Fakaoliatu Mafola COVID-19; Mei Siainá? ^Featured

‘ITALI – Kuo ma‘uatu ‘e he kau Polisí ‘a e kakai kuo nau maumau‘i ‘a e lao kuo tapui ha toe fe‘aluaki lolotonga ‘a e mahaki COVID-19. Kuo pihia ‘a e toko 101,739 ‘i ‘Ītali kotoa, pea kuo mālōlō ‘a e toko 11,591 (uike faka ‘osi ‘o Mā‘así). ‘Oku tu‘utu‘uni ‘e he laó ke fakafonu ‘a e foomu fakangofua fakalao ke ‘alu holo ha taha mama‘o mei hono ‘apí:

Acilia, saute ‘o Lomá:

(1) Tohi ‘e he tangata ‘a e “‘ofa” ‘i he foomú, pea ko ‘ene ‘alu ‘o kumi hono ‘ofa‘angá he na‘á na kē ‘o takitaha ma‘ana houa pe ‘e ua kuo ‘osí. Tuli 'e he Polisi ke foki ki 'api.

(2) Tohi ‘e he tamasi‘i ta‘u 20 ko ‘ene ‘alu ki he kai fakaafe ‘i hono kaungā‘apí. Lolotonga ia ‘oku tapu ‘a e ‘alu ki ha fakataha mo ha kakai tokolahi. Na‘e tuli ‘e he Polisi ke foki ki ‘api.

(3) Tohi ‘e he ongo fefine ko ‘ena fononga ‘o vakai hona mehikitanga vaivai ‘oku si‘i puke. Muimu‘i ‘e he Polisi ‘o ma‘uatu na‘á na ‘eva pe ki hona kaume‘a ta‘u 40, pea ‘oku kei mo‘ui lelei. Na‘e tā-tikite kinauá.

(4) Ta‘ofi ‘a e tokotaha faka‘uli mei he kolo ko Formello ki Loma, maile ‘e 30. Tohi ‘e ia ‘i he foomú ko ‘ene ‘alu ‘o fakatau sikaleti. Ka ‘oku ‘ikai kau ‘a e sikaleti ‘i he ngaahi koloa mahu‘ingá. Tā-tikte ko e maumau lao.

(5) Ongo tangata ‘i Loma na‘á na ō ki he fale koloa ‘o fakatau, ka e huke ‘e he Polisí ‘ena me‘alelé ‘o ma‘u ai ‘a e faito‘o kona tapu. Na‘e loka ai hona nimá ‘o takiatu ki he pilisoné.

(6) Ta‘ofi ‘a e tokotaha ko ‘ene ‘alu ‘o fakatau hina uaine. Talaange ‘e he Polisi ‘oku kau ‘a e uainé ‘i he tapui hono fakatau lolotonga ‘a e COVID-19. Na‘e tā-tikite ko e ‘ikai muimui ki he laó.

(7) Kuo fiu ‘a e kau Polisí hono tuli ‘a e kakai kuo nau toutou ‘asi holo tu‘o lahi ‘i hala Pule‘anga mo ‘enau fanga pusi, mo e fanga kuli faka-pelepele‘i. ‘Oku ngofua pe faka-‘eve‘eva‘i ‘a e fanga monumanu pelé tu‘o taha ‘i he ‘aho.

(8) Tala ‘e he motu‘a ‘oku toutou ‘asi holo ‘i he paaká, tokua ko ‘ene ‘alu ‘o fafanga ‘a e fanga manupuná. Na‘e tuli ke foki ki ‘api.

(9) Na‘e fetaulaki ‘a e ‘Ōfisa Koló ‘e taha mo e tangata heka pasikala ‘oku takitakimai ‘a ‘ene kulī kuo a‘u ki he mate ‘i he hela‘iá. Talaange ‘e he ‘Ōfisa Koló ke foki ki ‘api he ‘oku ‘ikai ko ha'á ne 'eki hele‘uhila eni ke toutou lele holo ke ‘asi ‘i he faivá.

‘Amelika

Na‘e ‘osi pe ‘aho kakato ‘e taha ‘a hono tapui ‘e he kōvana ‘o Michigan, Gretchen Whitmer, ke faka‘aonga‘i ‘e he kau toketā ‘a e faito‘o “haitolokisī-kololokuiní” (hydroxy-chloroquine) ki he kau fokoutua ‘o e COVID-19. Na‘á ne toe kole kia Trump ke 'oange ha'a nau faito'o.

Kuo fakangofua ‘e he FDA (Federal Drug Administration) ke faka‘aonga‘i ‘e he kau toketā ‘o kapau ‘oku ‘ikai ha toe faito ke mo‘ui ai ‘a e fokoutuá, pea ‘oku lotolelei ki ai hono kāingá. Neongo kuo lahi ‘a e ola lelei ‘a hono faka‘aonga‘i ‘o e faito‘ó ni ‘i Falanisē, ‘Ītali, Siaina, mo ‘Ameliká foki, kā kuo te‘ekiai maau ‘a hono sivi mo ‘ahi‘ahi‘i ki he kau fokoutua tokolahiange, pea ‘e toki laiseni ‘e he FDA ke faka‘aonga‘i tavale.

Kuo hake ‘a e kātaki ‘a e kau taki ‘o ‘Ameliká ‘i he tala loi mata‘ā‘ā kuo fakamafola ‘e he kau ‘amipasitoa Siainá ‘i māmani ‘o tukuaki‘i tokua ko e kau sōtia ‘Ameliká na‘á nau ‘oange ‘a e vailasí COVID-19 ‘i ‘Okatopa ‘o e ta‘u kuo ‘osí ki Wuhan. Kuo a‘u kia Palesiteni Trump mo e Sekelitali ‘o Fonuá Mike Pompeo, ‘a ‘ena fakapapau‘i tu‘o lahi ki he kau faiongoongó na‘e mafola mai ‘a e mahakí mei Siaina. Na‘e fakahingoa ai ‘e Trump ko e Vailasi Siainá.

Pulia Fakafokifā Kau Fakaanga'i 'o e Paati Kominiusi Siainá

Ko e toketā na‘á ne ‘uluaki kalanga‘i ‘o e fakatu‘utāmaki ‘o e COVID-19 kuo pulia faka-fokifā. ‘Oku ‘ikai ‘ilo koehā e ‘uhinga ‘a ‘ene kai‘iloá. Fakamatala ia ‘a e TV “60-Minutes Australia”. Ko Dr. Ai Fen na‘e ngāue ‘i he loki tali mahaki fakafokifā ‘i he Wuhan Central Hospital ‘a ia na‘e kamata mei ai ‘a e kolonavailasí. Na‘á ne tala leva ‘i he mītia faka-sōsialé ‘a Siainá (WeChat) ko 'ene fakatokanga ki he kakaí, ‘i Tīsema, 2019.

Na‘á ne fakatokanga‘i ‘a e holomai ‘a e kakai kuo pihia ‘i he COVID-19 ki falemahakí māhina kakato ‘e taha pea toki tali ‘e he Pule‘anga Siainá ko e mo‘oni ‘a e mafolaatu ‘a e mahakí. Pea a‘uatu ‘a e fakamatala ‘a Dr. Ai Fen ki a Dr. Li Wenliang peá ne fakatokanga ai ki hono kau kaungā toketā ‘i he Falemahaki tatau. Na‘e omi ai ‘a e kau Polisí ‘o ta‘ofi kinaua ‘o fakamanamana‘i, pea fekau kena fakamo‘oni ‘i he tohi, tokua ko ‘ena fakamatala loi.

Loi: Founga Maheni ‘a e Paati Kominiusi Siainá?

Na‘e si‘i pihia ai ‘a Dr. Li ‘i he kolonavailasi ‘o mālōlō ‘i Fepueli, 2020. Pea na‘e faka‘eke‘eke ‘a Dr. Ai Fen ‘i he uike hono ua ‘o Mā‘así ‘i he makasini ‘o ne fakamatala ai ‘a e fakaikiiki ‘o e kamata ‘o e COVID-19. Na‘á ne ‘uluaki tala ‘i he WeChat ‘a e fakatu‘utāmaki ‘o e mahakí pea 'e a‘u ‘o mafola ki tu‘apule‘angá. Na‘á ne pulusi ai mo e ‘ata ‘o e tokotaha fokoutuá ‘o tuai-e-kemo kuo tauhake ‘a e kau Polisí.

‘Osi pe mei ai ‘a e uike ‘e ua kuo pulia fakafokifā ‘a Dr. Fen ‘o ‘ikai ‘ilo ‘e ha taha pe na‘e anga fēfē ‘a si‘ene puliá. Kuo ‘ilo tālā ‘i Siaina ‘a e founga ngaohi kovi‘i ‘o e kau fakaanga kia Palesiteni Xi mo e Paati Kominiusi Siainá. ‘Oku te‘ekiai foki ‘ilo ha faka‘ilonga ‘o e tangata milionea ko Ren Zhigiang na‘e pulia ‘i Mā‘asi, 2020.

Na‘á ne fa‘a fakaanga‘i mo manuki‘i ‘a Palesieni Xi mo e Paati Kominiusí ko e lahi ‘enau loi kau ki he COVID-19. Fakamatala ia ‘a e China Digital Times, ko e kautaha ongoongo ‘Ameliká. Na‘á ne tala ko e tokāteline ‘a e Paati Kominiusi ‘o Siainá ko e loi kehe pē ko hono poupou‘i ‘o e Paatí.

(Liliu lea ‘a Sione A. Mokofisi mei he fa‘u tohi Ingilisi ‘a Chun Han Wong, Wall Street Journal, ‘Epeleli 01, 2020. Hokoatu Konga VIII kau ki he COVID-19 ‘amuiange. Na‘e faiako ‘i he Tonga International Academy ‘i Tongá ni, pea ‘oku faiako Business Administration ‘i he BYU-Idaho. Ko e kolisi-tutuku mei Liahona High School; Mesa Community College-Arizona; BYU-Hawaii; University of Phoenix-Arizona.)