Vakai ki he hopo ‘a ‘Akilisi Pohiva, PSA mo e Tongasat? ^Featured

‘Oku faka’amu ‘a e kolomu filihi ke fakahoko ha vakai pe ko hano filihi tau’ataina 'a e tu’unga ‘o e hopo ‘i he vaha’a ‘o ‘Akilisi Pohiva, Mele ‘Amanaki mo e PSA mo e Tongasat pe koe ha hono 'aonga mo hono lelei ki he fonua.

Ko hono faka’ilo ‘o e Tongsat na’e fakataumu’a ke fakafoki ‘a e pa’anga na’e totongi kiai ‘o fakatatau mo e aleapau mo e ngaue na’e fai ‘e he Tongsat ‘i honov va mo e kautaha ‘i Siaina.

Ko e ngaue foki ‘eni fekau’aki mo e ngaahi tu’unga satelaite na’e faile mo lisi ‘e he Tongasat pea alea’i ke fakatau mo lisi ki he kautaha Siaina ‘a e tu’u’anga 130 Degree East.

Na’e ha lelei foki ‘eni ‘i he aleapau ‘a e Pule’anga mo e Tongsat ‘i he taimi na’e fakafoki ai ‘a e Agency pea kaniseli ai hano toe fakafofonga’i ‘e he Pule’anga Tonga ‘a e Tongasat fekau’aki mo e ngaahi tu’u’anga satelaite.

Na’e tu’u ‘i he aleapau ‘a e mo’ua ‘a e kautaha Siaina ki he Tongasat koe sino’i pa’anga na'e lau miliona pea na’e fakafou mai ‘i he Pule’anga pea tu’unga ai hono tu’utu’uni ‘e he Fakataha Tokoni ke totongi ‘e he Pule’anga ‘o Feleti Sevele ‘a e ‘inasi ‘o e Tongasat.

Ko e tu’utu’uni ko’eni ‘a e Fakataha Tokoni mo e Pule’anga ‘o Feleti Sevele na’e toki fakahoko ia ‘i he ta’u 2011 ‘i he taimi na’e Palemia ai ‘a Lord Tu’ivakano.

Na’e fakamo’oni ‘a Lord Tu’ivakano na’e fakahoko pe ‘a e tu’utu’uni na’e ‘osi fekau kimu’a fekau’aki mo e pa’anga pea na’e ‘ikai toe liliu ‘e he Pule’anga ‘o Tu’ivakano ‘a e tu’utu’uni ‘a e Fakataha Tokoni ki mu’a.

‘I he tu’unga ‘o e ‘atakai fekau’aki mo e pa’anga na’e ‘omai na’e ‘ikai ke fakahu ia ‘i ha patiseti ‘a e Pule’anga he koe pa’anga na’e fakataumu’a ke totongi ki he Tongasat pea ‘oku ha pe foki ‘eni he tu’utu’uni ‘o e hopo ni.

‘Oku toe ha pe foki ‘i he tu’utu’uni ‘a e Tu’i Fakamaau Lahi ‘i he hopo ni ko hono foaki ‘a e pa’anga ki he Tongsat koe me’a ‘ata’ataa pe ia ‘a Pule’anga.

‘I hono filihi ‘e he kolomu ni, ‘e lau pe koha pa’anga ‘a e Pule’anga ‘okapau na’e fakakau ‘a e pa’anga koia ‘i he patiseti pea toki lau leva koe public fund.

‘Oku mahu’inga ‘a e poini ko’eni ‘i he’etau filihi tau’ataina ki he tu’utu’uni ‘o e hopo ko’eni.

Ko e ola ‘o e tu’utu’uni ‘oku pehe na’e totonu ke fakapaasi mei Fale Alea ‘oku mahino pe ia ka ‘i he filihi ‘a e kolomu ni na’e ‘ikai koha public fund ‘eni ke ‘ave ki he Fale Alea pea koe tu’unga ia ‘o e fale’i fakalao na’e fai ki he Pule’anga ‘o Tu’ivakano.

Ka neongo ia ‘oku aofangatuku ‘a e tu’utu’uni ‘a e Tu’i Fakamaau Lahi tukukehe kapau ‘e toe fai ha tangi ‘a e Pule’anga fekau’aki mo e tu’utu’uni ko’eni he ‘oku ‘ata pe ‘i he lao.

Ko e faka’ilo ‘o e Tongasat ke totongi fakafoki ‘a e pa’anga na’e totongi kiai na’e ‘ikai ha tu’utu’uni pehe pe ‘e tali ‘a e kole ‘a e Kau Talatalaaki.

Na’e fakamahino e he Tu’i Fakamaau Lahi ‘oku ‘ikai ha tu’unga fakalao (standing) ‘e taha ‘a e Talatalaaki ‘a ia ko ‘Akilisi Pohiva, Mele ‘Amanaki mo e PSA ke fakahoko ha ‘eke pehe ni.

‘I he tu’u fakahopo ‘oku mahu’ing foki ke fehu’i pe kohai ‘oku malohi? Ko ‘Akisili mo Mele ‘Amanaki pe koe Tongsat?

‘I he hono filihi ‘o e kaveinga ni ko e hopo ta’e’aonga mo maumau taimi lahi ‘eni he ‘oku mole ‘a e laukilu ‘a e pa’anga ‘a e fonua ke fakahoko ha hopo ‘oku ‘ikai ha ola ‘o hange ko ‘enau faka’amu ke totongi fakafoki mai ‘a e pa’anga.

Ko e hopo faka-Politikale ‘eni pea ‘oku toe fehu’ia pe koe ha hono ‘aonga ki he fonua.?

Ko e tali mahino kiai koe mole ‘a e pa’anga tukuhau mo e taimi ‘i he fieha mo e feinga ke ongoongoa ‘i he makatu’unga ta’e’uhinga.

‘Oku mahu’inga ketau fakatokanga’i ange ‘a e ngaahi fakamole pa’anga ‘oku fakahoko ‘e he kau Talatalaaki pehe ki honau kau poupou ‘i he puipuitu’a ‘oku fehu’ia hono ‘aonga ki he fonua.

Ko e ‘u fakamole ki he hopo ko’eni ‘oku lau kilu pea ‘oku ‘i ai ‘a e tui na’e mei ‘aonga ‘a e pa’anga ki he kakai mo fokotu’u ha me’a ‘e ma’u ai ha lelei kae mohetolo atu ‘a e feinga sauni faka-Politikale ‘i he founga ke takihala’i ‘a e kakai mo kumi ongoongo ai.

‘Oku fakatupu loto mamahi foki hono maumau’i ‘a e pa’anga ‘a e kakai mo e fonua ‘i he tuli tevolo he ko hono iku’anga ko e totongi ‘e he Pule’anga ‘a kau loea mo e ngaahi fakamole ‘a e Fakamaau’anga ‘a ia ‘oku iku fua pe ‘e he kakai ‘o e fonua ‘oku nau totongi tukuhau.

‘Oku fakamahino ‘e he kolomu ni ‘oku ‘ikai ko hano fakaaanga’i ‘eni ia ‘o e tu’utu’uni ‘a e Fakamaau’anga he ‘oku aofangatuku pea ‘oku tau tali ka ‘oku mahu’inga pe ‘oatu tau’ataina pe ‘a hono filihi mo e vakai ki he tu’unga ‘o e hopo ko’eni pea tau ako mei ai.

Ko e tu’utu’uni ‘a e Fakamaau’anga ‘oku ma’u ai ‘a e fakamaau totonu (Justice) ki he ngaahi tafa’aki ‘o tatau ki he Tongsat, Pule’anga mo e ongo Talatalaaki pea ‘oku fakahoko lelei ‘e he Fakamaau’anga hono fatongia ki he kakai ‘o e fonua mo e fonua foki.