'Oku 'ikai ko e lahi taha e tukuhau 'oku tanaki mei he masiva: Takihala'i ai pe 'e Tu'i Uata e fonua Featured
Tohi Ki he 'Etita
'Oku 'ikai ko e lahi taha e tukuhau 'oku tanaki mei he masiva: Takihala'i ai pe 'e Tu'i Uata e fonua
4 Tisema, 2018.
Tangata'eiki,
'Oku ou kole ke tu'u atu ho'o kolomu 'a 'eku tohi ni mo 'eku fakame'apango'ia 'i hono kei hokohoko atu 'a hono lohiaki'i mo takihala'i 'e he Minisita Leipa Tu'i Uata 'a e kakai 'o e fonua.
Na'a ku sio he Televisone he uike kuo 'osi 'a e lele mai 'ene polokalama 'i he Televisone Tonga mo e matapule ko Tevita Lautaha mei he Potungaue Leipa pea na'a ku fakatumutumu hono lohiaki'i pehe'i 'o e fonua.
Ko e polokalama ko'eni na'a ne fakamatala tokua ai koe lahi taha 'a e pa'anga tukuhau 'oku tanaki 'i he fonua koe ma'u mei he si'i kakai masiva 'oku nau si'i oo pe ki tahi mo 'uta pea ko 'enau fakatau tokua mei he ngaahi falekoloa 'oku tukuhau'i neongo ko e ki'i tuluta ka koe pa'anga lahi taha 'a e fonua 'oku ma'u meiate kinautolu.
'Oku mahu'inga pe 'a e tukuhau 'oku tanaki mei he si'i kakai masiva ka 'oku fiema'u ke fakatonutonu 'a e fa'ahinga takihala ko'eni he 'e ma'u hala ai 'a e kakai.
Ko e fa'ahinga takihala 'eni na'e ngaue 'aki mai 'e he ngahai fonua kominiusi 'a ia ko hono takihala'i 'a e kakai pea fokotu'u atu mo e ngaahi polopakanitaa pe faka'ai'ai fakapolitikale (propaganda) hange koia koe fa'ahinga fakanafala ko'eni 'a e Minisita na'e 'ikai fili 'e ha kakai ke fakatupunga mei ai hono ma'u e loto e kakai masiva mo faingata'a 'ia he 'oku nau tui ngofua ki he fa'ahinga loi ko'eni.
'Oku 'ikai ngata ai 'oku ne fakatupunga 'a e taufehi'a 'iate kinautolu ki he kakai 'oku ngaue malohi ange, ako lelei mo ma'u 'a e seniti honau nima, kau pisinisi pea 'oku ne fakatupunga 'a e mo'ui fakafalala, fakapikopiko mo e mohe misi tokua 'i he kakai faingata'a'ia mo masivesiva ange 'e to hifo ha tapuaki mei langi pea 'e tuputupulefonua pe kuo nau tu'umalie ta'e fakahoko ha ngaue.
'Oku malie pe foki he 'oku 'i ai pe 'a e kakai 'oku nau mahino'i koe loi 'eni mo e takihala ka 'oku malava ke tui ngofua 'a e tokolahi 'o e fonua 'a ia 'oku nau si'i mo'ui faingata'a 'ia pea toe masivesiva ange ki he fa'ahinga loi ko'eni.
'Oku totonu ke mahino ki he kakai 'o e fonua 'oku 'ikai tukuhau'i 'a e pa'anga 'oku ma'u 'ehe kau toutai mei he'enau toutai mo e pa'anga 'oku ma'u mei he fakamaketi 'a e kau ngoue 'oku tapui ia 'i he lao 'o e fonua ke tukuhau'i.
'Okuo toe mahu'inga foki ke 'ilo ko kinautolu pe 'oku 'ova 'a e pa'anga 'oku nau ma'u mei honau vahenga pe ko e pa'anga hu mai 'i he pa'anga 'e tahamano ($10,000) 'i he ta'u 'oku tukuhau'i pea koe si'isi'i hifo ai 'oku 'ikai ke tukuhau'i ia.
Ko e kau ma'u vahenga 'oku 'ova hake he pa'anga 'e tahamano ($10,000) 'oku tukuhau'i ia pea koe lahi ange 'a e vahenga koe lahi ange ia 'a e tukuhau.
'Oku ikai foki ke tukuhau'i 'a e kau ngaue he ngaahi siasi pehe ki he kau faifekau.
Ko hono mo'oni ko e pa'anga lahi taha 'oku ma'u 'i he fonua koe ma'u mei he tukuhau 'a e kau pisinisi 'a ia 'oku nau hu faka'aho mai 'a e ngaahi koloa mei Tu'apule'anga ki Tonga ni mo e ngaahi totongi tukuhau kehekehe 'i he levolo koia.
Ko e ma'u kau vahenga lalahi ko kinautolu 'oku lahi taha 'enau fakamole he fakatau he ngaahi falekoloa pea ko kinautolu 'oku tanaki lahi taha mei ai 'a e pa'anga tukuhau 'i he fakatau.
'Oku totonu ke 'uluaki totongi 'e he Minisita ia ko'eni hono mo'ua ki he Poate Taulanga he koe konga pe 'eni 'o e ngaahi tukuhau mo e ngaahi totongi kehe (fee) ke totongi kae 'oua 'e totongi 'a e ngaahi kautaha vaka kehe ia kae feinga holo ia ke tamate'i hono mo'ua pea hau leva ia ke lohiaki'i 'a e kakai tokua 'oku 'i ai 'ene ongo'i kinautolu.
'Oku fu'u fakatu'utamaki 'a e takihala'i pehe ni 'o e kakai pea 'oku toe fakame'apango'ia foki koe siosio pe 'a e 'ofisa ngaue ko'eni 'a e leipa 'i he polokalama ko'eni pea 'oku mahino ngofua pe taumaiaa 'e lava 'o lea neongo 'oku ne 'osi 'ilo pe 'a e mo'oni kae tukuange pe ke fai hono lohiaki'i 'a e fonua.
'Oku tau fakatauaange 'e 'aa a e si'i kakai ko'eni 'oku tala 'e he Minisita mohu fakamatala ni koe kakai masiva 'o 'ilo hono fakapulou'i kinautolu 'i he 'uhinga faka-kemipeini ke kei manakoa ai pe kinautolu pea puke e mafai ke fai 'aki hono faka'auha e koloa 'a e fonua.
Faka'apa'apa Atu,
Faka'ofa'ia
Hala Taufa'ahau
2 comments
-
'Oku 'ikai fai ha ofo ia he fakamatala 'a Uata he 'oku 'ikai kene 'ilo 'e ia 'a e founga ngaue 'a e Pue'anga moe founga 'a hono tanaki 'o e tukuhau. Koe me'a pe 'oku ne 'ilo koe fakamatala loi mo e kakaa.
-
This is the results when you pick people for their loyalty rather than their ability . INCOMPETENCY ! giving misleading information . A lot of what's happening in the world is caused through misleading and false information being feed to the population , which create panic and causes havoc to peoples lives . It can also be used as a weapon in that it could lead to the overthrow of a Government or a leader. Words are a powerful weapon , words can be uplifting, full of joy ,and love, or it can be threatening ,full of hate and terrifying . words fall on many ears , read by many eyes , and could spark actions that will add value to the world or set it a fire . As happened to Nukualofa when they burned it . Holding a doctorate degree does not make the holder a genius in the running of a Government not by a long shot . It's more important to love your country , respect your country men , be honest in ones dealing with others , and for Pete sake have some backbone and do the right .