Faka’ilo 'Etuate mo 'Akosita Lavulavu ki he ngāue'aki 'a e tohi ngāue Loi ^Featured

Ko hono faka’ilo ‘eni ‘o e ongo Lavulavu fekau’aki mo hono tukuaki’i ki he'ena ngāue'aki 'a e tohi ngāue loi 'a ia ko hono ngaue'aki 'a e tohi na'e fakamo’oni loi’i  ai ‘a e hingoa ‘o e matāpule ko Sione Tunufa’i Tui mei Ta’anea Vava’u.

Fakatatau ki he fakamatala mo e ngaahi tokiumeni ‘oku ma’u ‘e he ongoongo ni ‘i he 'aho 5 Sepitema ta’u 2017 na’e fai ai ha tohi ki he CEO ‘o e Potungāue Fonua Rosamond Bing ‘o fakamo’oni ki ai ‘a e hingoa ‘o Sione Tui pea fakahū atu ki he Potungāue Fonua.

Ko e tohi ko’eni ko 'Etuate Lavulavu na’a ne fakahū atu pea ‘oku hā he tohi ko’eni ‘oku loto ‘a Sione Tui ke liliu hono lisi atu kiate ia ('Etuate Lavulavu) ‘e Sione Tui ‘a hono fu’u maka mei he lisi pisinisi (business) ki he lisi keli’anga maka quarrying).

Na’e fakamahino ‘e Sione Tui ‘i he faka’ilo ko’eni ‘oku ‘ikai koia ia na’e fakamo’oni he tohi ko ‘eni pea ‘oku tukuaki’i koe fakamo’oni ko’eni 'oku loi 'o kehe ia mo e fakamo'oni totonu 'a Tui.

‘Oku te’eki ke mahino ha ‘aho ‘e fakahoko ai ‘a e fakatonutonu ko’eni ka ‘oku kei fakatatali foki mo e hopo ‘a 'Etuate Lavulavu ‘i he Fakamaau’anga ki hono tukuaki’i ia ki he hia tatau fekau’aki mo e ‘Apiako ‘Unuaki ‘o Tonga pea ‘oku toe  kaungā Faka’iloa ai mo hono hoa ko e MInisitā ki he Ngaahi Ngāue Lalahi ‘Akosita Lavulavu.

Ko Lavulavu foki koe Tokoni Sea ia ‘o e Paati ‘a e Kakai ‘a ia ‘oku Sea ai ‘a e Palēmia lolotonga pea ko hono hoa 'oku Minisitā ki he Ngaahi Ngāue.