‘Eke fakalao ‘e Paula Tupou hono tuku ia ki tu’a mei he Komisoni ‘Uhila Featured
30 'Aokosi, 2018. ‘Oku lolotonga ngaue atu ‘a Paula Tupou ko e taha ‘o e kau komisiona mo CEO le’ole’o malolo ‘a e Komisoni ‘Uhila ‘a Tonga (Tonga Electrical Commission) ke ‘eke fakalao hono tuku ia ki tu’a mei he lakanga CEO fakataimi ‘a e Komisoni.
Na’e hu foki ‘a Paula Tupou ‘o hoko koe taha ‘o e kau Komisiona ‘a e Komisoni ‘Uhila ‘a Tonga pea fokotu’u foki ia ki he lakanga koe CEO le’ole’o ‘a e Komisoni ‘o fetongi ‘a Lord Dalgety ‘i he mahina ko ‘Okatopa 2017.
Na’e kau foki ‘a Paula Tupou ‘i he le’o lahi ‘‘i hono teke ke fakahoko ha ngaue fakalelei ki he Komisoni ‘Uhila ‘a Tonga pehe ki he CEO he taimi koia ko Lord Dalgety pea tukuaki’i foki ki he ngaahi faihala kehekehe.
Na’e hu mo Senimili Tui’onetoa ‘i he mahina ko ‘Okatopa 2017 ‘o hoko koe Komisiona ‘i he Komisoni ‘Uhila ‘a Tonga pea na’e lahi ‘a e laaulea kiai ‘a e fonua tautautefito ki he hu ko'eni 'a Senimili he ‘oku ‘ofefine ‘aki pe ia ‘e he Minisita Pa’anga Pohiva Tui’onetoa ‘a ia ‘oku ‘i ai ‘a e mafai ke fokotu’u ‘a e kau Komisiona.
Na’e fakataha leva ‘a e Poate ‘a e Komisoni ‘i he ‘aho 17 ‘o ‘Okatopa 2017 ‘o fakapaasi ke fakamalolo’i ‘a Lord Dalgety mei he lakanga CEO ‘a e Komisoni pea ke hoko hake ‘a Paula Tupou ‘o le’ole’o ‘i he lakanga ka e kamata mei he faka’osinga ‘o Ma’asi 2018.
Na’e iku ke fakafisi ‘a Lord Dalgety 'i he'ene ta'efiemalie ki he nga'unu ko'eni pea hoko hake ai pe ‘a e Paula ‘i ‘Okatopa 2017 ‘o le’ole’o ‘i he lakanga CEO ‘a e Komisoni.
Na’e toe fokotu’u foki ‘a Senimili Tui’onetoa Fonua kene hoko koe Sekelitali ‘a e Komisoni ‘i he fakataha tatau.
Na’e ‘ikai ke fuoloa ‘a e lele mai ko’eni ‘a e Komisoni kuo kamata ke hoko ‘a e fehulunaki ‘i he va ‘o Paula Tupou mo Senimili Fonua pea iku ki hono tukuaki’i ‘e Paula Tupou ‘oku kaunga kau ‘a Seinimili mo e Minisita ‘i hono fakafaingata’a’ia’i ‘ene ngaue.
‘Oku kau ‘i he tukuaki’i ko’eni ‘a pehe 'oku fakahoko ‘a e ngaahi ngaue hala ‘i he Komisoni ‘o kau ai hono liliu ‘a e miniti ‘o e fakataha ‘a e Komisoni fekau’aki mo e ngaahi tu’utu’uni kia Paula kene fakahoko ka na’e ‘ikai fakapaasi ‘i he fakataha pehe ki he tukuaki’i ‘e Paula ‘oku fakafamili’i ‘e Seinimili mo e Minisita ‘a hono fakelele ‘a e ngaue ‘a e Komisoni.
Na’e fakalalahi ‘a e va ko’eni ‘o ‘iku faka’ilo ai ‘e Senimili Fonua ‘a Paula Tupou ki he Fakamaau’anga fekau’aki mo e fakamoveuveu mo e fakamanamana pehe ki he ‘ulungaanga ta’e taau ‘i he mahina ko Siulai.
Ko e ngaahi fakamoveuveu ‘a Paula Tupou na’e tukuaki’i kiai ko’ene tala ki he kau Komisiona ke ‘oua tenau fanongo kia Senimili he ‘oku vale pea na’a ne fakahoko ‘a e pango 'i he Fale Alea.
Na’e kau atu foki kiai ‘a e lea ‘a Paula Tupou ‘o pehe ‘oku toe si’i pea ne ‘ave ‘a e ngaahi me’a kia Lord Dalgety kanau sio kiai.
‘Oku pehe foki 'e Seinimili ia ko hono fakahoko ‘e Paula Tupou ‘a e ngaahi lea ko’eni makatu’unga ‘i he ‘ikai kene fiemalie ki hono toe tu’uaki ‘a e lakanga CEO lolotonga ‘oku kei le’ole’o ai.
Na’e iku foki ki he fakafisi ‘a Senimili mei hono lakanga ‘i he Komisoni ‘i he’ene loto pe ‘a ‘ana ke fakafisi ‘i he mahina pe kuo tau situa kiai.
Na’e fakahoko foki ha tohi mei he Sea ‘o e Komisoni ‘Uhila ‘i he ‘aho 24 ‘o e mahina ni ‘o fakahoko kia Paula Tupou ‘a hono fakamalolo’i ia mei he’ene le’ole’o ‘i he lakanga CEO ‘a e Komisoni ‘o makatu’unga ‘i he ‘ikai ke fe’unga ‘ene fua fatongia ‘o fakatatau mo e ‘amanaki ‘a e Komisoni.
Kaikehe ‘i he’ene a’u mai ki he ngaahi ‘aho ni kuo fakahoko ‘e Paula Tupou ha ngaue ke fakahoko ha fakatonutonu fakalao makatu’unga ‘i he’ene ta’efiemalie ki hono tuku ia ki tu’a mei he lakanga.
‘Oku tui ‘a Paula ko e ngaahi fatongia na’e tuku ange kiai kene fakahoko na’e ‘ikai ke paasi ia he fakataha ‘a e Komisoni ka na’e liliu ‘e Senimili mo e Minista ‘a e miniti ‘o e fakataha ko’eni 'o iku ki hono toe tanaki atu 'a e ngaahi fatongia 'oku 'ikai totonu ia kene fakahoko pea iku tukuaki'i ia kiai.
Na’e toe fakahu atu pe foki ‘e Paula Tupou ha’ane launga ki he ‘ofisi ‘o e Ombudsman fekau’aki moe kaveinga ni.
‘Oku te’eki foki ke mahino ha tu’utu’uni ‘a e Fakamaau’anga ki hono faka’ilo ko’eni ‘e Senimili ‘a Paula Tupou ki he anga ta’etaau pehe kiha aofangatuku mei he Ombudsman ka ‘oku lolotonga fakahoko pe foki he taimi tatau mo e ngaue ‘a e fakafofongalao ‘a Paula ke fakahoko ‘ene ‘eke ki he maumau mo e tu’unga ta’efakalao hono tuku ia ki tu’a ‘i he Fakamaau’anga.
Ko e kaveinga 'eni na'e lahi 'a e laaulea kiai 'a e fonua pea 'oku lahi foki hono talanga'i 'i he mitia.
4 comments
-
Mark Hansen ..ko e 'uhinga e fa'ahinga fili peheni he 'oku 'ikai ke kehekehe ia mo e criteria ki he fili Fale Alea,..ko e mahino pe 'oku 'ikai ke ke vale/faha pea 'oku 'ata leva ko e ke ke kanititeiti....ka 'oku hangehange 'oku li'aki e fo'i criteria koeni he 'oku ki'i tokolahi e kautama ia kuo nau to ki loto....haha
-
Kou faka'of'a'ia pe au he ongo Pule Fakavahe na'e fili atu 'e Pohiva ki he Komisoni, ha'ana si'i siosio noa pe he fakataha. Pea ka 'oatu ha ngaah pepa fakalao pe fakatekinikale pe faka-management ke fai kiai ha tu'utu'uni 'ae Komisoni, te na si'i fefe nai? Moe ke mama'i ha siolalo kihe ongo tangata ni, ka 'oku 'ikai ko ha fakataha'anga eni ke fili mai kiai ha kau pule fakavahe pe 'ofisa kolo. Mahalo na'a ngali sai ange pe kapau koe fili mai ki he Poate, ka koe me'a ki he Komisoni, fu'u fiem'au e kakai ako mo taukei he ngaahi mala'e fekau'aki moe ngaue 'ae Komisoni. Ka 'oku ha mahino mai heni hono kemipeini 'aki 'e Pohiva e ngaahi sino ngaue 'ae pule'anga.
-
When will this shenanigan stop ? Why sack just one person ? Sack the damned lot including the chairman who's a BURKE Blatant Nepotism ! and the sly remarks , counter accusations and court cases are in full swing . When will this demoralizing snide innuendo that's going on within Government departments STOP ? One would think that as a nation Tonga is able to handle and sort out her workplace problems , without reverting to childish behavior . These internal bickering will not cease , whilst the central Government is struggling with problems of its own . It's plane to see that we as a people cannot function without the helping hands of expatriate workers , as advisers to heads of departments . What a pity we are unable to work together for the common good of all., instead of selfishly giving jobs specifically to family members . Maybe its time for a change ??? .
-
'E 'ikai tanu 'e taha 'a e mo'oni mo e totonu. 'Oku te'eki fuoloa 'a 'etau fanongo ko ia ki he ngaahi tukuaki'i 'o e kakai na'e fai 'e Seinimili mo Paula he taimi kemipeini. Ka ko e ha kuo nau toe movete ai. 'Ikai na'e 'ikai 'i ai ha makatu'unga lelei 'enau me'a na'e tala ki he kakai ka ko e loi pe mo e faasitu'u.
Fai mo ke tala 'e koe Paula ho'omou fo'i loi na'e fai kia Dalgety.