Tautea Ngāue Pōpula 'Ofisa Ngāue Faka Pule'anga Tutuku Featured
Nuku'alofa
30 'Epeleli, 2015
Kuo tu’utu’uni ‘e he Fakamaau’anga Lahi ‘e he Fakamaau Lahi ko Cato ke ngāue pōpula ‘a Seluvaia Motuliki ‘o Sopu ki he ta’u ‘e taha māhina ‘e 3 ki he hia ko hono liliu kakā’i ha pa’anga lolotonga ‘ene fakahoko fatongia ‘i he Potungāue Ki he Fefakatau’aki, Takimamata & Ngaahi Ngāue ‘a e Kakai.
Na’e tali halaia pe ‘a Seluvaia ki he hia na’e faka’ilo ia kiai ‘a ia ko hono liliu kakā’i ha pa’anga ‘e 31,159 ‘o ne iku ma’u ma’ana. Na’e ngāue foki ‘a Seluvaia ki he tafa’aki laiseni pisinisi ‘a e Potungāue ‘i ha ta’u lahi pea na’e toki hoko ‘a e hia ko’eni ‘i he fakaofi atu ki he faka’osinga ‘o e ta’u 2014.
Na’e fakahā ‘e he loea ‘a e faka’iloa Tomasi Fakahua ki he Fakamaau’anga kuo totongi fakafoki ‘e he faka’iloa ‘a e pa’anga ‘e 10,000 ki he Potungāue pea na’e makatu’unga mei ai hono holoki hono tautea mei he ta’u ‘e 2 mo e konga ki he māhina pe ‘e 15 ‘a ia ‘oku ha atu ‘i ‘olunga. Ko e māhina leva ‘e 15 faka’osi ‘e tautea malu’i angalelei ia ke ‘oua na’a ne toe fakahoko ha hia ‘i he ta’u ‘e 2.
Na’e fakatokanga’i foki ‘a e hia ko’eni lolotonga hono fakahoko ‘a e ngāue ‘a e Potungaue ‘Atita anga maheni fakata’u ki he ngaahi Potungāue ‘a e Pule’anga. Na’e aofangatuku ‘a e hopo ni ‘i he ‘aho Tusite 21 ‘o ‘Epeleli, 2015 pea talaki ai pe ‘a e tautea ni.
