Ki ha Ta’u Fo’ou Fiefia mo Monū’ia Featured
‘Oku tau a’u mai 'eni ki he ‘aho faka’osi ‘o e ta’u 2015 pea ‘oku tau sio atu ki he fononga na’a tau fakahoko mai he ta’u ko’eni 2015 ‘a ia na’e ‘ikai faingofua ‘i he tapa kehekehe ‘o e mo’ui.
Na’e lahi e ngaahi peau tā ‘o tafia atu ai hotau ni’ihi pea ‘oku ‘i ai mo e ngaahi pole ne tau fehangahangai moia 'i he tafa'aki faka 'ikonomika, politikale mo sosiale ka neongo kotoa ia ‘oku tau tui koe ngaahi fokotu’utu’u pe na’e ‘ai ke pehē ‘o fakatatau ki he’etau tui faka-laumālie pea ko e anga ia ‘etau mo’ui he fononga’anga ‘oku pau pe ketau fepaki mo hono ngaahi ha’aha’a pea ko’etau ikuna ia koe koto fakakoloa lahi ‘i he mo’ui.
‘Oku ‘ikai puli pe unga ‘a e tō kehekehe ‘etau tui ‘o tatau pe he tapa kotoa ‘o e mo’ui he ‘oku takitaha ‘a e tangata mo ‘ene tui mo’ene fakakaukau pea ‘oku ‘ikai kauhala tatau he taimi kotoa. ‘Oku malava foki ke tau langa ‘i he’etau tō kehekehe ‘o tatau pe ‘i ha tapa ‘o e sosaieti tetau kau kiai pea koe natula totonu ia 'o e mo'ui ke tau a'usia hono ngahai lelei 'i he funga 'o e faingata'a moe fihitu'u 'a e mo'ui.
Ko e ta’u faingata’a foki ‘a e 2015 ‘o tatau pe moha toe ta’u ange he fononga’anga ka ‘oku tau lau tapuaki kotoa he ngaahi lelei kuo fakakoloa ‘aki ‘a ‘etau ngaahi mo’ui faka-fo’ituitui, faka-fāmili, faka-siasi, faka-kolo, faka-fonua mo e hā pe ha fa’ahinga kupu fekau’aki ‘oku tau kau kiai. 'E 'alu atu 'a ta'u 2015 'o nofo he'etau tukunga manatu ka na'a ne 'omi 'a e ngaahi to'ongapō ketau ako mei ai pea 'oku kaungatonu ki he fakalakalaka 'etau mo'ui.
‘Oku fiefia lahi ‘a e ki’i kautaha ongoongo ko’eni Nepituno Tonga Online News 'i he’etau kau fakataha mai he ta’u 2015 ‘a ia koe ta’u ‘uluaki ia ‘a e faifatongia ‘a e ki’i kautaha ni. ‘Oku ‘oatu ai pe mo e kole fakamolemole ki he kakai kotoa ‘oku nau faka’aonga’i ‘a e ki’i kautaha ni ki ha tō nounou ‘i he ta’u 2015 ‘a ia na’e ‘ikai hoa mo ho’omou fakakaukau pehe ki ho’omou ‘amanaki.
Ko e lelei taha pe ‘eni na’e fakahoko ‘e ho’omou ki’i kautaha ni ‘i he fatongia mafatukituki ko hono ‘oatu ‘a e ngaahi ongoongo mo e ngaahi fakakaukau ‘oku ‘i ai ‘a e ‘amanaki ‘oku tokoni atu ki he anga ‘etau nofo he sosaieti.
‘Oku ‘oatu fakataha ia mo e talamonū mo e ‘amanaki tetau ma’u ha ta’u fo’ou 2016 fonu tapuaki pea ke fakaola mei ‘olunga ‘a e ngaahi ‘amanaki moe ngaahi visone ‘oku fakatoka he’etau ngaahi fakakaukau.
3 comments
-
Fakamonu atu e ta'u fo'ou ki he Tonga kotoa pehe ki he Nepituno moe hanganaki atu ki he ngaue mamafa 'o e ta'u 2016. Fakatauange ke tau ma'u ha ta'u lelei.
-
Happy New Year . Malo Nepituno kuo tau tu'uta he 2016 pea 'oua 'e tuku hono 'omi 'a e ngaahi ongoongo ketau feako'aki mei ai pea 'oku mo'oni mo 'aonga lahi.
-
Nepituno,
'Oku ou fakamalo atu he ta'ungaue kuo maliu atu. Pea 'oku ou faka'amu ange mai ke toe update ange hono tuku mai ho'o mou ongoongo ketau fononga fakataha pe mo e ngaahi ongoongo 'oku 'omai 'e he 'etau ngaahi letio mo e televisone 'i Tonga ni, he 'oku 'i ai 'a hono fakalata makehe 'a hono talanga'i 'ona 'o e ngaahi ongoongo 'i heni. 'Oku hoko ia ko e ako ki he kau ako pea mo e fakamo'oni ki ha ngaahi loto na'e taala'a pe fifili.
'Oku ou kole fakamolemole atu he fiepoto koia ka ko 'eku tokoni ki he'etau ngaue. Fakamonu atu foki ki he ta'u ngaue ko'eni, 'ofa ketau a'usia ha ngaahi kelesi 'oku toe lelei ange 'i he ta'u ni.