Na’e fakaava ‘e he ‘Eiki Palemia Uepisaiti fo’ou ‘a e Potungaue Ngoue, Me’atokoni mo e Vaotātāá ^Featured

Ko e taha foki eni ‘o e ngaahi fakalakalaka ki hono tufaki ‘o e fakamatalá ‘o ngāue’aki ‘a e ngaluopé  ‘i he ngaahi tekinolosia fakaeonopooní.

‘I he’ene me’a ‘i he ouau mahu’inga ni, na’á ne pehē ai, “ko e huitu’a tefito ia ki he’etau langa fakalakalaka faka’ekonōmika ‘i Tonga ni, pea ko e sekitoa foki eni ‘oku kau ki ai e tokolahi taha ‘o e kakai ‘o e fonuá.”

“Oku fu’u mahu’inga leva ke ma’u ‘e he ni’ihi ko ia ‘oku nau fakahoko fatongia ‘i he ngaahi sekitoa ‘o e ngoué ha ngaahi fakamatala vave mo tonu pea te tau ‘amanaki ai ki ha ola lelei mei he fakahoko fatongia mei he sekitoa ko ení.”

Na’e me’a foki ‘a Hon ‘Akilisi Pohiva ‘oku ‘i ai e ‘amanaki ‘e ma’u ha ngaahi lelei mei he ngaue kuo lava.

“‘Oku tau ‘amanaki ki he ngaahi lelei te tau ma’u mei hono fakahoko ‘o e ngaue ko ení he ‘e malava ai ke tau ma’u ‘a e ngaahi fakamatala mo e ngaahi ongoongo fekau’aki mo e Potungaue ‘i he taimi kotoa ‘o houa ‘e 24 he ‘aho. ‘E toe tokolahi ange ‘a e ni’ihi te nau ala ma’u ‘a e ngaahi fakamatala mo e ngaahi ongoongo ko ia mei he ngaahi feitu’u kehekehe, pe ko ha tapa pe ‘o e mamaní ‘i he taimi tatau ‘o ‘ikai toe fakangatangata.”

Na’e me’a foki ‘a Hon ‘Akilisi Pohiva ‘oku ‘i ai ‘a e ‘amanaki ki ha toe fakalakalaka ange ‘a e fakahoko fatongia ‘a e Potungaue Ngoué ‘i he vā fengāue’aki pea mo e kakaí kae’uma’ā ‘a e ngaahi potungaue kehekehe ‘a e pule’angá hili hono fakangofua ‘a e uepisaiti ni.

‘I ha lea ‘a Saia Vaipuna ‘o fakafofonga’i ‘a e potungaue MEIDECC ‘a ia ‘oku nau tokanga’i ‘a e ngaahi fakalakalaka fakatekinolosia ko eni, na’a ne pehe ai ‘oku mahu’inga ‘o e ngaue ni he ‘oku fenāpasi tonu mo e nga’unu ‘a e Pule’angá ke fakatupulaki ‘a hono ngaue’aki ‘o e ngaahi founga pau, malu mo ma’ama’a ‘i hono tufaki ‘o e fakamatalá ‘o ngāue’aki ‘a e tekinolosiá.

Na’a ne lave foki ki he fakautuutuange ‘a hono ngaue’aki ‘o e ‘initanetí pea mo e telefoni to’oto’ó ‘i Tonga ni, pea ko e fakangofua ‘o e uepisaiti ko ení te ne fakaai e ngaahi fiema’u  ki he ngaahi fakamatala ne ‘ikai lava ‘o tufaki’aki ‘a e ngaahi founga angamaheni ‘o hangē ko e letiō mo e televīsoné.

Na’e pehe foki ‘e Saia ‘oku ‘i ai ‘a e ngāue atu ‘a e Potungaue MEIDECC ki hono fehokotaki fakakomipiuta ‘a e ngaahi potungaue ‘a e pule’angá ‘o ngaue’aki ‘a e fibre optic pea fakatahataha’i mai e ngaahi me’a ngaue mo e kau ngaue ‘a e pule’angá ke tokoni ki hono fakalelei’i mo fakavave’i ‘a ‘enau fakahoko ngāué ‘o fakafou ‘i he ‘initanetí.

‘Oku malava ke ma’u e ngaahi fakamatala felave’i mo e fakahoko fatongia kotoa pē ‘a e Potungāue Ngoué mei he uepisaiti fo’ou ko ení ‘o ‘ikai ‘i Tongá ni pē kae kau ai mo tu’apule’anga foki ‘i he www.mafff.gov.to.

Na’e me’a ‘i he ouaú ni ‘a e Minisitā ‘o e Potungāué, Hon. Semisi Fakahau, Minisitā ki he Ngaahi Pisinisi ‘a e Pule’angá, Hon. Poasi Tei, kau taki ‘o e ngaahi potungāue ‘a e pule’angá pehē ki he kau fakaafe mei he ngaahi kupu fekau’aki ‘a e potungāué.

Potungaue Fakamatala’ea, Ma’u’anga Ivi, Ma’u’anga Fakamatala, Fakatamaki Fakaenatula, ‘Atakai, Feliliuaki ‘o e ‘Ea mo e Fetu’utaki.