Kapineti ‘a e kau mo’ua pa’anga lalahi ^Featured

Nuku'alofa

27 Me, 2018

'Etita,

 ‘Oku mahino foki koe kau memipa Kapineti ‘o e ‘aho ni ‘oku huluni ai ‘a e ni’ihi ko e kau mo’ua pa’anga lalahi ki he Pule’anga mo e ngaahi kupu kehe pe he sosaieti ‘a ia ‘oku fu’u totu’a ‘eni ia ke malava ke tau tui ‘oku hoko ‘i ha fonua.

‘Oku fehu’ia lahi pe koe anga fēfē hono fili ‘o e kakai ko’eni kenau tu’u mai o tataki ‘a e fonua mo malanga’i ‘a e faitotonu mo e pule lelei lolotonga ia ‘oku nau mo’ua pa’anga lalahi ‘i he fonua ‘a ia koe ‘ata totonu ia ‘o e maumau lao.

Kuo ‘osi ‘oatu pe foki ‘e he ngaahi kautaha ongoongo ‘a e ngaahi mo’ua ko’eni ka ‘oku mahu’inga ke toutou fakamanatu ki he fonua ‘a e kakai mo’ua lalahi ko’eni he ‘oku mahino mai foki ‘o hangē koe lea Tonga ‘oku ‘ikai ha ufi ia ‘e taha pe koha mei’ime’i maa pea mo’oni ‘etau lea Tonga koe matu’a “Ha’i Kapa” mo’oni.

Ko e mo’ua pa’anga lalahi ‘o e kau Minisitā ko’eni ‘oku anga pehe ni leva:

1. Tokoni Palēmia Semisi Sika – Mo’ua laka he miliona ko e ‘ikai totongi ‘a ‘ene tukuhau ki he Pule’anga. Toe mo’ua laumano ‘i he hopo fakatonutonu ‘a e Kautaha Liiki ‘a Tonga ‘o kau kiai mo e totongi loea mo e fakamole (costs) ‘a e tafa’aki na’e ikuna ‘i he hopo ko’eni.

2. Minisitā Leipa Tu’i Uata – Mo’ua laka hake he pa’anga 5 kilu ki he Poate Taulanga ‘a ia koe mo’ua ia ‘o ‘enau pisinisi faka-fāmili pea koia na’a ne fakalele.

3. Minisitā Polisi Mateni Tapueluelu – Mo’ua laka hake he kilu ki hono lau’i kovi’i ‘o e Kau Minisita Maloloo ‘o e Pule’anga ‘o Tu’ivakano pea totongi ‘eni ki mu’a he fili ka ‘oku laumano ‘a e mo’ua koe totongi loea (costs) ‘a e tafa’aki na’a nau ikuna ‘a e hopo.

4. Minisitā Pa’anga Pohiva Tu’i’onetoa – Ko ia na’e Faka’iloa Fika ‘Uluaki ‘i he hopo ‘a e Siasi Tokaikolo mo e Feohi’anga Mo’ui Fo’ou pea ikuna ‘a e Siasi Tokaikolo ‘a ia ‘oku fakafuofua 'e laka he kilu ‘a e fakamole (costs) ‘a e tafa’aki ‘a e Talatalaaki ‘a ia kuopau ke totongi ‘eni ‘e Tu’i’onetoa mo ‘ene tafa’aki.

Ko hono mo’oni ‘oku totonu mo taau ke fakafisi leva ‘a e kau memipa ko’eni ‘o e Kapineti mei honau takitaha lakanga he ‘oku ‘ikai koha me’a si’i ‘eni ka ko e matu’aki maumau lao pea ‘oku ‘ikai koha sipinga lelei ‘eni ke tataki 'aki ha fonua.

Faka'apa'apa Atu,

'Ofa Fonua

Hala Tupoulahi