Fu’u fefeka ‘a e Mate Ma’a Tonga ki he Toa Samoa Featured
Fiefia 'a e timi Mate Ma'a Tonga 'i he'enau ikuna
24 Sune, 2018. Na’e tatau mo e ha ‘a e fiefia hotau kainga Tonga ‘i he mala’e Campbelltown Sports Stadium ‘i Senee fakataha mo e fu’u kakai ‘e toko 17,802 na’a mataa tonu ‘a e ikuna ‘e he timi ‘a e Mate Ma’a Tonga ‘a e timi Toa Samoa ‘i he efiafi ‘aneafi.
Ko e ikuna ko’eni ‘a e Mate Ma’a Tonga ‘oku fakamahino ai ‘a e tu’unga ma’olunga kuo ‘au kiai pehe ki he ‘ikai toe veiveiua koe Mate Ma’a Tonga ‘oku kau ia ‘i he ngaahi timi fika ‘uluaki ‘i mamani ‘i he mala’e ‘o e ‘Akapulu Liiki (Tier One Nation).
Ko e tau fakaholomamata ‘eni pea na’e fakahoko ‘e he Mate Ma’a Tonga ha tata’o ‘e 6 ‘i he tu’u ‘uluaki ‘o a’u ki he malolo kuo 30 ‘a Tonga ki he 6 ‘a Samoa mei he enau tata’o ‘i he ‘uluaki miniti ‘e 2 pe ‘a e kamata ‘a e va’inga.
Na’e malie ‘a e tuli kai ‘a e Toa Samoa ‘onau fakahoko ha tata’o ‘e 3 ‘i he konga hono ua ki he tata’o pe ‘e taha ‘a e Mate Ma’a Tonga.
Na’e mahino pe foki ‘a e ‘ikai toe fielave ‘a e feinga ‘a e Toa Samoa he na’e fakamahino ‘e he foueti ‘a Tonga ‘a ‘enau malhi he lele’I pulu mo e tali tangata talu mei he tu’u ‘uluaki.
Ko e kai ‘o Tonga na’e ma’u mei he tata’o ‘e 7 ‘a ia koe takitaha ‘a S Havili, A Hingano, W Hopoate, K Hurrell, R Jennings, T Tatola, D Tupou mo e ‘akatautea ‘e 1 mo e ‘akafakahu ‘e 4 ‘a Taukei’aho.
Ko e kai ‘o Samoa na’e ma’u ia mei he tata’o ‘e 4 ‘a ia koe takitaha ‘a Gavet, T Lafai, T May, J Taufua mo e ‘akafakahu ‘e 3 ‘a M Lino.
