Puke kau Polisi 'Asiata Masima ki he feinga fakapō

Kuo ma’u ha ngaahi fakamo’oni mahu’inga mei fakatotolo ́'a e kau Polisi ‘o fekau’aki mo e kaunga ‘a e tangata ́ ni ki ha hia mamafa pea ‘oku hokohoko atu e ngāue ́ ki ha ngaahi faka’ilo hia kehe foki.

Lolotonga ko ia ‘oku mau tali ‘a e totonu ‘a e kakai ́ ke fakahā ‘enau ngaahi fakakaukau ́ pea mo kau atu ‘i he ngaahi tālanga ‘i he mītia fakasōsiale ́ka ‘i he taimi tatau ‘oku fakamamafa’i e mahu’inga ko ia ke faka’apa’apa’i ‘a e pule ‘a e lao ́, faka’apa’apa’i ‘a e totonu ‘a e ni’ihi kehe ́, mahu’inga hono tauhi e ‘ulungaanga mo e anga faka’apa’apa ́, pea ‘oku tonuhia ‘a e taha kotoa kae ‘oua kuo fakamo’oni’i ‘oku halaia.

‘Oku to’o foki ‘e he Polisi Tonga ́ e faingamālie ́ ni ke toe fakamanatu kia kinautolu kotoa ‘oku nau ngāue’aki ‘a e mītia fakasōsiale ́, ‘e tatau ai pē pē ko fē ha feitu’u ‘oku ́ ke ‘i ai, ‘e malava pē ke faka’ilo koe ki ha ngaahi hia felāve’i mo hono ngāue kovia’aki ‘a e mītia fakasōsiale ́.

‘Oku mēmipa ‘a e Polisi Tonga ́ ‘i he INTERPOL, pea ‘oku mau fengāue’aki fakataha mo homau ngaahi hoa ngāue tauhi lao ‘i he tapa kotoa pē ‘o mamani ́ ki hono tānaki ‘o e ngaahi fakamo’oni ́ pea mau fepoupouaki ‘i hono fakahoko ‘o e ngaahi fakatotolo ́ mo e faka’ilo ́.

‘Oku ‘oatu ai e na’ina’i mei he Polisi Tonga ́ ke faka’ehi’ehi mei hano tukuatu ha ngaahi fakamatala pē kau atu ki ha ngaahi ngāue ‘i he mītia fakasōsiale ́ te ne ala uesia e fakatotolo ‘oku lolotonga fakahoko ́.

He’ikai ‘aupito ke tali ha ngaahi ngāue pē fakamatala ‘oku ́ ne faka’ai’ai ha fetā’aki, tu’uaki e tāufehi’a ́, pē fakasi’ia e tu’unga malu ‘o ha kakai kehe, he ‘e pau ke fakatotolo’i eni ki hano faka’ilo hia.

‘Oku tukupā ‘a e Polisi Tonga ́ ke tauhi ‘a e pule ‘a e lao ́ pea mo fakapapau’i ‘oku taau mo tau’atāina ‘a e fakatotolo ́.

Te mau hokohoko atu e ngāue ki hono tānaki e ngaahi fakamo’oni ́ pea mo vakai’i pē ‘oku ‘i ai ha ni’ihi kehe ‘oku kaunga ki he ngaahi me’a ́ ni.

‘Oku mau loto ke toe fakamanatu ki he kakai ‘o e fonua ́, ‘e malava ke toe fakahoko ha ngaahi faka’ilo kehe ‘i he lele atu ko eni ‘a e fakatotolo ́.

‘Oka ‘oku ‘i ai ha fakamatala te ke ma’u felāve’i mo e keisi ́ ni, kātaki fetu’utaki mai ki he’emau Senitā Fetu’utaki ́ ‘i he telefoni 23-713 pē ‘īmeili mai ki he This email address is being protected from spambots. You need JavaScript enabled to view it..

‘Oku mau fakamālō atu ki ho’omou poupou mo e tali ‘a e kaveinga ́ ni pea mo kole ai pē ho’omou tokoni ́ ‘i hono tauhi ‘o e malu mo e hao ‘o ‘etau nofo ́ pea mo pukepuke e totonu ‘o e founga ngāue fakalao ́.