Talangata’a ki he Fakamaau’anga Tohi Tangi ke fakafoki ‘a e $90 Miliona mei he Tongasat: Clive Edwards Featured
Kau poupou 'o e PTOA mo 'enau tohi tangi ke fakafoki mai 'a e $90 Miliona na'e totongi ki he Tongasat 'i he toumu'a 'o e Fale Alea 'o Tonga
18 'Okatopa, 2018. Kuo fakamahino ‘e William Clive Edwards koe loea mataotao mo taukei ‘i he fonua ki he ongoongo ni koe tohi tangi ‘a e kakai ki he Fale Alea na’e taki ‘e Siaosi Pohva mo e PTOA ke fakafoki ‘a e pa’anga ‘e 90 Miliona na’e totongi ki he Tongasat koe talangata’a ia ki he Fakamaau’anga (contempt of Court).
Na’e fakaha foki ‘e Edwards na’e osi ‘i ai ‘a e tu’utu’uni ‘a e Fakamaau’anga fekau’aki mo e pa’anga ko’eni na’e totongi ki he Tongasat ‘i he ‘aho 17 ‘o ‘Aokosi 2018 ‘o pehe ‘oku ta’efakalao ka na’e ‘ikai ha tu’utu’uni ‘a e Fakamaau’anga ke fakafoki ‘a e pa’anga ko’eni mei he Tongasat ki he Pule’anga.
Na’e fakamahino foki ‘e Edwards kuo ‘osi fakahu ‘a e tangi ‘a e Tongsat ia ki he Fakamaau’anga Tangi fekau’aki mo e tu’utu’uni ‘a e Tu’i Fakamaau Lahi ‘i he kamata’anga ‘o e uike ni pea ‘oku kau ai ‘enau fokotu’u atu ai ke toe fakahoko hano hopo’i fo’ou ‘o e keisi ko’eni.
Ko e hopo foki ‘eni ‘i he vaha’a ‘o ‘Akilisi Pohiva lolotonga ‘oku te’eki ke Palemia, Mele ‘Amanaki mo e PSA pea mo e Tongasat pea na’e tu’utu’uni fakamuimui kiai ‘a e Fakamaa’u’anga ‘i he ‘aho 17 ‘o ‘Aokosi 2018.
‘Oku mahino foki mei he fakamatala ia mei he Tafa’aki ‘a e Tongasat ‘a ia kuo ‘osi fakahu atu ‘enau tangi ‘oku nau ‘omai mo e ngaahi fakamo’oni na’e ‘ikai ‘ohake ia ‘e he tafa’aki ‘a e Pule’anga ‘o kau ai ‘a e fakamo’oni a e kau Minisita Pa’anga ‘e toko 3 ‘a ia ko Lord Matoto, Sunia Manu Fili mo Dr. ‘Aisake Valu Eke pehe ki he Kovana Malolo ‘o Pangike Pule Joyce Cocker ke fakamahino ko e pa’anga ko’eni na’e ‘omai mei he Pule’anga Siaina na’e fakataumu’a ki he Tongasat ka na’e fakafou mai ‘i he Pule’anga.
‘I he fakamatala ‘a Edwards ‘oku ‘ikai fiema’u ia ke toe fakahoko hano hopo’i fo’ou he ‘e makatu’unga pe ia ‘i ha tu’utu’uni ‘a e Fakamaau’anga Tangi pea kapau tenau tu’utu’uni aofangatuku ai pe kinautolu kiai pea ko’eni ‘osi ia.
‘I he lau ‘a Edwards, koe keisi ia ko’eni ‘oku te’eki ke ‘osi pea ‘oku ‘i he malumalu ia ‘o e Fakamaau’anga ‘a ia ‘oku ‘ikai ke ‘i ai ha mafai ia ‘o e Fale Alea kenau tu’utu’uni ki ha Tohi Tangi ‘oku oatu kiai lolotonga ‘oku ‘ikai hanau mafai kiai.
“‘Oku totonu ke tu’utu’uni a e kau ma’u mafai ki he talangata’a ko’eni ki he Fakamaau’anga ' e kau fa'u Tohi Tangi ko'enio he koe Tohi Tangi ko’eni oku mahino koe fai ‘i he ‘uhinga faka-politikale ke taki ‘a e tokanga ‘a e kakai mei he ngaahi ngaue hala ‘a e Pule’anga mo e PTOA ‘oku lolotonga tukuaki’i kiai kinautolu he ngaahi ‘aho ni”, ko e faka’osi mai ia ‘a Edwards.
2 comments
-
'Oku mahino mai ta koe 'uhinga 'ae temokalati kihe PM moe PTOA koe ta'efakalao, ta'e'atamai, ta'efakakaukau, ta'emahino, ta'emangoi, ta'eufi, ta'efieauna, ta'e'ofa, ta'eongo, ta'eloto, ta'emanonga, ta'ehounga, ta'e'a'apa moe ha fua 'aia 'oku tatau kotoa ia kihe ta'efaaktemokalati. 'Oku kei mo'oni pe 'ae folofola 'ae Tu'i ko Tupou 1 moe Palofita ko Hosea, Koe 'auha'anga 'ae kakai koe vale!!!
-
Mo'oni lahi koe 'uhinga pe ia 'o e tohi tangi ko 'eni ke kei pukepke 'aki pe 'enau kau poupou. Pea kapau ko ha taumu'a ke fakafoki mai a e $90 miliona mei he Tongasat pea 'oku mahino leva koe tohi tangi 'a e kau 'atamai vaivai.
'Okapau koe fatongia 'o e kau taki lotu ko hono afe'i e fanga sipi mei he ngutu 'o e tele'a, pea 'oku 'oatu 'a e kole....... koe taimi totonu 'eni ke fakahoko 'a e fatongia koia. Kole ke toloi atu hono malanga'i 'a e faikovi 'a e kau Falesi kae toutou malanga'i atu 'a e mole, 'ikai ha receipt, 'a e pa'anga tukuhau 'e $74 millions, etc. Koe faikovi 'ena 'oku hoko 'i he lolotonga ni. Ko 'ena kuo tukuaki'i 'e 'Alilisi kuo 'ikai ke mou toe poupou ange pea KUO TAIMI KE MOU AFE'I E KAKAI MEI A 'AKILISI KIA SIHOVA.