Faiva, Tufunga mo e Nimamea'a ^Featured

 ‘Oku ‘oatu ‘a e fakaafe loto fiefia mo māfana mo‘oni ki he kotoa ‘o e kāinga Tonga kotoa, ‘o tefito ki he kau faiva, tufunga mo e nimamea‘a,
ka e ‘uma‘ā ‘a e hakotupu ‘o e fonua, ke mou me‘a mai ki he lea ma‘ae komiunitī, hono fakamanatu mo ma‘alali ‘a e faka‘ofo‘ofa mo mā‘uhinga ‘o e fonua mo e tala/lea ‘o Tonga, ‘a ia ‘oku fa‘oaki mo fetu‘utaki ai ‘a e ngaahi ‘ilo mo e poto tu‘ufonua, he Uike Lea Tonga he kaveinga ko e:

FAIVA, TUFUNGA MO E NIMAMEA'A

Ko e Ngaahi Koloa Tukufakaholo Tupu‘a ‘a Tonga he Ngaahi Misiume ‘Iloa mo Tālā ‘i ‘Iulope mo Pilitānia

KAU LEA: Kolokesa Uafā Māhina-Tuai, Tui ‘Ema Gillies, Benjamin Work, Kenneth Tuai mo Palōfesa Hūfanga Dr ‘Ōkusitino Māhina

‘Aho: Tokonaki 5 ‘o Sepitema 2015
Feitu’u: Langimālie Community Garden, 5a Jordan Ave, Onehunga
Taimi: 4.00efiafi-8.00efiafi

Fakatokanga‘i ange ‘oku makatu‘unga ‘a e lea ko ‘eni mei he ‘a’ahi mo e fekumi ‘a e kau lea ki he ngaahi koloa tukufakaholo tupu‘a ‘a Tonga ‘oku lotolotonga tokanga‘i, tauhi mo fakatolonga he ngaahi Misiume ‘iloa mo tālā ‘i ‘Iulope mo Pilitānia.

‘E kamata‘aki ‘a e ki’i fakaneifua ma’ama’a pē he tā-vā 4.00 efiafi pea toki kamata ‘a e ngaahi lea.

‘E ma‘u ‘a e fakaikiiki fekau‘aki mo e lea mei he Sekelitali: Taani Lavalavu he telefoní ko e 021 0812 6975

‘Ofa fau mo e ‘ānau ma‘u,
He manatu mo e faka‘apa‘apa atu,
Mei he Talāsiti Ako, ‘Aati mo e Fakalakalaka Fonua-Moe-Tala-‘O-Tonga.