'Ulungia Mate Ma'a Tonga he papa tohikai kae ikuna 'i he loto 'o e kau poupou Featured
Sipi Tau 'a e Mate Ma'a Tonga 'i hono taki'i 'e Andrew Fifita
21 'Okatopa, 2018. Neongo na'e 'ulungia 'a e timi Mate Ma'a Tonga 'i he'ene fuofua fepaki faka-hisitolia mo e Kangakaroos 'a 'Aositelelia 34-16 ka na'e mahino 'e ne ikuna 'a e loto 'o e kau poupou, laumalie 'o e sipoti kae hulu atu ki he mala'e 'o e akapulu liiki fakamamani lahi.
'Oku kei fiefia pe 'a e kau poupou 'o e Mate Ma'a Tonga 'i he tu'unga ma'olunga kuo a'u kiai 'a e timi Mate Ma'a Tonga pea kuo fakamahino ki mamani ko e Mate Ma'a Tonga 'oku 'i he levolo 'o e Tier One pea 'oku fu'u fiema'u ke toutou fe'auhi 'i he levolo 'o e tesi fakavaha'a Pule'anga mo e ngaahi timi 'i he levolo koia.
Kuo fakatumutumu 'a e ngaahi kautaha mitia fakavaha'a Pule'anga 'i he laumalie 'oku fai 'aki 'ehe kau poupou 'o e Mate Ma'a Tonga 'enau poupou pea kuo fakavikiviki'i 'e he ni'ihi 'o e kau va'inga 'a e Kangaroos 'a e laumalie lelei 'a e kau poupou 'a e Mate Ma'a Tonga 'o 'ikai kenau lau 'a e 'ulungia kanau kei poupou pe mo hiva 'o 'ikai ha matuku vave mei he mala'e hili 'a e va'inga.
'I he lipooti 'a e ongoongo 'a e NRL.com kuo hiki 'eni 'a e Mate Ma'a Tonga ia mei he'ene hoko hake ki he Tier One koha timi kene hanga 'o fakafonu 'a e ngaahi sitetiume pea 'omai moha 'etimosifia 'oku tataa taha ke ma'u 'i he ngaahi fe'auhi liiki fakavaha'a-Pule'anga.
'I he fakamatala 'a e ongoongo 'a e kautaha liiki faka-vaha'a pule'anga kuo 'omai 'e he Mate Ma'a Tonga ia 'a e 'ata kehe ki hono manakoa 'o e 'Akapulu Liiki 'i mamani pea koe peau koia 'oku totonu ke heka ai 'a e ngaahi fonua ka koe ikuna mo'oni ko e 'akapulu liiki.
Na'e fakahoko foki 'e he timi 'a e Kangaroos 'a e fo'i tata'o 'e 6 ki he 3 'a e Mate Ma'a Tonga pea neongo 'a e 'ulungia ka na'e katoa 'a e Tonga kotoa 'o taha 'i he poupou ki he va'inga 'a e fanau.
Na'e fakahoko pe foki 'e he Kapiteni Sika Manu 'ene fakamalo ki he kau poupou mo e 'amanaki 'e kei hokohoko lelei atu ai pe ki he kaha'u.
Kaikehe 'oku fakamalo'ia 'a e va'inga 'a e fanau mo 'enau tukupa ke mate ma'a e fonua pea koe faka'ai'ai 'eni ia ki he sipoti moe hako tupu 'o e fonua.
Na'e 'Afio tonu ' a e Hau 'o e Fonua Tupou VI 'i he va'inga ni pehe ki he Ta'ahine Kuini, Hou'eiki 'o e Fonua, Palemia, Sea 'o e Fale Alea mo fakamahino 'a e poupou 'a e fonua ki he maa'imoa ni.
