Lava atu Timi ki he Sipoti Pasifiki hono XVI fakataufolofola ki he Tama Tu'i ^Featured

Na’e ‘Afio pe ‘a e Tama Tu’i ‘i he teniti makehe ‘o fakafe’ao ki ai ‘a “Kioa” mo “Takapu” ko e ongo Matapule Faifatongia, pea fokoutua atu ‘a e kau sipoti pehee ki he kau ‘ofisa ‘e meimei toko valungofulu tupu mei he ngaahi sipoti kehekehe ‘e 20 ‘oku ‘amanaki kau atu.

Na’e tataki atu ‘a e Timi ‘a Tonga ‘e he Palesiteni Le’oleo ‘o e Komiti Sipoti Fakafonua mo e ‘Olimipiki ‘a Tonga, Lord Vaea pea muimui atu ai ‘a e Pule Folau, Moala Latu pehe ki a ‘Amanaki Fakakovi mo e kau ‘ofisa sipoti pea pehe mo e Sekelitali Seniale, Takitoa Taumoepeau ‘o faakahoko honau fononga ‘e he Matapule faifatongia ko “Matemate-‘a Liku”.

'I he fakahoko fatongia mo e fakatau folofola ‘a Matemate-‘a-Liku na’a ne fakafofonga’i atu ai pe ‘a e fanau pea pehe ki he ngaahi Komiti sipoti he fonua ‘a e ta’alomonuu ki he Tama Tu’i, Kingi Tupou VI, ‘i he ‘amanaki fakamanatu ‘o hono ‘aho ‘Alo’i mo e Onongofulu ta’u ‘i he uike kaha’u ka kuo folau atu ‘a e Timi ia.

Na’e to folofola ‘a e Tama ‘o ne fakamanatu ai ‘a e mahu’inga ‘o e sipoti he fonua talu mei ono’aho. Na’a folofola ‘o ‘ene manatu he’ene kei tamasi’i na’e ‘i ai ‘a e ngaahi ‘api ia ne to mo ma’u koe’uhi ko e sipoti. Na’a ne fakatataa’aki ‘a e konga kelekele ‘i Foa, Ha’apai na’e ma’u pe koe’uhi ko e sipoti Fuhu.

Na’a ne to e folofola ne kau ai mo e ngaahi ‘api ne ma’u mo foaki koe’uhi ko e sipoti Kilikiti ‘i Kolovai. Ka na’a ne folofola ‘o pehee, kuo kehe ‘a e ‘aho ni he kuo si’isi’i hotau kelekele pea ‘ikai ai to e lava ‘a e ngaahi foaki ko ia.

Na’e folofola ai ‘a e Tama Tu’i ‘o “Fakamanatu” ‘a e mahu’inga ‘o e muimui he ngaahi lao mo e tu’utu’uni ‘o e sipoti pea ‘e iku ai ki ha ola ‘oku lelei. Na’a ne folofola ‘o pehe ‘oku ‘i ai ‘a e ngaahi fakataputapu ‘i he sipoti ‘e kaunga kovi ki ho’omou feauhi pea ke ‘oua ‘e maumau’i ‘a e ngaahi lao ko ia.

Na’e faka’osi’aki ‘ene to folofola ‘a ‘Ene ta’alomonuu mo e “Fakalotolahi” ki he Timi ke fakahoko honau lelei taha, ‘o hange pe ko e me’a ne ‘osi lave ki ai ‘a e Matapule, pea fakatauange ke nau ma’u ha ngaahi ola lelei lolotonga ‘o ‘enau kau atu ki he fe’auhi pea ke nau fiefia foki.

Na’a ne folofola mai foki ki he Pule Folau, Moala Latu pe ‘oku fefee ‘a e fiema’u mo e tu’unga fakapa’anga ki he timi, pea ne mahino mei tali ‘a Latu ‘oku kei ‘i ai ‘a e tonounou.

Na’a ne folofola mai ai pe ‘e fakahoko mai ‘ene tokoni fakapa’anga ki he timi mo e teu folau.

Na’e lau eni ‘e he Timi ko e fakakoloa mo fakamalo’ia’i ‘ene foaki ‘ofa. Na’e fakahoko atu ai pe ‘e Lord Vaea pea pehee ki a Moala Latu, Pule Folau, ‘a hono fakafe’iloaki tahataha ‘a e kau memipa mei he ngaahi Komiti sipoti ki he Tama Tu’i.

Na’e lava kakato ia pea fakahoko ai pe mo e faka-famili (lotu) na’e fakahoko ‘e he Timi pea tataki ‘e Lord Vaea.