Mahu’inga ‘a e tu’u tau’atāina ‘a Tonga ^Featured

‘Oku ‘uhinga ‘eni ki he tau’atāina pe ‘ata’ataa ‘a e fonua ke fakahoko ‘ene fai tu’utu’uni ngāue ki ha ngāue ‘e lelei ki hono kakai ‘o ‘ikai uesia ‘e ha fa’ahinga tu’utu’uni ngāue ki muli (Foreign Policy) ‘a ha fa’ahinga fonua.

Neongo ‘oku faingata’a ‘eni ke ta'ofi makatu’unga he ngaahi fekaukau’aki fakamāmāni lahi pe faka-Kolope (Globalization) he ‘oku kau ‘a Tonga ni he fonua masiva mo fakafafala ka ‘i hono fa’o ki he fakakaukau pe pilinisipolo ‘o e tau’atāina mo e totonu 'iate ia pe ‘oku mahu’inga lahi ke vakavakai lelei pe ’a Tonga.

Ko e fakakaukau tatau ‘oku ‘i he fonua kotoa ‘a e mahu’inga ke ‘oua ‘e kaunoa he ngaahi faitu’utu’u ni tau’atāina ‘a e ngaahi fonua (non-interference) ka ‘oku malava pe ke uesia makatu’unga ‘i he fakafalala mo e malohi ‘a e teke ‘a e ngaahi fonua hau ‘o fakatatau ki he ‘enau fiema’u faka fo’ituitui pea me'angāue 'aki 'a e ivi lahi, tokoni mo e pa'anga ke fakalotoa 'a e ngaahi fonua masiva, iiki ange mo tu'u lavea ngofua.

Ko e tu’unga ‘o e māmāni mo ‘ene fekaukau’aki faka-Siokalafi, faka-‘Ikonomika mo faka-Politikale (Geopolitics) ‘oku ne uesia ‘a e vā fakavaha’apule’anga (International Relations) he vaha’a ‘o e fonua mo e fonua pea ‘oku iku ki he’ene fakatupunga ‘a e ngaahi vā tamaki ‘a ia ‘oku lolotonga hoko ‘i he mamani he ‘aho ni pea iku ki he feke'ike'i mo e moveuveu.

‘I he keisi ‘a Tonga ‘oku toka ‘olunga ‘a Tonga ‘o kau ai mo e ngaahi fonua iiki ange mo masivesiva ‘o e Pasifiki ‘i he ngāngā’ehu ‘oku hoko he vā ‘o e ngaahi fonua lalahi, tu’umalie mo mālohi honau ivi fakakautau.

‘Oku totonu ke nofo pe ‘a e ngaahi fonua iiki kau ai ‘a Tonga ni ‘o me’angāu’aki ‘a e tu’unga ‘oku ‘i ai ‘a e fefusiaki ‘a e ngaahi fonua tu’umālie mo hau hangē koia ‘oku hoko he Pasifiiki he ngaahi ‘aho ni ke fakatafe mai ai ‘a e tokoni ki honau fanga ki’i fonua takitaha pea tauhi pe hono vā fengāue’aki mo e ngaahi fonua lalahi ke lelei mo melino ‘i he taimi tatau.

‘Oku ho’ata mai mei he ngaahi ‘a’ahi mai ‘a e kau Minisitā ki Muli ‘o e ngaahi fonua lalahi mo tu’umālie ‘i he Pasifiki hange koia ko Siaina mo ‘Aositelēlia ki Tonga ni mo e ngaahi tukui motu ‘o e Pasifiki kene ‘omai ‘a e mahu’inga ‘o e tau’atāina pea ke fakapotopoto ‘a hono me’angāue’aki ‘e he ngaahi fonua iiki ‘a e vā ko’eni ki he’enau lelei takitaha.

‘Oku fakapotopoto ‘a e fakakaukau ‘a e Palēmia ‘o Tonga ‘i hono faka’eke’eke ia ‘e he kau faiongoongo ke tauhi pe vā fengāue’aki, fetokoni’aki mo fakakaume’a ia ke lelei pea mo e mahu’inga ‘a e totonu ‘a e fonua takitaha ki hono fakalele hono fonua (sovereignty).

Ko hono alea'i ha toe kaveinga hange koe malu’i ‘oku totonu ke fakahoko ia ‘i he lēvolo fakataki ‘a e tukuifonua ‘o e Pasifiki (Pacific Islands Forum).

Ko e poini mahu'inga ia heni ke sio loloa e ngaahi fonua iiki ange he Pasifiki 'o kau ai 'a Tonga ki he kaha'u pea fai 'i he founga fakapotopoto he koe fonua hau kotoa mo kolo'ia 'oku 'i ai 'enaui 'asenita pea 'oku 'ikai ke foaki mola mo noa'ia ha tokoni pea 'oku 'ikai toe kehekehe moha fefakatau'aki kuo pau ke fakafetongi 'i he founga kehekehe 'o kau ai 'a e ngaahi founga 'oku 'ikai ketau fa'a malava ke fakatokanga'i