Na’e kau nai ‘a e hū pilīsone 'i he palani ki he ‘uluaki ‘aho 'e 100? Featured
12 Ma'asi, 2018. ‘Oku fakaloloma pea ‘oku faka’ofa ka ko hono mo’oni ‘oku ta’e’amanekina pea ‘alu mamalie pe ke fakatupu kata pea toe fakaoli ‘a ‘etau fakakaukau atu ki he ngaahi fokotu’utu’u mo e palani ‘a hotau kau taki pea ko e taimi ‘oku ‘ikai hoko ai ‘a e palani pea ‘oku hange ha hele valingi ‘a e taumalingi mai 'a e loi.
Na’e ‘i ai ‘a e palani ‘a e Pule’anga kuo hili ‘i he ta’u 2014 ko ‘enau hoko hake pe ‘o pule’anga kuo holoki ‘a e totongi e vai, ‘uhila mo e telefoni pea ‘i he’enau hoko hake ‘i he ta’u 2015 kuo hange ha loketi ‘a e totongi ‘o e vai, ‘uhila pea nau kamata ala atu ki he telefoni ka na’e iku tuku kovi ‘a e hulohula he na’e ‘lolotonga 'a e ifo 'enau sitepu kuo tau e puti pea nau iku matuku.
‘I he toho hake pe puipui ‘o e pule’anga fo’ou ‘i he ta’u 2018 kuo takitaha talaki ‘a e ngaahi palani ‘a e kau taki ‘i he’enau takitaha Potungāue.
‘Oku fehu’ia foki pe na’e kau e tokoto falemahaki, teu fakafisi loi, fekau ke fakafisi mo e ‘ave fakafale mahaki ‘i he ngaahi palani ko’eni.
'Oku ngutuhua pe foki ‘a e fokotutua fakasino he koe ngaahi me’a ‘oku ‘ikai ketau pule kiai ka koe fanga fo'i palani tau'olunga helepelu kuo tau fanongoa mo mamata pau kiai.
Ko e palani fakatuputupu langi ‘a e taki ‘i he Potungaue ‘e taha na’e fakamanavahe pea na’e fai e manava si’i na’a kuo ‘i Tonga ni ‘a Palesiteni Donald Trump pe ko Palesiteni Xi Jinping ‘o Siaina.
Koe palani foki ‘eni ki he ‘uluaki ‘aho ‘e 100 pea na’e fakaleleloto hono talaki he letio mo e mitia ‘a e fo’i fakapatuu ko’eni he koe me’a foki ‘eni ‘a e kau taki ‘o e ngaahi Pule’anga lalahi ko hono talaki ‘a ‘enau palani mo hono fakaikiiki ‘a e ngaahi taumu’a ke tulia pea fakahoko ‘i he ‘uluaki ‘aho ‘e 100 'enau hoko ki he lakanga taki.
Ko e me’a pango he koe me’a pe na’e ‘ilonga mai he fo’i palani ko’eni ko e puna vakapuna kalasi ‘uluaki ia ‘a e taki mo hono mali ki he fonua muli pea 'oku pehe 'e he fakamatala na'e totongi ‘e he Potungaue mei he'enau kuletiti 'i he taha 'o e ngaahi kautaha vakapuna 'i he fonua pea ko e toe fakaoli he na’e tu’uta pe 'a e folau ‘i he'ena foki mai ki he fo'i piliote 'o na si'i hū pilīsone.
‘Oku oli he na’e ‘eke ‘e he taha o e kau ngāue ‘a e taki pe na’e kau koaa ‘a e hū pilīsone 'i he palani ki he 'uluaki ‘aho ‘e 100 ‘a honau taki?
Na’e tali hake ‘e he tokotaha 'o e kau ngāue mo ‘ene fakatonutonu atu ‘a e matāpule na’a ne fakahoko ‘a e fehu’i ko’eni mo ‘ene maki’i ‘o pehe atu “toko na’e ‘ikai koe hū pilisone ka koe hū pe ia he selo”.
Na'e toe pehe mai 'a e motu'a 'e taha 'i he kau ngāue "mahalo ko e toki hū pilisone 'eni ha minisita lolotonga he hisitolia 'o e fonua ni ee"?
Tali atu 'ehe tokotaha "ha fua ho'o 'eke".
‘Oku toe malie he ‘oku toe tanaki atu ki he palani 'i he 'uluaki ‘aho ‘e 100 mo e hā ‘i he Fakamaau’anga Polisi ‘i Fasi ‘i he ‘aho 26 ‘o e mahina ni.
5 comments
-
Usaia Tolu lele hake koe ki hee 'o leleaki'i homou palemia ki falemahaki ahahahaha
-
Teu toe fakamantu atu pe 'eku tohi ki mu'a atu, "only in Tonga", 'oku faka'ilo teu hopo e minisita kae kei minisita pe!!! Pea 'ikai 'ilo 'e honau ngangau kuo loa e mafola 'I mamani hono puke ia mo hono husepaniti 'ehe kau polisi 'o fka'ilo, kae 'otu mu'a atu hono talitali e NZ PM 'I mala'evakapuna. Ha kata 'ae kau folau 'a PM Jacinda he'enau sio mai kihe fu'u minisita na'e fakahu he selo 'oku 'otu mu'a atu he kau tali folau ONLY IN TONGA!!
Pea talatau a mu'a kihe kau pitoa moe kau poupou o 'akili ke tuku a loi mo fasitu'u. Na'a nau lele'i he fb e 'u ta 'o Tukutonga pea 'asi koe Before and After, taimi na'e kei lingi'anga veve ai mo e 'aho ni, pea nau pehe tokua malo mo 'akili kene fakama'a e fu'u palaku ko ia. Koe me'a eni 'oku ui koe mafana he penu kehe. Na'e 'osi hiki pe lingi'anga veve ki Tapuhia pea fakama'a a Tukutonga 'ehe Pule'anga 'o Sevele mo Tu'ivakano. Koe toki lele ni hake pe eni 'a 'akili 'o langa paaka ai ka na'e 'osi faka'ofo'ofa pe ia. 'Ai pea tuku e loipala moe loi erro moe fakama. Kakai hilo loi kaaimu'a fie ma'u talanoa. -
Mou nofo noa mu'a he 'oku 'ikai temou 'ilo ha me'a he 'oku toe si'i pe pea 'osi e 'aho e 100 na'a kuo mei 'asi mai e ola 'o e palani.
-
Malie lahi pea koau 'oku 'ikai tuku 'eku kata he ngaue 'a e ki;i kolomu ko'eni he ko hono mo'oni 'oku fakaoli pea toe mo'oni pe foki, Ko e palani 'aho 'e 100 koe me'a ia 'a e kakai poto mo taukei ka 'oku fakaoli foki 'ikai tatau 'a e ngutu mo e tuhu. Malie lahi.
-
Ne 'iai e motu'a ko ho mau kainga ofi pe. Fuoloa ta'u 'ene nofo muli. Fakafokifa pe kuo 'asi mai ki Tonga ni ki motu. Pea ko 'ene ha'u pe 'o ta kotoa e 'ulu 'akau honau 'api, 'osi koia holoki moe fale, pea lele leva 'ene fu'u langa fale fungavaka ua. Me'apango lolotonga atu pe koia ene langa kuo mahe'u mai e fo'i kakala ko e pa'anga ko eni 'oku fai'aki e langa ko e pa'anga ia 'a e siasi na'e sekelitali ai hono mali 'i muli (he na'e toki tuli ni mai pe ki mui ni koe mole e pa'anga 'a e ki'i siasi). Taimi tatau pe toe ongonoa mai moe fo'i talanoa "koe to he'e poto ('uhinga eni ki he ongo vaivai kuo na 'osi malolo), pea ha'u e VKT o taa e 'akau". Kaekehe, na'e iku atu pe 'o 'ikai 'osi e langa pea mafuli ai pe fu'u fale ko eni koe fu'u 'api "Toe Fa'a Tu'u ai e Teve". Pea 'oku pehe moe ongo matu'a 'oku talanoa kiai e 'atikolo ni. 'Oku talanoa pe kiai 'a Palovepi 16: ki he palani faka-matelia pea moe palani faka-e-'otua. Na'e 'osi tisaini (design) mai pe ia mei langi. He koe me'a ia 'oku 'alu hala, 'e 'alu hala pe ia. Pea ko e faihala, 'oku tala 'e he TOHI, 'oku 'iai pe hono ngata'anga. 'Oku fakaoli atu pea toe fakatupu 'ene kete, he mahalo ko hona 'aho pe eni e. 'Alu atu pe eni ia ke toe katuni lahi ange kau taki ia 'o Tonga he kau comedian (kau katuni fakaoli) lahi i mamani moe kau lea fakatatau (impersonator). Nau 'ilo koaa kuo'osi momoi e kelekele kia 'ATONAI pe 'ikai? 'Ofa pe ke hoko 'a pilisone koha liliu tangata kia Pipi mo Kahi. Koe tu'umalie koe me'a lelei ia. Ka e tu'umalie he founga faka-'otua (faitotonu, ngaue malohi, fakasi'isi'i e fakamole, etc) ka 'oku 'ikai ko e founga faka-setane (kaihaha'a, faihala, loi moe kakaa, fakamole noa'ia etc). He ko hono ikuanga eni koe: "Na’e kau nai ‘a e hū pilīsone 'i he palani ki he ‘uluaki ‘aho 'e 100?". Ko e tali kiai, 'IO, ka koe palani ia 'a e tokotaha kehe. What a hypocrite?