Puke 'e he kau polisi 'aisi mahu'inga pa'anga 'e $460,000 'i Kanokupolu Featured
16 Novema, 2018. Na'e puke 'e he kau polisi 'i he 'aho Pulelulu 'o e uike ni 'aho 14 'o Novema ni ha matapule ta'u 41 'i Kanokupolu 'oku ne tauhi mo pule'i 'a e faito'o konatapu koia 'oku 'iloa koe 'aisi pe methamphetamine 'a ia 'oku fakafuofua hono mahu'inga ki he pa'anga 'e $460,000-00 kapau 'e fakatau atu he hala (street value).
Ko e puke ko'eni na'e fakahoko 'e he timi makehe mei he Potungaue Polisi pea na'a nau ngaue'aki 'a e kuli pehe kiha tohi kumi koloa (search warrant) 'i ha 'api nofo'anga 'i Kanokupolu.
Kuo fakaha foki mei he Pule Polisi 'o e 'Apitanga Polisi Nuku'alofa Tevita Vailea 'oku nau tauhi 'a e matapule ni kae kei hokohoko atu 'a e fakatotolo ki he hia ni.
'I he fakamatala 'a Vailea 'oku fakafuofua ki he kalami 'e 464 'o e faito'o ni na'e puke 'e he kau polisi.
'Oku mahino foki mei he puke ko'eni 'o e matapule ni 'a e 'ikai maholoholo 'a hono fakahoko 'o e hia ni mo hono tufaki 'a e faito'o ni 'i he fonua fakatatau ki he fakamatala 'a Vailea.
Na'a ne tapou ai ki he kakai 'o e fonua ke nau tokoni mai ke fakahoko ha fengaue'aki ke ta'ofi 'a e ngaue pango ko'eni 'oku hoko ai 'a e maumau ki he hakotupu 'o e fonua pea maumau ai mo e anga 'o e nofo.
Na'a ne fakalotolahi'i foki 'a e kakai 'o e fonua kenau fetu'utaki ki he kau polisi 'i he telefoni 23417 pe koe 922 kapau 'oku nau 'ilo ki ha fa'ahinga fakamatala fekau'aki mo e fa'ahinga ngaue pango ni.
1 comment
-
Puke pe kau aisi ia i uta kae hangakehe kau polisi ia mei he kau aisi o Nukualofa. Hau aa kemou ofa o puke kau taki i kolo ni he koenau mea ena oku tiliva ehe kakai mei uta. Tuku hoo mou fievaleloi kae fai hoo mou gaue ke totonu Potungaue Polisi.