Lau 'a e 'Etita: ‘E malava nai ke 'oua 'e toe hoko 'a e Fuhu faka Kolisi? Featured
Ko e Kau Polisi 'o ku nau feinga ke fakamovete'i 'a e fakapotanga holo 'a e fanauako 'i he tau'angapasi 'i he 'aho Falaite 27 Fepueli.
Ko e taha ‘eni ha kaveinga ‘oku talanga’i lahi ‘i he fonua ni ‘a e kee moe fuhu ‘i he vaha’a ‘oe ngaahi kolisi ‘a ia ‘oku ‘ikai ngata ‘i he’ene fakatu’utamaki ki he fanau ako ‘iate kinautolu pe ka ‘oku toe faka popula ki he kakai ‘o e fonua.
‘Oku ‘ikai foki ko ha’a ne toki hoko ‘eni he na’e talu pe mei mu’a kae tautau tefito ki he vaa ‘o e ongo kolisi tupu’a ‘o e fonua ni ‘a e Kolisi Ko Tupou mo e Kolisi Tonga.
‘Oku hoko foki ‘i he ngaahi ta’u ki mui ni ‘a e me’a fo’ou ‘i he fonua ni ‘a e fekoekoe’i mo ma’uma’uluta ‘a e vaa ‘o e kolisi ko’eni pea ‘oku fakamalo’ia ‘a e ngaue malohi ‘a e ongo puleako pehe ki he kau faiako ‘o e ongo ‘apiako ni ‘i hono fakama’uma’uluta ‘a e vaa ko’eni pea ‘oku faka fiefia ia ki he fonua. ‘I he taimi tatau ‘oku hoko atu pe ‘a e kee faka kolisi ia ‘i he vaha’a ‘o e Kolisi Tonga mo e Kolisi Liahona pea ‘oku fai ‘a e hoha’a lahi kiai ‘a e fonua.
‘Oku lahi ‘a e ngaahi solova’anga ‘oku fai ‘a e ‘amanaki hange ko hono ta’ofi ‘a e kau atu ‘a e ngaahi kolosi ‘e ni’ihi ki he sipoti faka kolisi mo e fe’ahi ‘akapulu tukukehe ange hono hilifaki ‘a e tautea taupotu taha hange ko hono fakamaloloo’i mei ako. Kuo nga’unu foki mo e Pule’anga ke hilifaki ‘e he Fakamaau’anga Polisi ‘a e tautea ngaue popula ki he fanau ‘oku nau kau ki hono fakatupunga mo fakahoko ‘a e ngaahi fakalavea ‘i he ngaahi kee ‘oku fakahoko.
Neongo katoa ‘eni ka ‘oku kei hokohoko atu pe ‘a e kee ia pea toe ‘alu ke pango mo fakalalahi ange. Na’e a’u pe foki ‘a e fuhu ki he ‘aho ne tau mai ai ‘a e ongo vaka meili pea sio tonu ‘a e kau folau ‘eve’eva ki he kee ko’eni ‘i he tau’anga pasi ‘i he Hala Vuna ‘o ofi atu ki he Uafu ko Vuna. ‘Oku toe fakamamahi he ‘oku ‘ave heni ‘a e ‘ata hala ‘o Tonga koe ‘Out Motu Anga’ofa.
Ko e fehu’i ‘oku fai sio kiai ‘oku anga pehe ni;
• ‘E malava nai ‘e he founga ‘oku lolotonga fakahoko ‘e he Kolisi ko Tupou mo e Kolisi Tonga ke hoko ia koha sipinga ke muimui ki ai ‘a e toenga ‘o e ngaahi kolisi?
• ‘Oku ngaue nai hono ta’ofi ha kolisi ki he’ene kau atu ki he sipoti pe koe fe’auhi ‘akapulu ke ngata ai ‘a e kee ko’eni?• Ko e ha ‘uhinga ‘oku toe fakalalahi ai he ngaahi ‘aho ni?
• ‘Oku malohi nai ‘a e ivi pe koe ta’au ‘o e tekinolosia hange koe telefoni to’oto’o moe ‘initaneti ki hono faka’ai’ai ‘a e kee?
• ‘Oku ‘i ai nai ha kaunga ‘a e kau faiako ki hono faka’ai’ai ‘a e kee ko’eni?
• ‘Oku ‘i ai nai ha kaunga ‘a e kau kolisi tutuku ki hono faka’ai’ai ‘a e hokohoko atu ‘a e feke’ike’i?.
• ‘Oku ‘i ai ha kauga ki heni ‘a e ngaahi Siasi pe koe ngaahi Tokateline?
• Fefe ‘a e kau ma’umafai ‘oku nau tauhi e Lao moe Melino ‘oku malavalava nai honau ngaahi fatongia?
• ‘Oku fefe nai ‘a ‘api moe fatongia ‘o e matu’a?
'Oku mahino pe 'oku lolotonga fakahoko 'a e ngaue ki heni 'a e Potungaue Ako pehe ki he Ngaahi Potungaue Ako 'a e Ngaahi Siasi ka 'oku 'oatu pe 'a e ngaahi fehu’i ko’eni ke fai ha vakai kiai pea ‘oku ‘ikai tukuaki’i ha taha, siasi,vkolisi, pe koha tafa’aki ka ‘oku ‘i ai ‘a e tui koe fatongia eni ‘o e fonua ketau ngaue fakataha kiai telia ‘a e kaha’u ‘etau fanau.
