Tukuange Fakamaau'anga ‘Ileana Taulua ‘i hono tukuaki’i ki he fuakava loi ke ma’u ha paasipooti ^Featured

Ko Taulua foki na’e hoko ko e ‘ofisa polisi mei he ta’u 1973 pea ne toki malōlō penisoni ‘i he ta’u 2005 pea ko e konga lahi ‘a e ta’u ‘e 32 ‘ene taimi ngāue na’e ngāue ai ki he tafa’aki ‘imikuleisoni lolotonga ia ‘oku ‘i he malumalu ‘o e Potungāue Polisi.

Na’e tu’utu’uni ai ‘e he Tu’i Fakamaau Lahi ‘oku tonuhia pe ‘a Taulua ia pea ‘oku ‘ikai ke malava ‘e he Talatalaaki ‘o fakamo’oni’i na’e fakahoko ‘e Taulua ha fuakava loi ke ma’u ai ‘e he toko 5 koe kainga Siaina ‘a e ‘enau ngaahi paasipooti ‘a ia na’a ne fuakava’i na’e ‘osi foaki kiate kinautolu lolotonga ‘ene kei ngāue ‘i he va’a ‘imikuleisoni ‘a e Polisi.

Na’e tukuaki’i foki ‘a Taulua na’a ne fuakava na’e ‘osi ma’u ‘e he toko 5 Siaina ko’eni ‘enau ngaahi paasipooti lolotonga ia ‘oku ne ‘ilo lelei koe ngaahi tatau fotokopi ‘o e ngaahi paasipooti ko’eni ‘oku loi pea na’e fa’u.

‘I he tu’utu’uni ko ‘eni ‘a e Tu’i Fakamaau Lahi na’a ne fakamahino ai ‘oku ‘ikai ke ‘i ai ha fakamo’oni na’e fa’u ‘e Taulua ‘a e ngaahi tatau ko’eni pea na’e fakamahino mei he ngaahi fakamo’oni ‘o a’u ki he mataotao mei Nu’usila na’e fakamo’oni ma’a e Talatalataaki ko e fakamo’oni totonu pe ‘a Taulua na’e hā he ngaahi tatau.

Na’e fakamatala foki ‘a Taulua ia lolotonga ‘a e hopo ko’eni koe ngaahi tatau totonu pe ‘eni pea ‘oku ne ‘ilo lelei he na’e ngaue kiai pea na'e tali 'e he Tu'i Fakamaau Lahi ia 'a e fakamatala ko'eni 'a Taulua.

Ko e hoko atu foki ‘eni ‘a e ngaahi hopo paasipooti ‘a ia ko e ola ia ‘o e ngāue ‘a e Taskforce na’e fakapa’anga ‘e he Pule’anga ‘o ‘Akilisi Pohiva kenau fakahoko ‘a e ngaahi fakatotolo fekau’aki mo e tukuaki’i ki he ngaahi ngāue hala fekau’aki mo e passipooti.

‘I he fakamalanga fakaava mo tapuni ‘a e loea ‘a Taulua William Clive Edwards Sr. na’a ne fakamamafa’i ai koe hopo ko’eni koe ta’au ‘o e tukuaki’i fakapolitikale pea na’e tataki ‘e he Palēmia kuo pekia ‘Akilisi Pohiva ‘o iku ai ki hono fakapa’anga ‘a e Taskforce ‘a e Potungāue Polisi kenau fakatotolo’i tokua na’e ‘i ai ‘a e ngaahi ngāue kākā fekau’aki moe paasipooti Tonga.

'I he fakamalanga 'a Edwards na'a ne toe fakamamafa'i ai ko e kakai na'e fuakava 'a Taulua kiai na'e 'osi foaki 'enau ngaahi paasipooti koe konga ia 'o e ni'ihi na'a nau fakatau 'a e paasipooti 'i he taimi na'e fakangofua ai 'e he Pule'anga pea ma'u ai moe lau miliona 'a e fonua ka na'e hoko hono fakapolitikale'i ke tupu ha loto taufehi'a 'i he kakai pea ke faka'iloa ai 'a e kakai na'e 'ikai ha'anau hia ka ko hono fakahoko pe honau fatongia.

Na’e ‘osi hopo foki ‘a Lord Tu’ivakanō ‘i hono faka’ilo ia makatu’unga ‘i he ola ‘o e fakatotolo koia ‘a e Taskforce tatau pea koe kongalahi taha hono tukuaki’i ia fekau’aki mo e paasipooti na’e tu’utu’uni ‘e he Fakamaau’anga Lahi ke tamate’i ko e 'ikai ha falamo'oni kiai.

Ko e hopo ko'eni na'e fakahoko 'i he 'aho 'e 2 mo e konga pea na’e fakafofonga’i ‘a ‘Ileana Taulua ‘e William Clive Edwards Sr. pea ko Semisi Lutui pea tokoni kiai ‘a Tevita ‘Aho ma’ae Talatalaaki.