Mo'oni pe hono fehu'ia 'o e Sea Poate Letio Tonga ^Featured

‘Etita,

Kataki ka e tu’u atu ‘eku tohi ni ‘i ho’o kolomu. ‘Etita na’a ku fehu’ia ‘a hono toutou ‘ohake ‘a e ta'efiemalie fekau'aki mo e Sea Poate Letio Tonga ‘i he kolomu ni pea ko’ene toki mahino ‘eni kiate au pea 'oku ou fakamo'oni 'oku mo'oni pe hono fehu'ia 'o e matapule ni.

Ko e taha e ngaahi fale’i mahu’inga ‘oku fa’a fai ki ha kau pule pe kakai ‘i ha lakanga taki ‘oku pehe ni “Ka ‘eke atu ha fehu’i ‘oku ‘ikai teke ‘ilo ha me’a ki ai pea ‘oua te ke tali” ‘Oku ‘uhinga ‘eni ke malu’i ‘a e taki koia he ‘e toe ngali vale ange ia he taimi tene folahi atu ai ‘e ia ia.

Ko e me’a ‘eni na’e hoko he pongipongi ‘aneafi Tusite 28 ‘Akosi 'i hono faka’eke’eke ‘e Luseane Luani ‘i he Letio 87.5 koe faiongoongo he ngaahi ta’u lahi ‘i he Letio Tonga ‘a Leonaitasi Hoponoa koe Sea Poate he Komisoni Fakamafola Lea 'a Tonga he ngaahi lau mahina pe, pea hu lalo uaea mo ‘ikai ha taukei fakamafola lea.

Na'e a’u 'a e fehu’i ‘a Luseane fekau’aki mo e folau ‘a e Sea mo e pule ki Nu’usila pehe ki he taumu’a ‘a e Komisoni. Koe tali ne fai ‘e Leonaitasi ‘oku ne folahi mai ai ‘oku hala ha’ane ‘ilo ki he me’a ‘oku talanoa ki ai pea ‘ilonga ai ‘oku pule’i ia mei he feitu’u kehe.

Toe holi ia ke tukuhifo mo e kau pule he Fakamafolalea he kuohili mo ‘enau kau ngaue he lea vale ‘a e siana ‘ene pehe koe feinga ke hiki’i hake tokua ‘a e tu’unga fakamafolalea he na'e te’eki ai ke a’u ia ki ai 'i he kuohili pea na'a ne ngaue’aki 'a e fo’i lea koe feinga ke “accredited” ‘a e letio mo e televisione ke tatau moe tu’unga ‘o e ngaahi letio ‘i muli.

Kiate au ko ‘eku toki fakamahino mo’oni ‘eni ‘a e me’a na’e tohi kiai ‘a ‘Eliesa Fifita 'i ho'o kolomuni  'i he ngaai uike atu pehe ki he feisibook ‘a e ‘ikai ha taukei ‘a e matapule ni tapu ange pe mo ia pea ‘ikai kene lava ‘o tali ‘a e fehu’i a Luseane Luani.

Ko e “accredited” koeha? koha ‘apiako,? ke tali kae toki fakatokanga’i ‘enau polokalama ako? Ko e fakamafolalea ‘oku ‘i ai ‘a e ngaahi me’a ‘oku pau ke faipau ia ki ai he ‘oku ‘ikai fiema’u ia ke tatau ha letio pe televisone.

‘Oku ‘i ai ‘a e me’a koe Broadcasting Standard ‘oku ngaue’aki ‘e he ngaahi fonua lahi ke pukepuke’aki e tu’unga ‘o e ngaahi ngaue fakamafola lea pea ‘i Tonga ni ‘oku ‘i ai e Broadcasting Act pe koe Lao Fakamafolalea.

‘Oku ‘i ai leva moe me’a koe ‘efika ‘oku muimui kiai e ngaahi kautaha fakamafola lea neongo ‘oku ‘ikai ke malohi ‘i Tonga ni ke hange ko tu’apule’anga.

‘Oku fehu’ia lahi ‘a e ‘ikai ha ‘ilo ‘a Hoponoa ki he ngaahi me’a ni pea 'e malava pe ke mo'oni pe 'a Hoponoa ia pe koe ha na'e fili mai ia ki he lakanga ni lolotonga 'oku 'ikai ha'ane taukei.

Na’a ne toe pehe foki ‘e hu mai mo e Poate ‘o kau ‘i hono fakalele ‘a e Letio pe koe operation ‘a ia koe feinga fakatonuhia ki he’ene hopohopo no’ia holo ‘a ia ‘oku fepaki ‘eni ia mo e lao ki he ngaahi Poate 'a e Pule'anga pehe ki he ngaahi tu’utu’uni ngaue ‘a e Komisoni.

‘Oku toe fehu’i pe foki kiai pe na’a ‘oku ‘i ai ha ki’i ‘apiako fakamafola lea ia ‘oku ‘ilo ia kiai ‘oku nau seti ‘a e tu’unga (standard) ‘a ‘ena ‘oku si’i ‘uhinga mai kiai.

‘Oku ou kau fakataha moe ngaahi tohi ki mu’a he kole fakamamate kia Hoponoa ke ‘ofa mai aa ‘o tuku ho’o hopohopo no’ia holo he ngaahi siakale kehe mo hono toe ‘ilo lahia ho’o to nounou mo hono pule’i’aki koe ‘a e ki’i tuaine.

Faka’apa’apa Atu,

ZCO Tutuku

Nuku'alofa