Kakano ‘aki ‘e he Taki ‘a e loi mo e fa’u ^Featured

12 Sune, 2018.

‘Etita,

Na’a ku toki ma’u ‘a e faingamaie keu lau ‘a e tu’utu’uni ‘i he hopo ‘i he vaha’a ‘o William Clive Edwards pea mo Samuela ‘Akilisi Pohiva, Laucala Tapueluleu, Mateni Tapueluelu mo e Kele’a.

‘I he'ene pehe ‘oku ou fie vahevahe atu ‘a e ngahai mooni’i me’a ko’eni he na’a ku ‘i ai tonu he hopo ko’eni pea oku ou fiefia kuo a’usia ‘a e fakamaau totonu he na'a ku fakatumutumu he me'a koe loi moe fa'u.

Na’e hanga ‘e he Fakamaau’anga Polisi ‘o tukuange ‘a e kau Faka’iloa ‘i he ta’u 2012 hili ia ;enau pulusi 'i he Nusipepa Kele'a ko "William Clive Edwards koe toitoi'anga 'o e kau faihia" kae tu’utu’uni ‘e he Tu’i Fakamaau Lahi ‘i Me 2018 ke mo’ua ‘a ‘Akilisi mo e kau Faka’iloa ki he lau’ikovi’i pea kenau totongi mo e ‘u fakamole ki he hopo.

Kuo ‘osi fakaikiiki mai ‘e ho’o ongoongo ‘a e hopo ni pehe ki he ongoongo ‘a e Matangitonga ka ‘oku ou fie vahevahe atu pe ‘eni ke fakamo’oni ki he loi moe fa’ufa’u ‘a ‘Akilisi mo ‘eku faka’amu ke mahino aa ki si’i kakai ‘o e fonua.

‘Etita ‘oku ou manatu ki he taimi na’e fai ai ‘a e hopo ko’eni na'a ku 'i ai tonu pea koe Fakamaau Polisi ko Similoni Tu’akalau. Na'e fakahoko hono fehu’i fakafihi ‘o ‘Akilisi mo Mateni fekau’aki mo hono tukuaki’i loi ‘o Clive Edwards ‘i he taimi na’e Minisita Lao ai.

Na’e fu’u mahino mei ke ngaahi fehu’i fakafihi ‘a e loi pe ‘a ‘Akilisi mei mu’a ki mui ‘i he’ene tukuaki’i koia ko Clive Edwards ‘a e toitoi’anga ‘o e kau fai hia pea nau ngaue’aki ‘a e keisi ‘a e Siaina ko Tsay ‘o pehe na’e hua ‘e 'e he kau Polisi hono ‘api ‘i he 1993 ka na’e te’eki ke Minisita ‘a Clive Edwards ia he taimi ko’eni.

Na’e toe pehe foki ‘i he fakamatala ‘a ‘Akilisi mo Mateni na’e ‘ave kia Clive Edwards ‘a e ngaahi me’a na’e ma’u ‘i he ‘api ‘o Tsay ki he ngaahi ngaue ta’efakalao ka na’e ‘ikai kene fai ha me’a koe’uhi koia ‘a e loea ‘a Tsay.

‘Oku faka’ulia he na’e te’eki ke hoko ‘a Clive Edwards koe Minisita pea na'e 'ikai koia na’a ne fai ha ngaahi hopo ‘a Tsay.

‘I hono fehu’i fakafihi ‘o ‘Akilisi na’a ne pehe ‘e ia ‘oku ‘ikai ko Clive Edwards ia na’e Minisita ka koe tokotaha kehe ia pea na’e ‘ikai ‘ave ha ‘u me’a ia kia Clive Edwards.

‘I hono fakafehu’i ‘o ‘Akilisi fekau’aki mo Tsay he na’e fuakava ‘a Clive Edwards ia na’e te’eki kene ‘ilo e ia ‘a Tsay pe fe’iloaki mo Tsay kimu’a ‘i he ta’u 1996. Na’e tali ‘e ‘Akilisi ‘o pehe ‘oku ‘ikai kene ‘ilo ‘e ia ha hopo ‘a Tsay na’e fai ‘e Clive.

Ko e ‘u ngaahi me’a na’e fehu’i fakafihi kiai ‘a ‘Akilisi na’e ‘ikai kene ‘ilo ‘e ia ha me’a pea na’e tatau pe mo hono fehu’i fakafihi ‘o Mateni.

Na’e malie he na’e fakamatala ‘a Mateni ia ‘o pehe ‘e ia na’e fakafalala pe ia ki he me’a na’e talaange ‘e ‘Akilisi pea ne pulusi ‘e ia.

Na’a ku ‘ohovale foki he tala tu’utu’uni ‘a Fakamaau Polisi Similoni ‘o pehe ‘oku ‘ikia ha lau’i kovi’i pea ‘oku mo’oni pe ‘a ‘Akilisi ia.

Kaikehe ‘Etita ‘oku hanga ‘e he Tu’i Fakamaau Lahi ‘o fakamahino mo fakaikiiki mai ‘a e loi moe fehalaaki ‘a e tuutu’uni fekau’aki moe lau’i kovi’i oea fakamahino mo e loi moe 'ikai mo'oni 'a e ngaahi fakamatala na'a nau fakahoko.

‘E lau ‘a e hopo ko’eni koe taha ‘eni ‘o e ngaahi hopo ‘oku ne hulu’i mai ‘a e me’a koe loi mo e fa’u kuo fakahoko ‘e hotau Palemia pea ‘oku totonu ke vakai’i fakalelei pe ko ha founga ‘eni ‘oku fe’unga moha taki ‘o e fonua.

Faka'apa'apa Atu,

'Eliesa Fifita

Tufuenga-Kolomotu'a