Konifelenisi ki he Fevahevahe’aki ‘a e Ngaahi Founga Ngāue Tu’u- ki-mu’a Featured
13 Sune, 2019. Na’e fakaava ‘e he ‘Eiki Palemia Le’ole’o Semisi Sika ‘a e fuofua konifelenisi ki hono fevahevahe’aki ‘a e ngaahi founga ngāue tu’ukimu’a ‘a e kau ngāue fakapule’angá ‘i he pongipongi ‘o e ‘aneafi ‘i he Hotele Tanoa.
Na’e tataki mo fakahoko ‘a e polokalama ni ‘e he Komisoni ‘a e Kau Ngāue Fakapule’angá (PSC), ‘o kau atu ki ai ‘a e kau ‘Ōfisa Pule Ngaue (CEO), kau Talēkita mo e kau ‘Ōfisa Mā’olunga mei he ngaahi Potungāue ‘a e Pule’angá.
Fakatatau ki he Tokoni ‘Ōfisa Pule Ngāue mei he PSC Salote Vuki ‘oku fakataumu’a ‘a e polokalama ko ‘ení ke fakatahataha’i mai ‘a e ngaahi potungāue ‘a e pule’angá ke nau vahevahe ‘a e ngaahi founga ngāue lelei ‘oku nau lolotonga fakahokó ‘o lava ai ke toe lelei ange ai mo hiki tō ai ‘enau fakahoko fatongiá.
“Ko e fuofua taimi ‘eni ke fakahoko ai ‘a e me’a ‘oku ui ko e Public Service Best Practice Conference, ‘a ia ‘oku fakatahataha mai e ngaahi potungāue ‘e hiva ‘i he ‘aho ni ‘oku nau pole ke nau vahevahe ‘enau founga ngāue leleí pea ke nau fe ako’aki ai mo e ngaahi potungaue kehé.”
Na’e pehē ‘e Salote ‘e hokohoko atu ai pē hono fakahoko ‘a e konifelenisi pehe ni ‘i he ngaahi ta’u ka hoko maí, kā ‘e fakahoko pe ‘i he mahina ko Suné ‘ai a ko e mahina ia ‘oku fakamanatua ai ‘a hono mahu’inga ‘o e ngāue fakapule’angá.
Na’a ne fakamamafa’i aipe foki ‘a e kaveinga ‘oku fakamamafa’i ‘i he ta’u ni, ko hono Fakamu’omu’a ‘o e Kakai pe ko e ‘’Putting People First”.
“’Oku lahi ‘aupito e ngaahi polokalama ngāue ‘oku fakahoko ‘e he ngaahi potungāué ke feinga’i ke mahino kia kinautolu ko hotau fatongiá ko e sevāniti sivile, pea ko e sevāniti sivilé ke fakahoko fatongia lelei ma’ae kakai ‘o e fonuá. Pea ko e ‘uhinga ia e ngaahi polokalama ‘o e mahina ni ke toe fakamamafa’i pe kiate kitautolu hono kotoa ‘oku ngāue fakapule’angá ‘a hono fakahoko ‘a e fatongia ki he kakai ‘o e fonua.”
Na’e kau atu ki he polokalama ‘o e ‘aho ni ‘a e foaki pale ki he ngaahi apiako ‘a ia na’a nau kau atu ki he ngaahi fe’auhi na’e tataki mo fakahoko ‘e he PSC.
Na’e fakahā foki ‘e Salote ‘a e ‘uhinga ‘oku kau mai ai ‘a e fānau akó ki he polokalama ko ‘eni.
“‘Oku fakatokanga’i ‘e he ‘Ōfisi ‘o e Komisoní ‘oku mahu’inga ke tau langa hake ha fānau ako ‘oku nau fie hoko ko e tokotaha ngaue fakapule’anga he kaha’ú. ‘Oku tau ‘osi ‘ilo pe he ‘ikai ke lava ha langa fonua kapau he ‘ikai ke kau mai ‘etau fanau ‘o poupou mai ki he ‘etau ngāue ‘oku fakahokó.”
‘E fakahoko ‘i he Falaite ‘o e uike ni ‘a hono fakamanatua ‘a e ‘Aho ‘o e Kau Ngaue Fakapule’angá ‘i he Holo Fakamanatu Kuini Saloté mei he taimi 9 pongipongi ki he 3 efiafi.
- MEIDECC
