Fehu‘ia e ‘Ata-tasilo Kitu‘á e Fakamatala Kolonavailasi ‘a Siainá Featured
Ko Dr. Li Wen Liang na‘á ne kamata e fakatonga ‘i Tīsema, 2019, kau ki he fakatu‘utāmaki ‘o e mahaki pipihi fo‘ou kuo toki faka-hingoa ko e kolonavailasi. Ka e ta‘ofi ia ‘o tukuaki‘i ‘e he kau Polisi Siainá kuó ne fakamafola ‘a e loi ka e iku pē ‘o pihia ‘i he mahakí ‘o si‘i mālōlō ai
Fehu‘ia e ‘Ata-tasilo Kitu‘á e Fakamatala Kolonavailasi ‘a Siainá
Konga I
Hong Kong, Wall Street Journal Report (Feb. 21, 2020) – Kuo toki ‘iloamai ‘a e mafola ‘a e mahaki pipihi kolonavailasí ‘i he ngaahi pilīsone ‘i he vahefonua ‘e tolu ‘i Siainá, ‘i he Falaite kuo ‘osí. Pea ‘oku ‘i ai ‘a e faka-mahalo‘i ‘oku ‘ikai ke ‘ata-tasilo mai kitu‘a ‘a e totonu hono lau ‘o e ngaahi fakataha‘anga kakai ‘oku mafola vave ai ‘a e mahaki kolonavailasí ‘i Siainá.
Kuo lipooti mai ‘e he Associated Press (Feb. 18, 2020) mei Beijing ‘a e toko 1,886 ko e kau puke fo‘ou ‘i he kolonavailasí, mo e toko 98 fo‘ou kuo nau toki mālōló. Kuo a‘u e fakakātoa toko 1,868 kuo nau mālōlō mei he mahakí, pea toko 72,436 fakakātoa kuo nau puke talu mei Tīsema, 2019.
‘I he lipooti ‘a e Senitā Mapule‘i Ngaahi Mahaki ‘o Siainá ‘i he Mōnite kuo ‘osí (Fepueli, 17, 2020), tokua ko e 80% na‘a nau ‘osi ongo‘i puke kimu‘a pea nau toki puke ‘i he kolonavailasí. Pea ‘oku kei hao ‘a e fānau iikí, ka e lahiange ‘a e kau fokoutuá ki he kakai matu‘otu‘á.
‘Ikai Fakapapau‘i ‘e he WHO
Kuo pehē foki ‘e he Talēkita Seniale ‘o e WHO, General Tedros Adhanom Ghebreyesus – ‘i he konifelenisi mo e kau faiongoongó – ‘oku fai ai ‘a e fakafuofua ki he ‘alu‘anga ‘o e mahakí kolonavailasí. Ka ‘oku ‘ikai lava ‘e he WHO ‘o fakapapau‘i pē ko e kamata eni ke matata‘ofi ‘a e mafola ‘a e mahakí pe ‘ikai.
Na‘e fakalalahi foki ‘a e kau puke fo‘oú ‘i he uike kuo ‘osí ‘i he vahefonua Hubei, tautautefito ki honau kolomu‘á Wuhan. Ko e kolo eni na‘e mafola mei ai ‘a e kolonavailasí. Na‘e mafola mei he falemahaki Wuhan Central Hospital talu mei he fakalalahi ‘a e fokoutua ‘a e tokolahi ‘i Tīsema, 2019.
Na‘e feinga sivi fakavavevave‘i ‘e he kau toketá ‘a e kakaí pea tukuange kinautolu kuo te‘ekiai fokimai ‘a e ‘analaiso mei he lapātolí sivi totó. Pea ‘osi hono ta‘ofi ‘o e founga ko iá, kuo kamata holo ai ‘a e tokolahi ‘o e kau fokoutuá fo‘oú ‘i he uiké ni.
‘Ita Lahi e Kakai Mate ‘a Dr. Li
‘Oku fakalalahi ‘a e mahalo‘i ‘oku ‘ikai ‘ata-tasilo mai kitu‘a ‘a e Pule‘anga Siainá ko e hoko ‘o fokoutua pea mālōlō ‘a Dr. Li mei he kolonavailasí hili ‘enau tukuaki‘i na‘á ne fakamafola loi ko e mahaki pipihi fakatu‘utāmaki fo‘ou eni kuo tō ‘i Siainá, ‘i Tīsema, 2019.
‘I he polokalama TV ‘a Mathias Bolinger, ‘o e British Broadcasting Commission (BBC); fakatotolo ‘a Stephanie Hegarty (BBC Population Correspondence); Hugh Pym (‘Etita Mo‘ui Lelei); Isabel Hilton (China Dialogue), na‘e fakatokanga‘i ‘e Dr. Li Wen Liang ‘a e kāinga tatau ‘a e mahaki fo‘oú mo e mahaki ko e SARS na‘e tō ‘i Siaina ‘i he 2012. Peá ne fakatokanga ‘i he ‘initanetí ki he kau toketā ‘i he Falemahakí Wuhan kenau tui ha pūlou ‘a honau ngutú mo e ihú telia na‘a nau pihia he mahakí.
Tuai-e-kemo kuo tau hake ‘a e kau Polisí ‘o tukuaki‘i kuó ne fakamafola ‘a e loi, pea kuo pau ke fakamo‘oni ‘i he tohi vetehia ko ‘ene loi, pea ‘e ‘ikai ngofua ke ne toe fai ha loi pehé. Hili ha ngaahi ‘aho si‘i kuo fokoutua ‘a Dr. Li ‘i he kolonavailasi ‘o si‘i mālōlō, fakataha mo e toko laungeau.
Na‘e mo‘umo‘ua ai ‘a e mītia faka-sōsiale ‘a Siainá ‘i he launga‘i mo e tukuaki‘i fefeka ‘o e Pule‘angá, ko ‘enau ngaahi lao faka-kominiusi ‘o fakatapui ‘a e tau‘atāina lea mo e pulusi fakahā-lotó. Ko ia ‘oku ‘asimai ‘a e ngaahi fakamo‘oni ‘oku ‘ikai ‘ata-tasilo mai kitu‘a ‘a e ngaahi ngāue ‘a e Pule‘anga Siainá.
(Fa‘utohi: Erin Mendell – Wall Street Journal. Liliu ki he Lea Tonga: Sione Ake Mokofisi)
(Hokoatu Konga II ‘Amuiange: Kuo Ma‘u ha Faito‘o Huhu Ta‘ofi ‘o e Kolonavailasi?)
