Kole ki he Sea Fale Alea ke fakahaofi e fonua ^Featured

'Etita,

'Oku ou fakahoko 'a e kole ni pea 'ofa 'e me'a mai kiai 'a e 'Eiki Sea 'o e Fale Alea 'o Tonga.

'Oku mo’oni 'a e fakalea hono fanongonongo si'etau ngaahi ‘apisia 'a ia 'oku fa'a fakalea 'o pehe "Tulou mo Houeiki kae 'ataa ke fakahoko atu si’oku apisia tu’a ni".

Ko e anga ia 'o e matu'aki kole ki he Sea 'o e Fale Alea ke 'oua mu'a ‘e toe tuku mo faka'ataa ke fakahoko 'a e founga tatau ke taki hala’i aki 'a e fonua 'i he taimi ki he taimi hange koia 'oku toutou hoko.

'Oku ou fokotu'u atu atu kihe Sea e Fale Alea kapau oku ne mea'i papau ‘e ikai lava 'e he Fale Alea 'o fakahoko hono fatongia totonu fekau’aki mo e ongo kaveinga ko'eni:

1. Lipooti Atita

2. Lipooti Atita fekau’aki mo e Tohi Tangi mei he kakai

Pea 'oku totonu leva ke fakahoko fakavave ha ngaue fakamatoato kiai. Ko ‘ene tu’u he taimi 'oku mahu'inga ke malu'i 'a e fonua pea ke ’oua 'e toe toloi ‘a e Fale Alea 'i ha fa’ahinga ‘uhinga maumau taimi.

Fakamolemole pe ka koe founga totonu pe ke fakahoko ko ho'o me'a  atu ‘o fai mo momoi atu 'a e Fale Alea fakataha mo e Pule’anga kihe mafai 'o ‘Ene 'Afio ke fakahaofi 'aki e fonua mei ha toe maumau mo e ngaahi tu'utamaki 'oku hanga mei mu'a.

'Eiki pe mu'a pea fakamolemole'i ange 'a e motu'a ni ka kuo taimi ke fai mo fakangata e hia koe “Pule Kovi” ‘i Tonga ‘o fakatatau ki he Konisitutone 'o e fonua lolotonga 'oku kei laumalie.

Kuo ‘osi mahino faufaua e tukunga e Pule’anga ia ko 'eni 'i he lea mo e ngaue pea ko e 'etau "tataka mo e VALE ‘e ‘i ai pe hono ngata’anga".

Famanatu atu kapau oku te’eki mea'i 'e he feitu’u na kae faka’ataa mai mu’a e motu’a ni keu ngutu tamulea “KOE MAFAI PE 'ENA' E TAHA OKU KEI TOE MA’AU” pea ke ngaue 'aonga 'aki ia 'i ho’o kei ma’u.

Ko e anga pe si’ete muna noa ma’ae fonua oku taku koe SIUELI E PASIFIKI pea koe laukau’anga hotau potutahi, neongo 'ene kehekehe faka-matakali.

Faka’apa’apa atu mo e 'Ofa ki Tonga

Inoke Fotu Huakau