Kei hao pe 'a Tonga ni mei he Covid-19 Featured
Minisitā Mo’ui Hon. Dr. ‘Amelia Afuha’amango Tu’ipulotu
6 ‘Epeleli 2020. Na’e faka’atā atu ‘a e toko nima fakamuimui taha na’e kei fai ‘a hono fakamavahe’i makehe (quarantine) ‘i he pongipongi Tokonaki ‘o e uike kuo ‘osí, ‘aho 4 ‘o ‘Epelelí.
Fakatatau ki he Minisitā Mo’ui Hon. ‘Amelia Afuha’amango Tu’ipulotu ko ‘ene kakato ia ‘o kinautolu na’e fakamavahe’i makehé pea ‘i he’ene ‘au mai ki he pongipongi ‘o e ‘aho ni ‘oku kei hao pē ‘a Tonga ni mei he COVID-19.
Na’a ne fakahā foki na’e ‘i ai mo e kau pāsese ‘e toko 400 ‘a ia na’a nau folau mai mei Fisi mo Nu’usila ‘i he vaha’a taimi ‘aho 19 – 21 ‘o Ma’asi ‘a ia nae ‘ikai ke kau e ongo fonua ko ení ‘i he lisi ‘o e ngaahi fonua kuo pau ke nau omi ki Tonga ni ‘o quarantine pea na’e toe fiema’u pē ia ke siofi kinautolu ‘i he tu’unga mo’uilelei ‘oku nau ‘i aí.
‘I he lipooti fakamuimui taha mei he Potungāue Mo’uí kuo ‘osi fakahoko ‘a hono muimui’i ‘a e toko 400 ko ení pea ko e peseti ‘e 99 ‘a ia ko e toko 396 kuo a’u atu ki ai ‘a e potungāué ‘o fai hano vakai’i kinautolu, pea ‘oku nau ‘i he tu’unga fakafiemalie pe ‘o ‘ikai ha taha ‘e puke.
Na’a ne fakamamafa’i foki ‘a e mahu’inga ke kei muimui ‘a e kakai ‘o e fonuá ki he ngaahi lao ‘o e fakataputapuí ‘o kau ki ai ‘a e mātu’aki tokanga ki he fanofanó pea nofo ma’u foki ‘i ‘api.
Na’a ne fakahā foki ko e ngaahi vakapuna pē ‘oku fakangofua ke tu’uta ‘i Tonga ni ko e ngaahi vaka pe ke fetuku ai ‘a e kau mulí ki honau ngaahi fonua takitaha pea ‘oku ‘ikai ngofua ke hifo ha taha pe fakahifo ha veve mei he vaká.
“’Oku ‘ikai ngofua ke heka mai ha pāsese ki Tonga ni ‘i ha vaka ‘oku folau mai ke fakafoki atu ‘a e kau mulí, kuo pau ke ‘i ai ‘a e ngaahi tu’utu’uni ke muimui ki ai ‘a e vaka kotoa pē ‘e tu’utā pea ‘oku ‘ikai ke tu’uta noa’ia ha vakapuna ‘i Tonga ni.”
‘I he’ene fakamatalá ‘oku hoko ‘a e fakataputapui ko ‘ení ke toe mateuteu ange ai ‘a e potungāué ‘o tatau pe ‘i Tongatapu ni ‘i he ngaahi koló pea mo e ngaahi ‘otu motú ‘o a’u ki he Ongo Niuá.
‘Oku ‘i ai foki ‘a e peesi Facebook ‘a e Potungāue Mo’uí ‘oku tuku atu ai ‘a e ngaahi fakamatalá lolotonga mo e ngaahi fakamatala mahu’inga ‘i he taimi ko ‘ení. ‘Oku ‘i ai foki mo e fika telefoni ‘e lava ‘a e kakai ‘o e fonuá ‘o fetu’utaki ki ai fekau’aki mo ha ngaahi fehu’i ‘a ia ko e 0800933.
‘E hokohoko atu ‘a hono tuku atu ‘e he Potungāue Mo’uí ‘a e ngaahi fakamatala ki he tu’unga lolotonga ‘oku ‘i ai ‘a e COVID-19 ki he kakai ‘o e fonuá ‘i he ‘aho kotoa pē ‘o fakafou ‘i he ngaahi kautaha ongoongó.
- MEIDECC
