Tu’utu’uni ‘e he Fakamaau’anga Tangi na’e ‘ikai Fakamatala mo Fuakava Loi ‘a Lord Tu’ivakano Featured
Dr. Viliami Uasike Latu, Lord Tu'ivakano mo William Clive Edwards Sr.
6 Novema, 2020. Kuo tu’utu’uni ‘e he Fakamaau’anga Tangi ‘a ia ‘oku kau kiai ‘a e kau Fakamaau Lahi ‘e toko 3 ko Justice Moore, Justice Blanchard mo Justice White na’e hala hono tautea ‘o Tu’ivakano ki he fakamatala loi mo e fuakava loi.
‘I ha’anau tu’utu’uni tohi ‘i he pongipongi ‘o e ‘aho ni na’a nau fakamahino ai na’e hala ‘a e tu’utu’uni ‘a e kau sula ke fakahalaia’i ‘a Lord Tu’ivakano.
Na’e fakahoko foki ‘a e tangi ko’eni ‘i he Fakamaau’anga Tangi ‘i he ‘aho 20 ‘o ‘Okatopa 2020 pea koe tangi ‘eni makatu’unga ‘i he tu’utu’uni ‘a e kau sula mei Malapo mo Vaini ‘i he ‘aho 9 ‘o Ma’asi 2020 ke halaia ‘a Lord Tu’ivakano ki he Fakamatala Loi (Making False Statement) mo e Fuakava Loi (Perjury).
‘Oku makatu’unga foki ‘eni mei he tohi ‘a Lord Tu’ivakano ki he ‘Ofisi ‘o e ‘Imikuleisoni Tonga ‘i he ‘aho 17 ‘o Siulai 2015 ‘o fakahā ai na’e ‘osi liliu kakai ‘a e ongo matu’a Siaina ‘i Tonga ni pea koia na’a ne fakahoko ‘a e ouau koia.
Na’e toe fuakava foki ‘a Lord Tu’ivakano ia ‘o fakahū ki he Fakamaau’anga Polisi ‘i he ‘aho 22 Tisema, 2015 ‘o fakahā ai ‘a e me’a tatau na’e ‘osi liliu kakai ‘a e ongo matu’a Siaina ko’eni ka na’e taumu’a ‘a e fuakava ia ko’eni ke fakafoki mai ‘aki ‘a e koloa ‘a e Fale Alea na’e puke ‘e he kau polisi.
Na’e ngāue ‘aki foki ‘e he kau polisi ia ‘a e ongo tohi ko’eni ke faka’ilo’aki ‘a Lord Tu’ivakano pea tupu mei ai hono fakahalaia’i ia ‘e he kau sula.
‘I he tu’utu’uni ‘a e Fakamaau’anga Tangi na’e ‘ikai ha fakamo’oni ia kene fakamahino na’e fuakava loi pe fakamatala loi ‘a e Lord Tu’ivakano he koe ongo matu’a Siaina na’a ne fakamatala he’ene fuakava mo ‘ene tohi ki he ‘Ofisi ‘o e ‘Imikuleisoni Tonga ’oku mo’oni pe ia ka na’a ne feto’oaki hona hingoa pea na’e ‘uhinga pe ki he ongo sino tatau.
Ko e hopo lahi taha foki ‘eni mo loloa taha kuo fakahoko 'i he fonua pea na’e ‘uluaki tamate’i pe ‘i he Fakamaau’anga Lahi lolotonga ‘a e lele 'a e hopo ‘a e Tikite ‘e 6 mei he 10 fakatoa na’e faka’ilo kiai ‘a Lord Tu’ivakano ‘a ia koe ngaahi tikite ko’eni na’e fekau’aki ia mo hono tukuaki’i ‘o Lord Tu’ivakano ki hono fe’ave’aki ‘a e pa’anga ‘uli mo hono fakahoko ha totongi fakafūfū ke foaki ha paasipooti.
Ko hono tamate’i ko’eni 'a e ngaahi tikite ko'eni na'e ‘uhinga foki ia he na’e ‘ikai ha fakamo’oni ia kiai pea koe fakamole taimi mo fakamole pa’anga ke kei hoko atu ‘a e hopo ‘i he ngaahi tikite koia.
‘I he fakamalanga tohi ‘a Clive Edwards ‘i he hopo tangi ko’eni na’a ne fakamahino ai ko e hopo ko’eni na’e taumu’a fakapolitikale pea na’e hanga ‘e he Palēmia kuo pekia ‘Akilisi Pohiva ‘o tukuaki’i loi’i mo hala ‘a Lord Tu’ivakano ke tohoaki ‘a e kakai ke fili ‘iate ia mo ‘ene paati PTOA ‘i he Fili Fale Alea 2017 pea ke taufehi’a ‘a e kakai ki he Hou’eiki pea iku ‘o faka’ilo ai 'a Lord Tu’ivakano ki he Fakamaau’anga ‘o ‘ikai ha makatu’unga.
‘Oku malie foki he na’e ‘osi tautea ‘a Lord Tu’ivakano ia ki he ongo hia ko’eni ‘o kau ai hono tautea malu’i ia mo fakahoko ‘a e ngāue ki he Komiunitī pea kuo ne ‘osi ngāue’i pe ia mo e loto fiemalie.
Na’e fakamahino ‘e Lord Tu’ivakano ‘i he’ene tangi ‘i hono fokotu’u tohi ‘e Wlliam Clive Edwards ki he Hou’eiki Fakamaau Tangi na’e ‘ikai ke tokanga ‘a Lord Tu’ivakano ia ki he’ene ngāue ki he Komiunitī mo hono malu’i ia he na’e tokanga pe ia ke fakama’a hono lekooti ke mahino na’e ‘ikai kene fakahoko ‘e ia ha fuakava loi moha fakamatala loi pea koe me’a ia ‘oku mahu’inga kiate ia mo hono kaha'u pehe ki hono famili.
Na’e tali lelei pe foki ‘e Lord Tu’ivakano hono tautea ia ki hono ma’u mo e me’atau mo e mahafu ‘i hono ‘api me’a’anga he na’e te’eki fakafo’ou ‘ene laiseni he ‘aho na’e ma’u ai pea na’e hoko mai mo e afā ko Gita ‘o tuai ai ‘a e ava ‘a e Pule’anga pea 'oku fiemalie pe ia kiai he na'e 'ikai taumu'a pehe ia pea kuo 'osi fakafo'ou 'ene laiseni 'a'ana hili pe hono tautea ia.
'I he fakamalanga tohi 'a Edwards 'i tangi ko'eni na'a ne fakamahino ai ko Lord Tu'ivakano koe taha ia ha mo'unga'i tangata 'i he fonua he ko e Nopele pea na'e Minisita 'i he ngaahi ta'u lahi, Sea 'i he Fale Alea 'o Tonga pea hoko ko e Palemia 'i he Fonua.
Na’e fakafofonga’i ‘e Lord Tu’ivakano ‘i he Tangi ko’eni ‘e William Clive Edwards Sr. mo Dr. Viliami Uasike Latu ka e fakafofonga’i ‘a e Pule’anga ‘e he Talēkita Talatalaaki 'a e Pule'anga Semisi Lutui, Tevita ‘Aho mo Tupou Vainikolo.
