Kolonitini uike ‘e tolu kau folau mei muli Featured
10 Fepueli, 2020. Kuo tali ‘e he Kapinetí ke kolonitini ‘a e kau pāsese kotoa pē ‘oku nau folau mai mei mulí ‘i he uike ‘e tolu ‘i he ngaahi feitu’u fakamavahe’i makehé (quarantine facilities) koe’uhí ke fakapapau’i ‘a e malu mo e hao ‘a Tonga mei he Covid-19 pea lava ke tokanga’i makehe mo malu ha taha ‘e puke mei he mahaki ni ke ‘oua ‘e toe mafola.
Ko hono fakahā eni ‘e he Sea ‘o e Kōmiti ki he Ngaahi Me’a Fakatu’upaké Hon Poasi Tei ki he fakataha’anga ‘i he pongipongi ‘aneafi.
Fakatatau ki he palani na’e ‘osi tali ‘e he kōmití ‘i Sanuali ‘o e ta’u ni hili ‘a e vaka ‘i he ‘aho 11 ‘o Fepueli mei Brisbane, ‘Aositelēlia ‘oku totonu ke tu’uta mai ‘a e vakapuna hokó ‘i he ‘aho 25 ‘o e mahina ni ka ‘oku toloi ia ki he ‘aho 3 ‘o Ma’asi.
‘I he fakamatala ‘a e Pule Lahi ‘a e Potungāue MEIDECC Paula Pouvalu Ma’u, “Koe’uhí ko e fiema’u ke kolonitini ‘a e kau pāsesé ‘i he uike ‘e 3 ‘a ia ko e ‘aho ia ‘e 21 kuopau ke ‘oange ‘a e uike ‘e taha ki he kau ngāué kenau mālōlō ai pea mo fakama’a ‘a e feitu’u fakamavahe’i makehé kimu’a pea toki tu’uta mai ‘a e vaka hokó.”
“Ko e vaka ‘oku ‘amanaki ke tu’uta mai ‘i he ‘aho Tu’apulelulu ‘o e uike ni ‘e kolonitini ‘a e kau pāsesé ‘i he Hōtele Kupesí mo Kemi Taliai pea tenau toki ‘atā kinautolu ‘i he ‘aho 4 ‘o Ma’asi.”
Ko e ngaahi vakapuna ‘e tu’uta mai ‘i he ‘aho 3 ‘o Ma’asi ‘oku kau ki ai ‘a e vakapuna mei Fisi ‘a ia ‘e totongi ‘e he siasi ‘o Sīsū Kalaisi Kau Ma’oni’oni Ngaahi ‘Aho Kimui ni ke fakafoki mai ‘a e kau ngāue faifekau ‘a e Siasí. Makehe mei he kau faifekau ‘a e LDS ‘e foki mai ‘i he vaka ni ‘a e kau kauvaka ‘a e FISA mei ‘Iulope, kau Tonga na’e folau mai mei ‘Initiá pea mo e toko ua mei Papua Niu Kini ka kuo nau ‘osi kolonitini ‘aho 14 ‘i Fisi, katoa pē. ‘Oku fakafuofua ‘e fe’unga mo e toko 70+ ‘a e kau pāsese ‘e omi he vaka ni.
‘Oku ‘i ai foki pea mo e ongo vakapuna mei Nu’usila pea mo ‘Aositelēlia ‘oku ‘amanaki ke tu’uta mai ki Tonga ni ‘i he ‘aho 3 ‘o Ma’asi pē.
Ko e kotoa ‘o e ngaahi vakapuna ‘e tu’uta mai ‘i he ‘aho 3 ‘o Ma’así ‘e ‘ikai toe laka hake ‘a e tokolahí ‘i he toko 250 koe’uhí ko e tokolahi pē ia ‘e malava ke nau nofo ‘i he ngaahi feitu’u fakamavahe’i makehé.
