Tuai Mateu Faito‘o Huhu-ta‘ofi (vaccine) COVID-19 Featured
Salt Lake City (Utah) – Kuo māhina kakato eni ‘a ‘eku faka-tu‘amelie ki ha ongoongo fakafiefiá kuo mateu ‘a e faito‘ó huhu-ta‘ofi (vaccine) ‘o e COVID-19 – ko e vailasi fo‘oú ‘o e fāmili mahaki pipihi kolonavailasí. Ka e pangó, ‘oku lolotonga tu‘u ‘i he ta‘emahinó.
‘I Fepueli 08, ‘o e ta‘ú ni, na‘e faka‘eke‘eke ai ‘a Palesiteni Dr. Gregory Glenn ‘o e NOVAVAX, Inc., kautaha hu‘ivai mo e ngaohi faito‘o ki he ngaahi mahaki pipihí, ‘o kau ki he COVID-19. Na‘á ne fakahā ai ‘i he polokalama TV Fox News ‘a e feinga mālohi ‘a e NOVAVAX ke fakavave‘i ha mateuteu ‘a ‘enau faito‘o huhu-ta‘ofí, mahalo ‘e maau ki he māhina ‘e 3 (‘aho ‘e 90).
Fe‘au‘auhi ‘a e Ngaahi Kautaha Hu‘i-faito‘ó
Talu ia mo e ‘ikai toe ongomai ‘a e NOVAVAX, ka e toutou fakamatalamai ‘a e ngaahi kautaha hu‘ivai mo e ngaohi faito‘o kehé. Na‘e pepeu ‘enau fakafuofuá ke a‘u ki he māhina ‘e 18, pē ‘e laulau ta‘ú. Pea kuo a‘u eni ‘o ‘ohake ‘e he WHO (World Health Organization) ‘o e UN (United Nations) ‘a e COVID-19 mei he tu‘unga mahaki-pipihi faka-lotofonuá (epidemic) ki he tu‘unga mahaki-pipihi faka-māmāni lahi (pandemic).
Tā ko ‘ení, ko NOVAVAX, Inc., ko e kautaha pē ia ‘e taha ‘o e kau saianiti ‘o e koloa tu‘uloa hu‘i-faito‘ó (pharmaceutical industry). Pea ‘oku tau-ki-he-‘ulupoko ‘a e ngaahi kautahá ni pe kohai ‘e ‘uluaki ola lelei ‘enau hu‘i-faito‘o ki he COVID-19, pea kohai ‘e tu‘i fakaaoaó? ‘Oku fiema‘u ‘a e fu‘u pa‘anga mala‘ia lahi fau ‘aupitó pea ko e pa‘anga tupú ‘e ma‘u aí, ‘e toe fakaililifu ange iá.
Kau Saianiti: Ko Hai ‘e Tu‘i Fakaaoaó?
Ko e fe‘auhi tau faka-‘ulupokó ni ‘oku fa‘aki ‘i he kautaha nima fefekatahá. Ko e faka-pa‘angá ‘oku fa‘aki ‘i ha kautaha ‘e vavetaha ‘enau ‘enisinia‘í ‘a e ngaahi faito‘o ‘oku fiema‘utaha ‘i he māketí. Pea kenau fatu ‘o fafanga ‘a e māketi ‘i he vavetahá ‘aki ‘enau faito‘o fo‘oú. ‘I he lolotongá ni, ‘oku te‘eki ma‘u ha faito‘o huhu-ta‘ofi ‘o e COVID-19 ‘i māmani kotoá.
‘Oku nau fe‘au‘auhi tau-tāmate foki ‘i he māketi faka-pa‘angá (financial markets) ‘i hono tu‘uaki ‘enau ngaahi seá, mo ‘enau ngaahi pōnité. Lolotonga ‘a e tu‘uaki fakatauatu ‘a e ngaahi sea ‘o e NOVAVAX ki he $10 ki he seá, kuo tōmai honau monū‘ia ko e pa‘anga me‘a‘ofa $4 miliona mei he kautaha mei Switzerland. Tuai-e-kemo, kuo mahiki hake ‘a e mahu‘ingá ‘o $18 ki he seá.
Kuo malavalava foki mo ‘enau ngaahi teuteu ‘o ‘enau faito‘o huhu-ta‘ofi COVID-19 ki he fungavaka #2 (kuo lava ‘enau‘ahi‘ahi‘i fungavaka #1 ‘i ha fanga monumanú), pea ‘osi mo hono sivi‘i faka-pule‘anga ‘e he Potungāue Mo‘ui Leleí. Kuo tepile‘i ke ‘ahi‘ahi‘i ‘i he fa‘ahinga ‘o e tangatá ‘i he faka‘osi‘osi ‘o e ‘uluaki kuata ‘o e ta‘ú ni. ‘O ka paasi ai, pea toki fatu ‘a e faito‘o huhu-ta‘ofí ke toki mateu ki he kuata hono uá pē ‘o e ta‘ú ni.
 COVID-19 "Pin It")