ia hono fatongia pea ‘oku malava leva ‘i he anga hono filihi ke tau tala ‘oku ‘ikai poupou ia he fakahoko hano faka’ilo faka-Fale Alea ‘a e Palemia mo ‘ene kau Minisita neongo kuo ‘osi ‘i ai ‘a e fakamo’oni tatau mo fe’unga kuo tuku atu ki he Fale Alea hange koia na’e fakahu atu ‘i he Lipooti ‘a e ‘Atita.

‘E malava leva ‘i hano filihi ke toe fai ha fakakaukau ‘oku mo’ua nai ‘a e Sea ki he Palemia mo e Pule’anga ‘i ha fa’ahinga alea pe femahino’aki ‘o kau nai kiai mo hono fili ia kene hoko ki he lakanga Sea.

‘Oku ta’efe’unga ‘a e fakamatala ‘a e Sea ‘o e Fale Alea pea ‘oku mahino mai ‘oku ‘ikai pe ke loto ia kene fakamalohi’i ‘a e Hou’eiki Memipa ke fakahoko honau fatongia totonu pea me’angaue’aki ‘a e kau ngaue kuo teu’i mo e ngaahi me’angaue (resources) ‘a e Fale Alea ke fai ‘a e ngaue ko’eni he koe fatongia totonu ma’a e kakai.

‘Oku fokotu’u atu ‘e he Kolomu Filihi ki he Sea ‘o e Fale Alea ke loto lahi mu’a ‘o fakahoko hono fatongia pea ka ‘ikai pea fakafisi aa he ‘oku tokolahi pe ‘a e Hou’eiki ‘oku nau loto lahi ke fakahoko e fatongia na’a nau pole kiai.