Kamata Hopo Siasi Tokaikolo ‘Ia Kalaisi mo e Feohi’anga Mo’ui Fo’ou ‘Ia Kalaisi ‘o Kolomotu’a Featured
18 'Epeleli, 2017. Na’e ui ‘i he ‘aho ni ‘i he Fakamaau’anga Lahi ‘a e hopo ‘a e Siasi Tokaikolo ‘Ia Kalaisi mo e Feohi’anga Mo’ui Fo’ou ‘o Kolomotu’a. Ko e fakatonutonu foki ‘eni ‘i he koloa ‘a e Siasi Tokaikolo ‘a ia ‘oku nau ‘eke ke fakafoki mei he Feohi’anga Mo’ui Fo’ou ‘i Kolomotu’a.
'Oku kau foki he 'eke ko'eni 'a e falelotu, 'api nofo'anga faifekau mo e kelekele 'oku tu'u ai.
Na'e tu'utu'uni ai 'e he Fakamaau Lahi Micheal Scott ke toloi 'a e hopo ko 'eni ki 'aho 'a pongipongi Pulelulu 18 'Epeleli makatu'unga 'i ha kole 'a e Fakafofonga Lao 'a e Kau Faka'iloa Laki Niu 'oku te'eki kenau maau lelei.
Na’e lava kakato foki ‘a e fakatonutonu ia ‘a e Siasi Tokaikolo ‘Ia Kalaisi mo e Feohi’anga Mo’ui Fo’ou ‘Ia Kalaisi ‘o Ha’ateiho pea na’e a'u ki he Fakamaau’anga Tangi ‘i he mahina ko Ma’asi pea na’e ikuna heni ‘a e Siasi Tokaikolo ‘Ia Kalaisi pea kuo fakafoki katoa ‘a e koloa ‘i Ha’ateiho ki he Siasi Tokaikolo ‘Ia Kalaisi.
Ko e fakatonutonu foki ‘eni ‘i he koloa ‘a e Siasi Tokaikolo ‘Ia Kalaisi ‘a ia ko kinautolu ‘oku Talatalaaki pea Faka’iloa ‘Uluaki ‘a Pohiva Tui’onetoa, Faka’iloa Ua ‘a Kava Fa’oliu, Faka’iloa Tolu ‘a Sione Havili Maile pea Faka’iloa Fā ‘a e Feohi’anga Mo’ui Fo’ou ‘Ia Kalaisi.
Ko e hopo ko’eni ‘oku fakafouofua ke toki ‘osi ki he mahina ko Sune ‘o makatu’unga he ngaahi toloi ‘e fakahoko mo e ngaahi taimi tepile kuo osi papau ‘e hoko lolotonga ‘a e fakatonutonu ko’eni.
Ko e Hopo Fika LA 22 'eni 'o e 2015 pea 'oku fakahoko 'i he va'a Fakamaau'anga Kelekele 'i he Fakamaau'anga Lahi pe 'i he malumalu 'o e Fkamaau Lahi ko Micheal Scott pea tokoni kiai 'a Faiva Tu'ifua.
‘Oku fakafofonga’i ‘a e Siasi Tokaikolo ‘Ia Kalaisi ‘e William Clive Edwards Sr. pea Laki Niu mo ‘Ofa Pouono ma’a e Feohi’anga Mo’ui Fo’ou ‘Ia Kalaisi pea Sione Sisifa leva ma’a e Kalauni.
1 comment
-
Haafua hoo mou taufusi he koloa he ko e fuu mamani koeni e osi. Fai hoomou taufusi ku lavelavea ai e Laumalie ia o e fanga sipi.