Ikuna Tongasat ‘i he Fakamaau’anga Tangi: ‘Ikai tali ‘eke tukuhau $17 Miliona 'a e Pule'anga Featured
26 Ma’asi, 2018. Kuo tali ‘e he Fakamaau’anga Tangi ‘a e tangi ‘a e Kautaha Tongasat pea faka’ataa ‘a e kautaha ni mei hono ‘eke ‘e he Pule’anga kenau totongi ‘a e Tukuhau Ngaue’aki (Consumption Tax) fe’unga mo e pa’anga ‘e 17 miliona tupu ($17, 931, 141-27).
Na’e ‘eke foki ‘e he Pule’anga ‘i ta’u 2015 mei he Tongasat ‘a e tukuhau CT fe’unga mo e pa’anga ‘e 17 miliona tupu ‘a ia koe tukuhau ‘eni ki he Potungaue Tukuhau mo e Pule’anga fekau’aki mo e pa’anga hu mai ‘a e kautaha ni mei he’ene ngaahi ngaue talu mei he ‘aho 1 Siulai 2006 ki he 31 ‘o Ma’asi 2015.
Ko e ‘eke ko’eni a e Pule’anga na’e makatu’unga ‘i he’enau tui ‘oku totonu ke ma’u ‘a e tukuhau CT ko’eni he koe ‘Ofisi ‘o e Tongasat ‘oku tu’u ‘i Tonga ni pea ‘oku fakalele koe ngaue ‘i Tonga ni.
Na’e taukave foki ‘a e Tongasat ‘oku ‘ikai ha totonu ki heni ‘a e Pule’anga he koe konga lahi ‘ene ngaue ‘oku peisi ‘i Hong Kong pea koe ‘ofisi ‘i Tonga ni koe alea ‘ata’ataa pe mo fakahoko ‘a e ngaahi fakamafai.
Na’e tangi heni ‘a e Tongasat ki he Fakamaau’anga Tukuhau (Tax Tribunal) ‘a e Potungaue pea na’e tali ‘a e tangi ko’eni ‘a e Tongasat ‘i ha tu’utu’uni ‘a e Fakamaau’anga Tukuhau ‘i he Mahina ko Fepueli 2017 ‘i he ‘uhinga ‘oku ha atu ‘i ‘olunga pea koe tu’utu’uni pe foki ia ‘a e Lao Tukuhau pea ‘oku ‘ikai ha totonu (jurisdiction) ki heni ‘a e Pule’anga.
Na’e tangi foki ‘a e Minisita Tukuhau mo e Pule’anga ki he Fakamaau’anga Lahi pea na’e tu’utu’uni ai ‘e he Fakamaau Lahi ko Scott ‘i he Fakamaau’anga Lahi ‘i he ‘aho 2 ‘o Sepitema 2017 ke totongi ‘e he Tongasat ‘a e CT ko’eni ‘oku ‘eke 'ehe Pule'anga pea na’e hala ‘a e tu’utu’uni ‘a e Fakamaau’anga Tukuhau.
Kaikehe na’e tu’utu’uni aofangatuku ‘e he Fakamaau’anga Tangi 'i he pongipongi ‘o e ‘aho ni 'e he kau Fakamaau Lahi 'e toko tolu na’e totonu pe ‘a e tu’utu’uni ia ‘a e Tax Tribunal pea ke faka’ataa leva ‘a e Tongasat mei hono totongi ‘a e pa’anga ‘e 17 Miliona tupu ko’eni 'oku 'eke Pule’anga.
Na’e toe tu’utu’uni foki ‘e he Fakamaau’anga Tangi ke totongi kotoa ‘e he Pule’anga ‘a e fakamole ‘a e Tongasat ‘i he Fakamaau’anga Lahi mo e Fakamaau’anga Tangi.
Na’e fakafofonga’i ‘a e Tongasat ‘e Wiliam Edwards pea ko Sione Sisifa ma’a e Kalauni.
3 comments
-
Tenau afe eni o tukuakii a Aminiasi Kefu moe kau Fakamaau. Taimi koee ku nau malohi ai ku ikai ketau tukuakii etautolu ha taha. Vakaii atu pe ko fe hotele ku vaisiliva atu ai e kautama he foi ongoongo ni hhhhhh uha hamala hifo
-
Tau teuteu pe tautolu kau totongi tukuhau ki he toutou ta mo'ua, he koe kamata ena 'enau fakateholo mai.
-
Koe hopo e e 2 a Scott kuo fulihi ehe Fakamaau’anga Tangi.
Pea koe atunga ee osi ilo lelei pe tuu ae Lao kae teke pe foki ehe kau PTOA koe kemipeini moe feinga fakalavea’i e ongoongo o Pilolevu. Kou vakai hifo koe 2015 koe taimi ia ne CEO ai a Anisi pea Minisita a Tevita Lavemauu? Pe oku hala eku mau. Ka koe mea oku hala oku alu hala pea toe ai ai ene hala moe fua ehe kakai totongi tukuhau ia e vale ni.