Tukuange ‘e he Kau Sula ‘a Halahone Taliai 'o Nualei mei he fakapō kae mo’ua 'i he tamate tangata ^Featured

Na’e tukuange foki mo Sosefo Malimali Vea mei hano faka’ilo ia ki he kaungā fakapō mo e kaungā tamate tangata kene mo’ua pe ki he fakalavea lahi.

Na’e toki tala foki ‘a tu’utu’uni aofangatuku ‘a e kau sula ‘i he efiafi ‘aneafi Tusite 21 ‘o ‘Aokos hili ia ‘a e lele mai ‘a e hopo ni ‘i ha meimei uike ‘e 4.

Ko hono faka’ilo foki ‘eni ‘o Halahone Taliai mo hono tehina Sosefo Malimali Vea fekau’aki mo e pekia ‘a ‘Aiveni Tui ‘o Vaini ‘i he hengihengi Sapate 22 ‘o ‘Okatopa 2016 ‘i he faama sola ‘i Vaini.

Na’e faka’ilo ‘a Taliai mo Vea ki he Fakapo pea faka’ilo fetongi ki he tamate tangata mo e fakatupu lavea lahi.

Na’e talu foki hono tauhi ‘o Taliai mo Vea mei ‘Okatopa 2016 pea toki fakahoko ‘a e hopo ko’eni he faka’osinga ‘o e mahina ko Siulai.

Ko e hopo faingata’a foki ‘eni he na’e mahino ‘a e mafatukituki ‘i he fatongia ‘o e Talatalaaki ke fakamo’oni’i ‘ikai toe veiveiua na’e fakahoko ‘e Taliai mo Vea ‘a e fakapō. 

Ko e fatongia tatau 'i he tafa’aki ‘a e taukapo ma’a e ongo faka’iloa 'a hono taukapo'i na'e 'ikai ke  'i ai ha loto, palani pe koha fakakaukau 'i he ongo Faka'iloa ke hoko ha mate pea na'e kaunga kiai moe malu'i 'o'ota (self defence) pehe ki he uesia he ngaue 'a e lahi hono inu 'o e 'likaholo (intoxication) pehe ki he ifi maliuana.

Koe pekia foki ‘a ‘Aiveni Tui ‘o Vaini na’e tupu ia mei ha fu’u lahi ‘a e toto na’e mole mei hono sino mei he ongo lavea lalahi ‘e ua ‘aki hano taa’i ‘aki ha helepelu hono uma pehe ki hono va’e.

Na’e hoko foki ha makuku ‘i he vaha’a ‘o Taliai, Vea moha toko 3 kehe mo ‘Aiveni Tui mo hono kaunga inu lolotonga ‘enau ma’u kava malohi ‘i mui he faama sola ‘i Vaini ‘o hoko ai ‘a e pekia ko’eni.

Na’e fakahoko ‘a e hopo ko ‘eni ‘i he malumalu ‘o e Fakamaau Lahi ko Jusice Cato mo e kau Sula.

Na’e fakafofonga’i ‘a Taliai mo Vea ‘e William Clive Edwards pea Semisi Lutui ma’a e Talatalaaki.