Kei hao pē ‘a Tonga mei he COVID-19 Featured
Sea ‘o e Komiti Fakafonua ki he Ngaahi Me’a Fakatu’upake (NEMC) Hon. Poasi Tei mo e Minisita Mo'ui Dr. 'Amelia Afuha'amango
28 Siulai 2020. ‘Oku kei hao pē ‘a Tonga ‘o ‘ikai ha taha ‘e ma’u ‘e he vailasi COVID-19 hili ia ‘a hono tukuange atu ‘a e kau pasese ‘e toko 57 na’e fakamavahe’i makehe ‘i he Hotele Tano’a ‘aneafi, ‘a ia ko e kakato ia ‘a e ‘aho ‘e 14 ‘a hono fakamavahe’i makehe kinautolu.
Na’e me’a tonu ‘a e ‘Eiki Palemia ‘o Tonga Hon. Pohiva Tu’I’onetoa ‘i hono tukuange atu ‘a e kau pasese fakataha mo e kau ngāue laine mu’a (front liners) ‘e toko 24. Na’á ne fakamālō’ia foki ‘a e ngaue lahi mo e fua fatongia lelei na’e fakahoko ‘e he kau ngāue laine mu’a ka e pehē ki he kau pasese.
Na’e fakahā ‘e he Pule Lahi ‘o e Potungāue Mo’ui Toketā Siale ‘Akau’ola, ‘oku kei tu’uma’u pē ‘a e ‘aho ‘e 14 ki he fakamavahe’i makehe (quarantine) mei he Kautaha Mo’ui ‘a Māmani (WHO). Ka ‘oku toe tānaki atu ‘e he Potungāue Mo’ui ‘a Tonga mo e uike ‘e taha ki ai ke a’u ‘o uike ‘e tolu.
“Tau toe tānaki pē ‘etautolu mo e uike ‘e taha ‘a ia ‘oku to e tokanga’i pē ‘e Toketā Reynold ‘Ofanoa mo ‘ene timi kinautolu ki honau takitaha ‘api. ‘A ia na’e ‘osi fai pē ‘a e felotoi mo kinautolu ke fakahoko ‘a e ngāue ko ‘eni ‘i honau takitaha ‘api ‘i he uike ‘e taha ki mu’a pea nau toki ‘atā.”
Fakatatau kia Siale ‘oku ‘i ai ‘a e toko 6 mei he kau pāsese ‘e toko 57 ko ‘eni, ko ‘enau lele mai mei he ngaahi ‘otu motu. Na’e fai pē ‘a e kole kia kinautolu ke nau nofo pē ha ngaahi ‘api ‘i Tongá ni ke fai hono siofi kinautolu ‘a ia ‘e tokoni ai ‘a e kau neesi fakavahe ki hono vakai’i faka’aho ki nautolu.
Na’e fakahā foki ‘e he Minisitā Mo’ui Hon. Dr. ‘Amelia Tu’ipulotu ‘a ‘ene hounga’ia ‘i he kei hao ‘a Tonga mei he COVID-19. Ki mu’a pea tukuange atu ‘a e kau pāsese ‘aneafi na’á ne fakamālō’ia ‘a e gāue lahi kuo lava, ‘o tatau pē ki he ‘Eiki Palēmia mo hono Pule’anga, ko e Komiti (NEMC) kau ngāue laine mu’a pea pehē ki he kau pāsese.
Taimi tatau na’e fakamālō’ia ‘e he Sea ‘o e Komiti Fakafonua ki he Ngaahi Me’a Fakatu’upake (NEMC) ka ko e Minisitā ‘o e Potungāue MEIDECC Hon. Poasi Tei ‘a e ngāue lahi kuo fakahoko ‘e he Minisitā Mo’ui mo ‘ene Potungāue ka e pehē ki he kau Pule Ngāue ‘a e Ngaahi Potungāue ‘a e Pule’anga, Ngaahi kupu fekau’aki mo e kakai ‘o e fonua ‘i he ngāue fakataha kuo fakahoko ‘o lava’i lelei ai ‘a e fatongia ko ‘eni. Na’a ne pehē ‘oku ‘i ai pē ‘a e ngaahi mata vaivai ke fakalelei’i pea ‘oku hoko ia ko e ako pea ke to e siofi ‘a e ngaahi tafa’aki koia ke to e lelei ange ‘a e fua fatongia.
‘Oku hokohoko atu ai pē ‘a e ngāue ‘a e Komiti ka e pehē ki he ngaahi kupu fekau’aki ‘i he teuteu ki he vaka hono ua ‘a ia ‘e ‘omai ai ‘a e kau pāsese mei Nu’usila ‘o fakafuofua ki he uike ‘uluaki ‘o ‘Aokosi.
Ko e kau pāsese ‘e toko 57 ko eni kuo faka’atā, ko kinautolu na’e ‘omai mei Fisi ‘e he fuofua vakapuna ki hono fetuku mai ‘a e kāinga Tonga tukuvakā ‘i he fonua muli. Ko e kau ngāue laine mu’a ‘e toko 24 ‘oku kau ki heni ‘a e kau ngāue ‘a e Potungāue Mo’ui, Kau Taumalu’i ‘a ‘Ene ‘Afio mo e Tāmate Afi.
