Mo’ui lelei pe ki’i pēpē na’e fā’ele’i pea li’aki ^Featured

‘I ha fakamatala mei he Pule ‘o e ‘Apitanga Polisi Nuku’alofa Tevita Fofofta na’e mahino mei ai na’e ma’u ‘a e pēpē ko’eni ‘e ha ongo taupo’ou fakafuofua ki he taimi 8:00 pongipongi ‘i ha ki’i hala ‘oku hanga mai pe ki he Falelotu ‘o Siasi ‘o Tonga ‘o Halaleva.

Na’e fakapapau’i mei he Falemahaki Vaiola ko e valevale ko’eni na’e fā’ele’i pe he pongipongi koia ‘a ia koe pongipongi Falaite ai pe ia.

Na’e lipooti ‘e he ongo taupo’ou ko’eni ki he kau polisi ‘a e me’a ni pea na’a na fakahā ko e valevale ko’eni na’e fa’o pe ‘i ha milemila ‘o tuku pe ‘i ha ki’i vaovao he ve’ehala pea koe fakaofo ko si’ene kei mo’ui.

Ko e valevale ko’eni ‘oku tauhi pe ‘i ha misini ‘i he Falemahaki Vaiola pea ‘oku ne si’i mo’ui lelei pe fakatatau ki he fakamatala mei he Potungāue Polisi mo e Falemahaki Vaiola neongo ko e pongipongi ‘eni na’e momoko.

‘Oku lolotonga fakahoko ‘a e ngāue ‘a e Potungāue Polisi ki he ngaue pāngo ko’eni mo e faka’amu ‘e tokoni mai ha taha na’e ‘i ai ha’a ne ‘ilo ki he me’a ni.