Tali tonuhia Paula Naitoko ki he hu mai faito’o konatapu mo e me’atau ta’elaiseni. Featured
Paula Naitoko
4 'Epeleli, 2020. Na’e tali tonuhia ‘a e Faka’iloa, Paula Naitoko mo’ene fakafofonga lao Sifa Tu’utafaiva ki he ngaahi tikite ‘e 3 na’e faka’ilo ki ai ‘i he Tu’apulelulu 26 Ma’asi 2020 ‘ia Fakamaau Lahi Laki Niu. Pea mo fili ke fakahoko hono fakamaau’i ‘i he Fakamaau Lahi ‘ata’ataa pe.
Ko e tikite ‘uluaki na’e faka’ilo ia ki he kaunga ngaue fakataha pea mo e tokotaha ko Mele Fangupo ki hono huu mai ‘a e faito’o konatapu. Pea ‘i he fakaikiiki ‘o e tikite, ‘i he ‘aho 23/05/2019 na’e huu mai ai ‘e he Faka’iloa mo Mele Fangupoo ‘a e faito’o konatapu ‘oku ‘iloa ko e Meth (‘aisi) fe’unga hono lahi mo e 6.662kg.
Ko e tikite fika ua, na’e faka’ilo ki he huu mai ha koloa tapui, ‘a ia ko hono huu mai ‘a e ‘aisi 6.662kg ko e kenapisi (cannabis) fe’unga hono lahi mo e 625.29g pea pehee ki he lolo fe’unga hono lahi 107.29ml.
Ko e tikite fika 3 leva, ko e kouna ke huu mai koloa tapui, ‘a ia ko e ngaahi me’afana ‘i he kalasi kehekehe ‘e 5 pea mo e fo’i mahafu ‘e 39 ta’e ‘i ai ha laiseni.
Ko e kotoa ‘a e ngaahi tukuaki’i ko’eni ‘i hono ma’u ‘a e puha, na’e feinga ‘a e Faka’iloa ke faka’ataa pea mei he Potungaue Kasitomu ‘i he taimi na’ane hoko ai ko e taha kau pule ‘o e Potungaue he ‘aho 23/05/2019.
Kaekehe na’e tali tonuhia kotoa ‘a e Faka’iloa ki he ngaahi tukuaki’i pea faka’aho ki he 19/10/2020 ke haa ai ‘i he Fakamaau’anga Lahi pea ‘oku fakafuofua ki he kau Fakamo’oni ‘e toko 11 ‘a e Talatalaaki.
Na’e kole ‘a e Fakafofonga Lao ‘a e Faka’iloa ke faka’ata’ataa hono malu’i ‘o e Faka’iloa pea ‘i he tu’unga lolotonga ‘oku nofo ma’u pe hono ‘api nofo’anga.
Ko e feitu’u pe ‘oku ‘ataa ke mavahe ki ai ko e lotu, Falemahaki Vaiola pea mo e Fakamaau’anga, ka kuo pau ke fakafe’ao ki ai ha ‘ofisa Polisi.
Ka ‘i he fakakikihi ‘a e Talatalaaki na’e fakafofonga’i ‘e ‘Inoke Finau, ke fakahuu ange pe ha kole ‘a e Faka’iloa mo e Fakafofonga ke toki vakai ki ai ‘a e pule ‘o e va’a Talatalaaki, he na’e ‘uhinga ‘a e fakataputapui koe’uhi ko e hia ‘oku tukuaki’i ki ai ‘a e Faka’iloa ko e hia mamafa ‘aupito.
Pea ko e taha ke ‘oua na’a uesia ‘a e kau fakamo’oni.
‘Oku te’eki ke mahino ki he nusipepa ni pe ‘oku faka’ilo pea mo Mele Fangupo, ‘a ia ‘oku ha’ana ‘a e kautaha uta na’e ‘omai ai ‘a e puha na’e ma’u ai ‘a e ngaahi koloa ta’e fakalao.
‘E toki mahino ‘i he uike ni pe ‘e tali he Fakamaau’anga Lahi ‘a e kole ‘a e Faka’iloa ke to’o hono malu’i. Ko e malu’i foki ‘o e Faka’iloa na’e kole hangatonu pe ‘a e Kalauni ki he Fakamaau’anga Lahi ‘o ‘ikai ha kaunga ki ai ‘a e Fakamaau’anga Polisi.
‘Oku kau ‘eni ‘i he taha ‘o e ngaahi faito’o konatapu lahi taha kuo ma’u pea ‘oku hokohoko atu ‘a e Potungaue Polisi ‘a e tau’i ‘o e fa’ahinga ngaue ta’efakalao ko’eni..
