Ngali ‘oku poupou ‘a e Pule’anga ia ki he faito’o konatapu? ^Featured

Kuo faka-paasi ‘e he Fale Alea ‘a e patiseti ‘a e fonua ki he ta’u fakapa’anga 2018/2019 pea ‘oku ‘i ‘a e ‘isiu ‘oku to’o mai ‘e he Kolomu Filihi ke fai hano filihi pe ko hano vakai’i he ‘oku mafatukituki pea ‘oku ‘ikai ke fu’u ‘uhinga lelei ‘eni ki he tokolahi ‘o e kakai o e fonua ‘a hono tukunga.

‘Oku mahino foki ‘oku kau ‘a e faito’o konatapu mo hono nunu’a ‘i he kaveinga ‘oku tokangaekina lahi ‘i he ngaahi ‘aho ni pea koe fu’u peau ‘oku fakalilifu pea ko hono ola ‘oku fakatu’utamaki fau ki he fonua.

Kuo kamata ‘asi hono nunu’a ‘i he to’utupu pea ko e lekooti ‘o e faihia koe lahi ai ‘oku fekau’aki tonu mo hono fetuku holo ‘o e faito’o konatapu pehe ki hono ngaue’aki.

‘Oku toe ‘i ai mo e lipooti ‘a e Va’a faka-‘atamai ‘a e Falemahaki Vaiola ‘oku mahino mei ai koe tokolahi taha ‘o e kau mahaki kuo fakahu ange ‘oku nau mo’ua ‘i he palopalema faka-‘atamai ‘oku fekau’aki tonu ia mo e faito’o konatapu.

Ko e kaveinga pelepelengesi ‘eni ki he fonua pea ‘oku ‘ikai ke meimei hala ha uike ‘a hono ma’u mo puke ‘e he kau polisi ‘a kinautolu ‘oku nau fetuku holo ‘a e faito’o konatapu kae tautautefito ki he kalasi ‘oku ui koe ‘aisi (ice).

‘Oku mahino koe pa’anga lahi faka’ulia ‘oku ma’u mei hono fetuku holo ‘a e faito’o ni pea ‘oku hanga ‘e he kakai siokita ko’eni ‘o kalusefai ‘a e fonua mo hono kakai, ‘ene malu mo hono kaha’u ki he’enau lelei fakafo’ituitui.

‘Oku hoha’a lahi ‘a e Kolomu Filihi ki hono ‘ikai tali ‘e he Pule’anga ‘a e fokotuu mei he Komiti Tu’uma’u ‘a e Fale Alea ki he Pa’anga ke fakalahi ‘a e patiseti ‘a e Potungaue Polisi mo e Potungaue Kasitomu ke tokoni ki hono tau’i ‘o e faito’o konatapu.

‘Oku mahino foki na’e fale’i ‘a e Komiti Tuuma’u ki he Pa’anga ‘a e Fale Alea ‘e he tokolahi ‘o e kau CEO ‘a e ngaahi Potungaue he ‘oku fu’u fiema’u ke fakahoko hono tau’i ‘a e faingata’a ‘oku hake ‘uta hotau ki’i fonua koe faito’o konatapu.

Na’e paloti foki ‘a e tepile ia ‘a e Pule’anga ke ‘oua ‘e tali ‘eni ‘a ia koe me’a ‘oku fai hono filihi pe ‘oku poupou nai ‘a e Pule'anga ia ki hono fetuku holo mo hono ngaue’aki ‘a e faito’o konatapu.?

‘Oku toe fai hono filihi ‘a e me’a ‘a e Palemia mo e Minisita Polisi kimu’a ‘o pehe ‘oku nau ‘ilo ‘a e kakai ‘oku nau fetuku holo ‘a e faito’o konatapu ka ‘oku ‘ikai hanau mafai ke fakahoko ha ngaue kiai.

Ko e fehu’i ‘oku muimui mai heni ‘i hono filihi pe ‘oku kei longo ‘a e Palemia, Minisita Polisi mo e Pule’anga ‘o ‘ikai ke tala ‘a e kakai ko’eni he ‘oku nau fengaue’aki nai ki hono fetuku holo ‘o e faito’o konatapu.?

‘Oku ‘i ai nai ha kakai ‘i he kau poupou ‘o e Palemia mo e Pule’anga ‘a ia ‘oku huluni ai ‘a e kau Kolisi Tutuku ‘o Tolitoli ‘oku nau fakahoko ‘a e ngaue pango ko’eni?.

‘Oku mahino pe ‘a e vaa ia ‘o e Minisita Polisi mo e Komisiona Polisi mo e feinga na’e fakahoko ‘e he Minisita mo e Pule’anga ke fakamalolo’i ‘a e Komisiona ka ‘oku ‘i ai nai ha kaunga ki heni ‘a e ‘ikai loto ‘a e Pule’anga ke tau’i e faito’o konatapu kae ‘atakovi ai ‘a e Komisiona.?

Ko e ngaahi fehu’i ‘eni ‘oku fai hono filihi pea ‘oku fu’u mahu’inga ke sio lelei kiai ‘a e kakai ‘o e fonua he koe faito’o konatapu koe taha ia he palopalema vivili taha mo fakailifia taha ‘i he fonua ka ‘oku hange ‘oku siosio kehe mei heni ‘a e Pule’anga ia.

‘Oku ‘ikai ha ‘uhinga malohi ‘oku tuku mai ‘e he tepile ‘a e Pule’anga neongo 'enau ngaahi taukave he ‘oku ho'ata mai mai ‘i he anga hono filihi ‘o e kaveinga ni ‘a e ‘asenita ‘oku nofo mai mo e Pule’anga 'a ia 'oku hange 'oku nau fakamu'omu'a 'a e politikale 'i he lelei 'a e fonua.

‘Oku ‘ikai ke hala ha uike hono puke ‘e he kau polisi ‘a e kakai 'oku nau fetuku holo mo ngaueaki ‘a e faito’o konatapu ‘a ia koe lesoni ia kuo mahino pea koe tahi 'oku hu'a mai.

Kaikehe ‘oku malie ‘a e malava ke foaki ‘e he Palemia mo e Pule’anga ‘a e pa’anga 'e laukilu pea 'oku kei hokohoko atu pe 'a e tuli tevolo mo hono faka-pa'anga ke fakatotolo'i 'aki 'a e paasipooti ‘oku ‘ikai mahino kae tuku 'a e faito’o konatapu ia ‘oku mate fakauike ai hotau kakai, lahi ai 'a e faihia, pea ‘auhia ai ‘etau fanau.